မြောက်ကိုရီးယားတွင် နျူကလီးယား ဒုံးကျည်ထိပ်ဖူး ၆၀ မျှထိ ရှိနေနိုင်ဟု တောင်ကိုရီးယားခန့်မှန်း
မြောက်ကိုရီးယားတွင် နျူကလီးယား ဒုံးကျည်ထိပ်ဖူး ၆၀ မျှထိ ရှိနေနိုင်ကြောင်း တောင်ကိုရီးယား အစိုးရ အရာရှိ တစ်ဦးက ပြောကြားခဲ့သည်။
ယင်းသည် မြောက်ကိုရီးယား၏ နျူကလီးယား လက်နက် ပိုင်ဆိုင်မှုနှင့်ပတ်သက်၍ တောင်ကိုရီးယား အစိုးရပိုင်းက ပထမဆုံးအကြိမ် တရားဝင် မှတ်ချက်ပေးမှုလည်း ဖြစ်လာသည်။
ကိုရီးယား နှစ်နိုင်ငံ ပူးပေါင်း ဆောင်ရွက်ရေး ဝန်ကြီး ချိုမြောင်ဂွန်းက မြောက်ကိုရီးယား နျူကလီးယား လက်နက် စွမ်းရည်နှင့် ပတ်သက်၍ သတင်းထောက်များ၏ မေးမြန်းမှုကို “တောင်ကိုရီးယား ထောက်လှမ်းရေး အေဂျင်စီ တွေရဲ့ ခန့်မှန်းမှုအရ ထိပ်ဖူး ၂၀ ကနေ ၆၀ ကြားလောက် ရှိပါလိမ့်မယ်”ဟု ဖြေကြားသွားခဲ့သည်။
တောင်ကိုရီးယား၏ အမျိုးသား ထောက်လှမ်းရေးဌာနကမူ ဝန်ကြီး၏ စကားနှင့်ပတ်သက်၍ မည်သည့် မှတ်ချက်မျှ မပေးခဲ့ချေ။ ချိုက မိမိ၏ စကားသည် မြောက်ကိုရီးယားကို နျူကလီးယား လက်နက်နိုင်ငံ တစ်ခုအဖြစ် သတ်မှတ်သည့် သဘောထားမျိုး မပါရှိဟုလည်း ပြန်လည် ရှင်းလင်းခဲ့သည်။
မြောက်ကိုရီးယားသည် နျူကလီးယားဗုံးများ စမ်းသပ် ဖောက်ခွဲခဲ့ဖူးသော်လည်း ၎င်းတို့ ပိုင်ဆိုင်ထားသည့် နျူကလီးယား ထိပ်ဖူး အရေအတွက်ကို မည်သည့်အခါကမျှ တရားဝင် မကြေညာခဲ့ချေ။ နိုင်ငံတကာ လက်နက်ရေးရာ ပညာရှင်များကမူ မြောက်ကိုရီးယားတွင် လက်နက် ပြုလုပ်နိုင်သည့် ပလူတိုနီယမ် ပေါင်ချိန် ၁၁၀ မျှ အနည်းဆုံး ရှိနေမည်ဟု သုံးသပ်ထားသည်။ ထိုပမာဏသည် နျူကလီးယား ဒုံးကျည်ထိပ်ဖူး ၈ ခုမျှ ပြုလုပ်ရန် လုံလောက်သည်။
ယခုနှစ် အစောပိုင်းကမူ စတန်းဖို့ဒ် တက္ကသိုလ်မှ နျူကလီးယား ပညာရှင် ဆိုင်ဖရိုက်ဒ် ဟက်ကာက မြောက်ကိုရီးယားတွင် နျူကလီးယားလက်နက် ပစ္စည်း အမျိုးအစား ၂၅ ခုနှင့် ၃၀ ကြား ရှိလိမ့်မည်ဟု ခန့်မှန်းခဲ့သည်။
မြောက်ကိုရီးယား အစိုးရသည် နျူကလီးယားလက်နက် ဖျက်သိမ်းရေး ကိစ္စကို အကောင်အထည်ဖော်ရန် အမေရိကန်နှင့် မူအားဖြင့် သဘောတူထားသော်လည်း အသေးစိတ် အချက်အလက်များ ပီပီပြင်ပြင် မဖြစ်မြောက်သေးသည့်အပေါ် နိုင်ငံတကာ လေ့လာသူများက ဝေဖန်လျက် ရှိသည်။
Ref: Fox News
