‘Squid Game’ ဇာတ်လမ်းတွဲ နိုင်ငံတကာ Emmy ဆုရ
၂၀၂၂ ခုနှစ်အတွက် အမေရိကန်ပြည်ထောင်စုမှာ အကောင်းဆုံး ရုပ်သံဇာတ်လမ်း ဖန်တီးမှုတွေအတွက် နှစ်စဉ်ကျင်းပနေကျ Emmy ဆုပေးပွဲမှာ တောင်ကိုရီးယားက ‘Squid Game’ ရုပ်သံဇာတ်လမ်းတွဲက ထူးထူးခြားခြား ဆုတွေ ရသွားပါတယ်။အခုလို ဆုချီးမြှင့်ပွဲကို ဆိုးလ်မြို့တော် ဘူတာရုံမှာ ကိုရီးယားတွေ ဝိုင်းအုံကြည့်ရှုပြီး ဝမ်းသာအားရ အားပေးခဲ့ကြပါတယ်။
ဒီရုပ်သံဇာတ်လမ်းတွဲအတွက် မင်းသားအီဂျွန်ကြဲက အကောင်းဆုံး အမျိုးသားဇာတ်ဆောင်ဆု ရရှိပြီး ဒီရုပ်ရှင်ရိုက်ကူးတဲ့ ဒါရိုက်တာ ဟွမ်ဒုံဟျောက်က အကောင်းဆုံးဒါရိုက်တာဆု ရရှိခဲ့ပါတယ်။ ဒီရုပ်သံဇာတ်လမ်းတွဲ ဆုရရှိမှုဟာ အင်္ဂလိပ်စကားပြောမဟုတ်တဲ့ကားတကား ပထမဆုံး Emmy ဆုရတာဖြစ်တဲ့အတွက် သမိုင်းတွင်သွားတာ ဖြစ်ပါတယ်။
ဆုလက်ခံရယူချိန်မှာ မင်းသားအီက ဒီဆုပေးပွဲအခမ်းအနားကို သူတို့နိုင်ငံကနေ ကြည့်ရှုနေတဲ့ ပရိတ်သတ်ကို ကျေးဇူးတင်ကြောင်း ပြောပါတယ်။ ဒါရိုက်တာ ဟွမ်ကတော့ ဒီလို ဆုရရှိမှုဟာ ကိုရီးယားတွေအတွက် အထူးအရေးပါတဲ့အချိန်ဖြစ်ပြီး ဒါဟာ အာရှ အနုပညာရှင်တွေအတွက် လမ်းဖွင့်ပေးလိုက်တာဖြစ်ကြောင်း ပြောပါတယ်။
‘Squid Game’ ဇာတ်လမ်းတွဲဟာ ဆုကြေးငွေ ချင်တဲ့အတွက် အသက်ကိုရင်းပြီး ယှဉ်ပြိုင်ရတဲ့ကစားပွဲမှာ လူတွေ ပါဝင်ယှဉ်ပြိုင်ကြတဲ့အကြောင်းကို ဇာတ်အိမ်တည် ရိုက်ကူးထားတာပါ။ဒီဇာတ်လမ်းတွဲကို Netflix အွန်လိုင်း ရုပ်သံလိုင်းမှာ ၂၀၂၁ စက်တင်ဘာလက ပြသတော့ လူကြိုက်အများဆုံး ဇာတ်လမ်းတွဲ ဖြစ်ခဲ့ပါတယ်။
-Ref:VOA
