ကိုးကန့်လက်နက်ကိုင်အဖွဲ့ ဘဏ်အကောင့်ကို တရုတ်အစိုးရဘဏ် ပိတ်သိမ်း
ကိုးကန့်လက်နက်ကိုင်အဖွဲ့ (MNDAA) ကို တရုတ်နိုင်ငံသားများ ငွေကြေးထောက်ပံ့ရန်အတွက် ဖွင့်လှစ် ထားသည့် ဘဏ်အကောင့်ကို တရုတ်နိုင်ငံ စိုက်ပျိုးရေးဘဏ်က ပိတ်သိမ်းလိုက်ကြောင်း ရိုက်တာ သတင်း ဌာနက သတင်းဖော်ပြထားသည်။
တရုတ်စိုက်ပျိုးရေးဘဏ်သည် တရုတ်နိုင်ငံပိုင်ဘဏ်များအနက် အကြီးဆုံးဘဏ်တစ်ခုဖြစ်ပြီး အဆိုပါ ဘဏ်အကောင့်သည် ကိုးကန့်တို့အပေါ် စာနာထောက်ခံသူ တရုတ်နိုင်ငံသားများက ငွေကြေးထည့်ဝင်ရန် ရည်ရွယ် ဖွင့်လှစ်ထားသည့် အကောင့်ဖြစ်သည်။
လက်ရှိတွင် တရုတ်နိုင်ငံ နယ်စပ်တွင် ကိုးကန့် ကိုယ်ပိုင်အုပ်ချုပ်ခွင့်ရဒေသတွင် MNDAA တပ်များက ဝင်ရောက်တိုက်ခိုက်မှုများ ပြုလုပ်ခဲ့ခြင်းကြောင့် တပ်မတော်နှင့် တိုက်ပွဲများဖြစ်ပွားနေသည့် အချိန်တွင် ယခုကဲ့သို့ MNDAA ၏ ဘဏ်အကောင့်ကို ပိတ်သိမ်းလိုက်ခြင်းဖြစ်သည်။
အဆိုပါဘဏ်အကောင့်ကို ယာယီဆောင်ရွက်ရန် ကိစ္စရပ်များကြောင့် ပိတ်သိမ်းခဲ့သည်ဟု ဘဏ်က ဆက်သွယ်ပြောကြားလာကြောင်း MNDAA ကိုယ်စားလှယ်က အတည်ပြုပြောကြားချက် ကိုလည်း ရိုက်တာ သတင်းတွင် ဖော်ပြထားသည်။
ယင်းသို့ ပိတ်သိမ်းခြင်းနှင့် ပတ်သက်၍ ရိုက်တာသတင်းဌာနကမူ အကြမ်းဖက်မှုနှင့် ရာဇဝတ်မှု ကျုးလွန်ရန် အတွက် ငွေကြေးထောက်ပံ့ပေးနေသည်ဟု သံသယရှိရသော ဘဏ်အကောင့်များ၏ ငွေလွှဲစာရင်းများနှင့် ပတ်သက်၍ ရိုက်တာသတင်းဌာမှ AgBank သို့ မေးခွန်းများပေးပို့ပြီးနောက် ပိတ်သိမ်းခဲ့ခြင်းဖြစ်သည်ဟု ဖော်ပြထားသည်။
အဆိုပါကိစ္စရပ်နှင့်ပတ်သတ်၍ နိုင်ငံတော်သမ္မတရုံး ပြောရေးဆိုခွင့်ရှိသူ ဦးဇော်ဌေးက မြန်မာနိုင်ငံအနေနှင့် ကိုယ်ကျိုးစီးပွားရလိုမှုအတွက် သောင်းကျန်းသူများကို ကူညီပေးနေရသည်ဟု ယုံကြည်ရသော အောက်ခြေ ပိုင်းမှ တရုတ်အရာရှိများကို တရုတ်အစိုးရထံ တိုင်ကြားထားကြောင်း ပြောဆိုသည်။
ယင်းသို့ ဘဏ်အကောင့် ပိတ်သိမ်းသည့် သတင်း မထွက်ပေါ်လာမီ မတ်လ ၂၁ ရက်နေ့က တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် မြန်မာနိုင်ငံဆိုင်ရာ တရုတ်နိုင်ငံ သံအမတ် Mr. Hong Liang တို့ နေပြည်တော်တွင် တွေ့ဆုံမှုပြုလုပ်ခဲ့ပြီး နှစ်နိုင်ငံ နယ်စပ်ဒေသ တည်ငြိမ်အေးချမ်းရေး အတွက် ပူးပေါင်းဆောင်ရွက်သွားမည်ဟု တပ်မတော်ကာကွယ်ရေး ဦးစီးချုပ်ရုံးက သတင်းထုတ်ပြန်ခဲ့ သည်။
ထို့ပြင် ပြီးခဲ့သည့်ရက်ပိုင်းက မြောက်ပိုင်းမဟာမိတ်အဖွဲ့များကို တရုတ်အာရှရေးရာ အထူးကိုယ်စားလှယ်က ခေါ်ယူတွေ့ဆုံမှုပြုလုပ်၍ တရုတ်နယ်စပ်တွင် တိုက်ပွဲများ လျော့ချရန် ပြောကြားခဲ့ကြောင်း မြောက်ပိုင်း မဟာမိတ်အဖွဲ့က အတည်ပြုပြောဆိုခဲ့သည်ဟု သိရသည်။ # The Voice
