အလျားခုန် ကမ္ဘာ့စံချိန်သစ်ကို မားကပ်စ်ရမ်း တင်ခဲ့
မသန်စွမ်းအိုလံပစ်ပြိုင်ပွဲဝင်တစ်ယောက်ဖြစ်တဲ့ ဂျာမနီနိုင်ငံသား မားကပ်စ်ရမ်းဟာ အလျားခုန်ပြိုင်ပွဲ ကမ္ဘာ့စံချိန်ရှင် ဖြစ်လာပါတယ်။ အသက် ၃၃ နှစ်အရွယ် မားကပ်စ်ရမ်းဟာ ဩစတြီးယားနိုင်ငံမှာ ကျင်းပခဲ့တဲ့ Golden Roof ပြိုင်ပွဲရဲ့ အလျားခုန်ပြိုင်ပွဲမှာ ၈ ဒဿမ ၆၆ မီတာအထိခုန်ပြီး ကမ္ဘာ့စံချိန်သစ်ကို တင်နိုင်ခဲ့ တာဖြစ်ပါတယ်။ အခုပြိုင်ပွဲက နှစ်စဉ်ကျင်းပနေတဲ့ပြိုင်ပွဲဖြစ်ပြီး အခုနှစ်က ၁၈ ကြိမ်မြောက်ပြိုင်ပွဲဖြစ်ပါတယ်။ မားကပ်စ်ရမ်းဟာ မသန်စွမ်းအားကစားသမားတွေထဲက အကောင်းဆုံး ကစားသမားတစ်ယောက်အဖြစ် သတ်မှတ်ခြင်းခံထားရတာပါ။ သူဟာ ၁၄ နှစ်အရွယ်ကတည်းက မတော်တဆမှုတစ်ခုကြောင့် ညာဘက် ခြေထောက်ကို ဆုံးရှုံးခဲ့ရတာဖြစ်ပြီး မသန်စွမ်းအိုလံပစ် အလျားခုန်ပြိုင်ပွဲ ရွှေတံဆိပ်ဆုကို ၃ ကြိမ်ဆက် ရရှိထားတာဖြစ်ပါတယ်။ အခုပြိုင်ပွဲမှာ သူ့ရဲ့ ကမ္ဘာ့စံချိန်ဟောင်းဖြစ်တဲ့ (၈ ဒဿမ ၆၁)မီတာကို ချိုးဖျက်နိုင်ခဲ့တာ ဖြစ်ပါတယ်။
