မိုင်းရှူးမဲဆန္ဒနယ်တွင် ကျေးရွာအုပ်စုသုံးစုရှိ ပြည်သူများ မဲရုံပြောင်းရွှေ့မည့်နေရာများသို့ သွားရောက်နိုင်ရေး ဥပဒေနှင့်အညီ သယ်ယူပို့ဆောင်ပေးရန် ကော်မရှင်အား SNLD ပါတီ အထွေထွေအတွင်းရေးမှူး တောင်းဆို
ကြားဖြတ်ရွေးကောက်ပွဲကျင်းပမည့် မိုင်းရှူးမဲဆန္ဒနယ်တွင် ကျေးရွာအုပ်စုသုံးစုရှိ ပြည်သူများ မဲရုံပြောင်းရွှေ့ မည့်နေရာများသို့ သွားရောက်နိုင်ရေးဥပဒေနှင့်အညီ သယ်ယူပို့ဆောင်ပေးရန် ရွေးကောက်ပွဲကော်မရှင်အား တောင်းဆိုကြောင်း ရှမ်းတိုင်းရင်းသားများဒီမိုကရေစီအဖွဲ့ချုပ် (SNLD) ပါတီ အထွေထွေအတွင်းရေးမှူး ဦးစိုင်းညွန့်လွင်က ပြောကြားသည်။
၂၀၁၅ ရွေးကောက်ပွဲတွင် မဲထည့်ခွင့်မရခဲ့သော ကျေးသီးမြို့နယ်နှင့် မိုင်းရှူးမြို့နယ်များသည်လည်း ကြားဖြတ် ရွေးကောက်ပွဲ ကျင်းပခွင့်ရခဲ့သောကြောင့် ယင်းဒေသရှိ ပြည်သူတို့ ၀မ်းမြောက် ၀မ်းသာ ဖြစ်ခဲ့ကြကြောင်း၊ သို့ရာတွင် မဲဆွယ်စည်းရုံးရေးဆင်းပြီး ရွေးကောက်ပွဲကျင်းပရန် သိပ်မလိုတော့သည့်အချိန်တွင် မိုင်းရှူးမြို့နယ် အတွင်းရှိ မော်မယ့်၊ ကွန်ကျောင်း၊ ၀မ့်လွယ်ကျေးရွာ အုပ်စုသုံးအုပ်စုတွင် နယ်မြေလုံခြုံရေး အခြေအနေအရ တရားမျှတသော မဲဆွယ်ခွင့်မရှိဟူသော အကြောင်းပြချက်ဖြင့် အမျိုးသားဒီမိုကရေစီအဖွဲ့ချုပ် (NLD) ကိုယ်စား လှယ်လောင်းက ကော်မရှင်ထံသို့တိုင်ကြားပြီး ထိုကျေးရွာများရှိ မဲရုံများကို ပိတ်သိမ်းပေးရန် တောင်းဆိုခဲ့ခြင်း ဖြစ်ကြောင်း ဦးစိုင်းညွန့်လွင် က ၎င်းအသုံးပြုနေသသည့် Facebook စာမျက်နှာတွင် ရေးသားပြောကြား ထားသည်။
အဆိုပါ ကျေးရွာအုပ်စု သုံးအုပ်စုတွင် မဲပေးနိုင်သော မဲဆန္ဒရှင် ၄၄၀၀ ကျော်ရှိကြောင်း သိရသည်။ ထိုသို့ NLD ပါတီ၏ တောင်းဆိုမှုကို SNLD အနေဖြင့် ယင်းကျေးရွာရှိ မဲဆန္ဒရှင်များ၏ မဲပေးပိုင် ခွင့်ဖြစ်သော အခွင့်အရေးကို မထိခိုက်စေသင့်ကြောင်းနှင့် အခြား USDP (ပြည်ခိုင်ဖြိုး)၊ SNDP (ရှမ်းတိုင်းရင်းသားများ ဒီမိုကရက်တစ်ပါတီ) ပါတီများကလည်း ဖျက်သိမ်းရန်မသင့်ကြောင်း ကော်မရှင်သို့ သဘောထားပေးခဲ့ကာ အဆင့်ဆင့်တင်ပြခဲ့ပြီး နောက်၊ မဲရုံများကို ဖျက်သိမ်းခြင်းမပြုတော့ဘဲ မဲရုံများကိုမူ ပြောင်းရွှေ့ရန် ကော်မရှင်မှ ဆုံးဖြတ်ခဲ့ကြောင်း၊ မူလမဲရုံနှင့် အနည်းဆုံး သုံးမိုင်မှ အများဆုံး ၁၈ မိုင်ကွာဝေးသည့်နေရာများသို့ ပြောင်းလိုက်သည်ဟု သိရကြောင်း ဦးစိုင်းညွန့်လွင်က ဆိုသည်။
အဆိုပါဒေသများသို့ ပါတီများအနေဖြင့် လွတ်လွတ်လပ်လပ် မဲဆွယ်စည်းရုံးနိုင်ကြောင်း၊ ထိုဒေသကို ထိန်းချုပ် ထားသော SSPP/SSAA ဌာနချုပ်ကလည်း လူသိရှင်ကြား ထုတ်ပြန်ချက် ထုတ်ပြန်ထားခဲ့ပြီးလည်း ဖြစ်ကြောင်း ၎င်းက ပြောကြားသည်။
သို့ဖြစ်၍ ကော်မရှင်အနေဖြင့်လည်း ယင်းအချက်ကို ထည့်စဉ်းစားသင့်ကြောင်း၊ ယခု မဲဆန္ဒရှင် လေးထောင် ကျော် ကန့်သတ်ခံကြရပြီး မဲပေးခွင့်ကိုသူများနည်းတူ လွယ်လွယ်ကူကူပေးနိုင်စေရန် ဆောင်ရွက်ပေးနိုင်သူ များမှာ ရွေးကောက်ပွဲကော်မရှင်အဖွဲ့ခွဲ အဆင့်ဆင့်နှင့် ကြားနေစောင့်ကြည့်ရေး သို့မဟုတ် အရပ်ဘက်အဖွဲ့ အစည်းများသာ ရှိကြောင်း၊ ကန့်သတ်ခံရမှုကို ပြေလျော့စေရန် ကူညီသည့်အနေဖြင့် ဥပဒေနှင့်အညီ သယ်ယူပို့ ဆောင်သည့်လုပ်ငန်းကို ဆောင်ရွက်ပေးရန် ကော်မရှင်အား တောင်းဆိုကြောင်း၊ အဆိုပါ မဲဆန္ဒရှင် လေးထောင် ကျော်သည် မဲပေးပိုင်ခွင့် စုစုပေါင်း၏ လေးပုံတစ်ပုံဖြစ်သောကြောင့် အလေးထားသင့်ကြောင်းနှင့် စစ်မှန်သော အများစု၏ ဆန္ဒအမှန်ကို ဖော်ထုတ်စေလိုကြောင်း ဦးစိုင်းညွန့်လွင်က ဆိုသည်။
မိုင်းရှူးမဲဆန္ဒနယ်နှင့် ကျေးသီးမဲဆန္ဒနယ်သည် ၂၀၁၅ အထွေထွေရွေးကောက်ပွဲတွင် ရွေးကောက်ပွဲ ကျင်းပရန် ကြေညာပြီးနောက် လုံခြုံရေးအခြေအနေအရ ပြည်ထောင်စုရွေးကောက်ပွဲကော်မရှင်က ရွေးကောက်ပွဲကျင်းပရန် ရွှေ့ဆိုင်းခဲ့ပြီး ယခုကြားဖြတ်ရွေးကောက်ပွဲတွင် လစ်လပ်မဲဆန္ဒနယ်အဖြစ် ထည့်သွင်းကျင်းပခြင်းဖြစ်ကာ ၀င်ရောက်ယှဉ်ပြိုင်မည့်ပါတီများမှာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ ရှမ်းတိုင်းရင်းသားများ ဒီမိုကရေစီအဖွဲ့ချုပ်၊ ရှမ်းတိုင်းရင်းသားများ ဒီမိုကရက်တစ်ပါတီ၊ အမျိုးသားဒီမိုရေစီ အဖွဲ့ချုပ်နှင့် “၀” လစ်ဘရယ် ဒီမိုကရက်တစ် တိုးတက်ဖွံ့ဖြိုးရေးပါတီတို့ ဖြစ်သည်။ # Eleven
