ကြားဖြတ်ရွေးကောက်ပွဲ ၂၀၁၇ နှစ်ဆန်းပိုင်းတွင် ကျင်းပမည်
၂၀၁၇ နှစ်ဆန်းပိုင်းတွင် ကြားဖြတ်ရွေးကောက်ပွဲကျင်းပရန် စီစဉ်ထားသော်လည်း ရက်အတိအကျကို မပြောနိုင် သေးကြောင်း ပြည်ထောင်စု ရွေးကောက်ပွဲ ကော်မရှင်အဖွဲ့ဝင် ဦးအောင်မြင့်က သြဂုတ် ၂၃ ရက်ကကျင်းပသည့် အမျိုးသားလွှတ်တော်တွင် ပြောသည်။
အဆိုပါကျင်းပသည့် အမျိုးသားလွှတ်တော်တွင် ရှမ်းပြည်နယ် မဲဆန္ဒနယ် အမှတ် ၂ အမျိုးသားလွှတ်တော် ကိုယ်စားလှယ် ဦးစိုင်းထွန်းအောင်က ၂၀၁၅ ခုနှစ် ပါတီစုံဒီမိုကရေစီ အထွေထွေရွေးကောက်ပွဲတွင် နယ်မြေ တည်ငြိမ်အေးချမ်းမှုမရှိသဖြင့် ရွေးကောက်ပွဲရပ်ဆိုင်းထားခဲ့သော ရှမ်းပြည်နယ်တောင်ပိုင်း၊ မိုင်းရှုးမြို့နယ်နှင့် ကျေးသီးမြို့နယ်တို့အတွက် ၂၀၁၆ ခုနှစ်အတွင်း ရွေးကောက်ပွဲ ပြန်လည်ကျင်းပပေးရန် အစီအစဉ် ရှိ၊ မရှိ မေးခွန်း ကို မေးမြန်းခဲ့ရာ ဦးအောင်မြင့်က ပြန်လည်ဖြေကြားခဲ့ခြင်း ဖြစ်သည်။
၂၀၁၅ ရွေးကောက်ပွဲတွင် လုံးဝ မကျင်းပနိုင်ခဲ့သည့် မဲဆန္ဒနယ်များမှာ ဝ ဒေသရှိ မြို့နယ် ၅ ခု၊ ရှမ်းပြည်နယ် တောင်ပိုင်း မိုင်းရှုးမြို့နယ်နှင့် ကျေးသီးမြို့နယ်များ ဖြစ်သည်။ ကျန်ဒေသများမှာ လွှတ်တော် ကိုယ်စားလှယ် အဖြစ်မှ ပြည်ထောင်စုအဆင့်ပုဂ္ဂိုလ်များအဖြစ် အုပ်ချုပ်ရေးပိုင်းသို့ ပြောင်းရွှေ့သွားသည့် နေရာများတွင်လည်း လစ်လပ်လျက်ရှိကြောင်း ရွေးကောက်ပွဲကော်မရှင် ညွှန်ကြားရေးမှူး ဦးကိုကိုနိုင်က ဧရာဝတီသို့ ပြောသည်။
သူက “ လုံးဝမကျင်းပဖြစ်ခဲ့တာက ၇ နေရာရှိပါတယ်။ ကျန်တာတွေက လွှတ်တော်ကိုယ်စားလှယ်ကနေ အုပ်ချုပ် ရေးပိုင်းကို ပြောင်းသွားတဲ့အတွက် လစ်လပ်သွားတာတွေရှိပါတယ်” ဟု ပြောသည်။
လက်ရှိအချိန်တွင် လစ်လပ်နေသော မဲဆန္ဒနယ်များအဖြစ် ပြည်ထောင်စုအဆင့်တာဝန်များတွင် ဝင်ရောက် တာဝန်ထမ်းဆောင်နေသော လွှတ်တော်ကိုယ်စားလှယ် ၁၀ ဦး၏ မဲဆန္ဒနယ်များမှာ ၂၀၁၅ ရွေးကောက်ပွဲတွင် နယ်မြေမအေးချမ်းမှုကြောင့် ရွေးကောက်ပွဲမကျင်းပခဲ့နိုင်သော ရှမ်းပြည်နယ်၊ မိုင်းရှုးမြို့နယ်၊ ကျေးသီးမြို့နယ်တို့မှ ပြည်နယ် လွှတ်တော်ကိုယ်စားလှယ် ၄ နေရာ၊ အမျိုးသားလွှတ်တော်နှင့် ပြည်သူ့လွှတ်တော် တနေရာစီဖြင့် စုစုပေါင်း လစ်လပ်မဲဆန္ဒနယ် ၁၆ နေရာခန့် ရှိကြောင်း ပြည်ထောင်စု ရွေးကောက်ပွဲကော်မရှင်က ပြောသည်။
လွှတ်တော်တွင် တစုံတရာသော အကြောင်းကြောင့် လွှတ်တော်ကိုယ်စားလှယ် လစ်လပ်လျှင် အစားထိုး ရွေးကောက်တင်မြှောက်နိုင်ရန်အတွက် ကြားဖြတ်ရွေးကောက်ပွဲများကို သက်ဆိုင်ရာ လွှတ်တော်ရွေးကောက်ပွဲ ဥပဒေပုဒ်မ ၈၉ နှင့်အညီ ကျင်းပရမည်ဖြစ်ပြီး ကြားဖြတ်ရွေးကောက်ပွဲ ကျင်းပချိန်တွင် လွတ်လပ်၍ တရား မျှတသောရွေးကောက်ပွဲကျင်းပရန် အခြေအနေရှိပါက ရှမ်းပြည်နယ် (တောင်ပိုင်း) မိုင်းရှုးမြို့နယ်နှင့် ကျေးသီး မြို့နယ်များတွင် ရွေးကောက်ပွဲ ကျင်းပပေးမည်ဖြစ်ကြောင်း ရွေးကောက်ပွဲကော်မရှင်အဖွဲ့ဝင် ဦးအောင်မြင့်က ပြောကြားခဲ့သည်။
ဧရာဝတီ
