ချမ်းမြသာစည်မြို့နယ် ပြည်ခိုင်ဖြိုးပါတီ မိုးရာသီ စုပေါင်းသစ်ပင်စိုက်ပျိုးပွဲသို့ မန္တလေးတိုင်းဒေသကြီး ပြည်ခိုင်ဖြိုး ပါတီဥက္ကဋ္ဌ ဦးဝင်းမောင် တက်ရောက်အားပေး
မန္တလေး၊ သြဂုတ်(၁၆)
မန္တလေးမြို့၊ ချမ်းမြသာစည်မြို့နယ်၊ ကျွန်းလုံးဥသျှောင်ရပ်ကွက်ရှိ ဦးပွားဘုရားပုရိဝုဏ်အတွင်းတွင် ချမ်းမြသာစည်မြို့နယ် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီမှ ကြီးမှူးသော မိုးရာသီ စုပေါင်းသစ်ပင်စိုက်ပျိုးပွဲအား ယနေ့ နံနက် ၈ နာရီက ကျင်းပပြုခဲ့ရာ မန္တလေးတိုင်းဒေသကြီး ပြည်ခိုင်ဖြိုးပါတီဥက္ကဋ္ဌ ဦးဝင်းမောင် တက်ရောက်အားပေး၍ ကိုယ်တိုင်ကိုယ်ကျ သစ်ပင် ပါဝင်စိုက်ပျိုးပေးခဲ့သည်။
“ကျွန်တော်တို့မြို့နယ်ပါတီအနေဖြင့် သစ်တောနဲ့သစ်ပင်ချစ်ခင်တဲ့လူမျိုး သစ်ပင်ကို နှစ်စဉ်စိုက် ရွှေတိုက်ကိုစိုး ဆိုတဲ့ စကားလေးအတိုင်း မိုးရာသီကာလ သစ်ပင်တွေ နှစ်စဉ်စိုက်ပြီး သစ်ပင်တွေ ကြီးထွားလာတဲ့အခါ သစ်တစ်ပင်ကောင်း ငှက်တစ်သောင်း နားခိုရာ ဆိုသလို ဦးပွားဘုရားထဲမှာ ကျွန်တော်စိုက်ပျိုးခဲ့တဲ့ သစ်ပင်တွေ ကြီးထွားလာတဲ့အခါမှာ ဘုရားဖူးလာရောက်တဲ့ ပြည်သူတွေအတွက် နားခိုရာ အရိပ်ရမှာဖြစ်သလို တစ်ဖက် တစ်လမ်းကလည်း သဘာဝပတ်ဝန်းကျင်ကို ထိန်းသိမ်းစောင့်ရှောက်တာပါ။ အခု ဦးပွားဘုရားပုရိဝုဏ်အတွင်းမှ သစ်ပင်စိုက်တာကလည်း ဘုရားရဲ့ သြဝါဒစရိယဆရာတော်ကြီးတွေရဲ့ လမ်းညွှန်မှုကိုခံယူပြီး စိုက်ပျိုးခဲ့တာပါ´´ဟု ချမ်းမြသာစည်မြို့နယ် ပြည်ခိုင်ဖြိုးပါတီအတွင်းရေးမှူး ဦးကျော်သက်ထွန်းမှ ပြောသည်။
သစ်ပင်စိုက်ပွဲသို့ မန္တလေးတိုင်းဒေသကြီး ပြည်ခိုင်ဖြိုးပါတီဥက္ကဋ္ဌ ဦးဝင်းမောင်နှင့်အတူ တိုင်းဒေသကြီး ပါတီအတွင်းရေးမှူး ဦးအောင်ကျော်မိုး၊ တိုင်းဒေသကြီးပါတီကော်မတီဝင်များ၊ မန္တလေးခရိုင် ပြည်ခိုင်ဖြိုးပါတီဥက္ကဋ္ဌ ဦးဘိုသင်း၊ ခရိုင်အတွင်းရေးမှူး ဒေါ်ဝါဝါလှိုင်နှင့်ခရိုင်ပါတီကော်မတီဝင်များ၊ ချမ်းမြသာစည်မြို့နယ်ပါတီဥက္ကဋ္ဌ ဦးကိုကိုဦး၊ မြို့နယ်ပါတီအတွင်းရေးမှူး ဦးကျော်သက်ထွန်းနှင့်မြို့နယ်ပါတီကော်မတီဝင်များ၊ မြို့နယ်အတွင်းရှိ ရပ်ကွက်အသီးသီးမှ ပါတီဝင်များ အပါအဝင် စုစုပေါင်း အင်အား (၁၅၀) ဦးခန့် တက်ရောက်ခဲ့ကြောင်းသိရသည်။
ချမ်းမြသာစည်မြို့နယ် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီမှ ကြီးမှူးသော မိုးရာသီ စုပေါင်းသစ်ပင်စိုက်ပျိုးပွဲတွင် ကျွန်းပင်စုစုပေါင်း (၁၀၀) ပင်အား စိုက်ပျိုးပေးခဲ့ကြောင်း သိရသည်။
သုတ
