ထိုင်းဘုရင် ဘူမိဘော၏ အရိုးပြာများကို ဘန်ကောက်ရှိ နတ်ကွန်းနှစ်ခုတွင် ခွဲဝေထားရှိ

နတ်ရွာစံ ထိုင်းဘုရင် ဘူမိဘော အဒူလိုင်ဒက်ဂျက်၏ ဈာပန အခမ်းအနား နောက်ဆုံးနေ့တွင် ၎င်း၏ အရိုးပြာ များကို နတ်ကွန်းနှစ်ခုသို့ ဖြန့်ဝေ ပို့ဆောင်ခဲ့ကြောင်း သိရသည်။

ဘန်ကောက်တွင် ကြီးကြီးကျယ်ကျယ် စီစဉ်ကျင်းပခဲ့သည့် ငါးရက်ကြာ ဈာပန အခမ်းအနားမှာ အောက်တိုဘာ ၂၉ ရက်နေ့က ပြီးဆုံးခဲ့သည်။ ထိုနေ့တွင် ဘူမိဘော၏ အရိုးပြာများကို ဘန်ကောက်ရှိ တော်ဝင် မိသားစုဝင်များ ဝတ်ပြုရာ ဘုရားကျောင်း နှစ်ကျောင်းမှ နတ်ကွန်းများထဲသို့ ပို့ဆောင်ခဲ့ခြင်း ဖြစ်သည်။

ဘူမိဘောသည် ပြီးခဲ့သည့်နှစ်၊ အောက်တိုဘာလက နတ်ရွာစံခဲ့ခြင်းဖြစ်ပြီး ဈာပနအခမ်းအနားကို တစ်နှစ် ကျော် အကြာတွင်မှ ပြုလုပ်ခဲ့သည်။ ထိုင်းပြည်သူများက ဖခင်သဖွယ် ချစ်ခင်လေးစားမှု ခံရပြီး ထိုင်းနိုင်ငံ ထီးနန်းကို နှစ်ပေါင်း ၇၀ မျှ စိုးစံခဲ့သည့် ဘုရင်ကြီးသည် အသက် ၈၈ နှစ် အရွယ်တွင် နတ်ရွာစံခဲ့သည်။ ဈာပန အခမ်းအနား နောက်ဆုံးနေ့၌ ၎င်းကို ထိုင်းပြည်သူ ထောင်သောင်းချီ၍ လာရောက် ဂါရဝ ပြုခဲ့ကြသည်။

ထိုင်းနိုင်ငံတွင် ဘူမိဘော နတ်ရွာစံပြီးနောက် ဝမ်းနည်းကြေကွဲမှု အထိမ်းအမှတ် ကာလကို တစ်နှစ်ကြာ သတ်မှတ်ထားပြီး အောက်တိုဘာ ၂၉ ရက် ညသန်းခေါင်တွင် အဆုံးသတ်ခဲ့ပြီ ဖြစ်သည်။ ထို့ကြောင့် ထိုင်းပြည်သူများ အနေဖြင့် ဝမ်းနည်းခြင်း အထိမ်းအမှတ်အဖြစ် ၎င်းတို့ ဝတ်ဆင်လေ့ရှိသည့် အနက်ရောင် အစား ပိုမိုတောက်ပ စိုပြေသည့်အရောင်များ ဝတ်ဆင်လာနိုင်ပြီ ဖြစ်သည်။

ဘူမိဘော၏ ကြွင်းကျန် ရုပ်အလောင်းကို ပြီးခဲ့သည့် သီတင်းပတ်အတွင်းက မီးသင်္ဂြိုဟ်ခဲ့ပြီး အဆိုပါ အစီအစဉ် ကို သားတော် လက်ရှိ ထိုင်းဘုရင် မဟာဗီဂျရာလောင်ကွန်းက ဦးစီးခဲ့သည်။ ဗီဂျရာလောင်ကွန်းသည် နတ်ကွန်းတွင် ထားရှိမည့် ဖခင်၏ အရိုးပြာများကို နန်းတော်ထဲ၌ တာဝန်ယူ ရွေးချယ်ခဲ့ကြောင်း သိရှိရသည်။

Ref: Daily Mail