ရွှေတောင်နှင့် ဧရာဝတီဘဏ် ပူးပေါင်း၍ အိမ်ရာ နှစ်ရှည် အရစ်ကျရောင်းမည်

ဆောက်လုပ်ရေးနှင့် အိမ်ခြံမြေ လုပ်ငန်းများ လုပ်ကိုင်လျက်ရှိသော Shwe Taung Development ကုမ္ပဏီ နှင့် ဧရာဝတီဘဏ်တို့ ပူးပေါင်းပြီး အဆင့်မြင့် အိမ်ရာစီမံကိန်းများကို နှစ်ရှည် အရစ်ကျ စနစ်ဖြင့် ရောင်းချ မည်ဖြစ်ကြောင်း အဆိုပါ ကုမ္ပဏီထံမှ သိရသည်။

အဆိုပါ အိမ်ရာချေးငွေကို ၁၅ နှစ်အထိ အရစ်ကျ ငွေပေးချေနိုင်မည်ဖြစ်ပြီး ယင်းဝန်ဆောင်မှုသည် ပုဂ္ဂလိ က ကဏ္ဍအနေနှင့် ပထမဦးဆုံး နှစ်ရှည်အိမ်ရာ ချေးငွေ ဝန်ဆောင်မှုဖြစ်ကြောင်း ရွှေတောင်ကုမ္ပဏီထံမှ သိရသည်။

“ဒီအိမ်ရာချေးငွေ (Mortgage Loan) စနစ်နဲ့ ကျွန်မတို့ရွှေတောင်က ဆောက်လုပ်ထားတဲ့ အိမ်ရာတွေကို ဝယ်ယူနိုင်မှာပါ”ဟု Shwe Taung Real Estate ၏ ဒုတိယအမှုဆောင် အရာရှိချုပ် ဒေါ်မိမိခိုင်က ပြောကြားသည်။

လတ်တလောတွင် ယင်းချေးငွေ စနစ်ဖြင့် ရန်ကုန်မြို့တော်တွင် ရွှေတောင်ကုမ္ပဏီက ဆောက်လုပ် ထားသော Hilltop Vista Condominium နှင့် Crystal Residences ရှိ အဆင့်မြင့် ကွန်ဒိုအိမ်ခန်းများကို ကနဦး ပေးသွင်းငွေ ၄၀ ရာခိုင်နှုန်း ပေးသွင်းကာ ၁၅ နှစ် အရစ်ကျ ဝယ်ယူနိုင်မည်ဖြစ်ကြောင်း ရွှေတောင် ကုမ္ပဏီထံမှ သိရသည်။

ပုဂ္ဂလိက ကဏ္ဍအနေနှင့် ပထမဦးဆုံး နှစ်ရှည် ၁၅ နှစ် အိမ်ရာချေးငွေဖြင့် လူနေအိမ်ခန်းများ ရောင်းချနိုင် ရန်အတွက် Shwe Taung Development နှင့် ဧရာဝတီဘဏ်တို့အကြား ပူးပေါင်းဆောင်ရွက်ရန် သဘောတူ လက်မှတ်ရေးထိုးထားကြောင်း အဆိုပါ ကုမ္ပဏီများထံမှ သိရသည်။

The Voice