ရုရှားရေနံ အပေါ် အားကိုးမှု ဂျာမနီကို Trump ဝေဖန်

ဘယ်လ်ဂျီယံနိုင်ငံ Brussels မှာကျင်းပနေတဲ့ NATO စစ်မဟာမိတ်အစည်းအဝေးအတွင်းအမေရိကန် သမ္မတ Donald Trump ဆွေးနွေးပြောဆိုနေစဉ်

ကာကွယ်ရေးဆိုင်ရာ ဥရောပ မဟာမိတ်နိုင်ငံတွေထဲက အကြီးဆုံးနဲ့ အချမ်းသာဆုံး နိုင်ငံဖြစ်တဲ့ ဂျာမနီဟာ ရုရှားရဲ့ အချုပ်အနှောင်ကို ခံနေတယ်လို့ စွပ်စွဲပြီး အမေရိကန် သမ္မတ Donald Trump က ဂျာမနီ တနိုင်ငံထဲကို ကွက်ပြီး NATO စစ်မဟာမိတ်တွေရဲ့ ဗုဒ္ဓဟူးနေ့ အစည်းအဝေးမှာ အပစ်တင် ဝေဖန်လိုက်ပါတယ်။

ဂျာမနီက ရုရှားစွမ်းအင်ကုမ္ပဏီ Gazprom ကို ဂျာမဏီရေပိုင်နက်ကို ဖြတ်ပြီး Nord Stream 2 ပိုက်လိုင်း တည်ဆောက်ခွင့် ပေးခဲ့တာအတွက် NATO အတွင်းရေးမှုးချုပ် Jens Stoltenberg နဲ့ မနက်စာစားရင်း ပြုလုပ်တဲ့ အစည်းအဝေးမှာ သမ္မတ Trump က ဂျာမနီကို ဝေဖန်ခဲ့တာ ဖြစ်ပါတယ်။

ဂျာမနီဟာ သူ့နိုင်ငံထဲမှာ ကျောက်မီးသွေးဓါတ်အားပေးစက်ရုံတွေ နျူကလီယား ဓါတ်အားပေး စက်ရုံတွေကို ရပ်ဆိုင်းစေပြီး ရုရှားဆီက ရေနံနဲ့ သဘာဝ ဓါတ်ငွေ့တွေယူကာ ရုရှားကို တနှစ် ဒေါ်လာ ဘီလျံပေါင်းများစွာ ရအောင် လုပ်ပေးနေတယ်လို့ သမ္မတ Trump က ဝေဖန်ခဲ့ပြီး NATO အဖွဲ့က ဒီကိစ္စမျိုးကို လျစ်လျူ မရှုသင့်ကြောင်း ပြောခဲ့တာပါ။

ဂျာမနီဝန်ကြီးချုပ် Angela Merkel ကလည်း သူငယ်စဉ်ဘဝ ဂျာမဏီ ၂ ခြမ်းကွဲနေချိန်က အရှေ့ဂျာမဏီဘက်မှာ နေထိုင်ခဲ့ဘူးတာမို့ ရုရှားလက်အောက်မှာ ဘယ်လိုနေရတယ် ဆိုတာကို သူသေသေချာချာ သိထားကြောင်းနဲ့ အခု ကိုယ်ပိုင် လွတ်လပ်တဲ့ မူဝါဒတွေနဲ့ ဆုံးဖြတ်ချက်တွေ ချနိုင်တဲ့ ၂၁ ရာစု ဂျာမဏီဖြစ်နေပြီမို့ ရုရှားက မလွှမ်းမိုးနိုင်ကြောင်း ပြန်လည် ပြောကြားခဲ့ပါတယ်။

-Ref; VOA