ရခိုင် ALD ပါတီထူထောင်ခွင့် ပြည်ထောင်စုရွေးကောက်ပွဲကော်မရှင်ခွင့်ပြု

ပြည်ထောင်စုရွေး ကောက်ပွဲကော်မရှင်သို့ ပါတီထူထောင်ခွင့်လျှောက်ထားသည့် ရခိုင်ဒီမိုကရေစီအဖွဲ့ချုပ် (ALD) အနေဖြင့် ပါတီထူထောင်ခွင့်ရရှိ ပြီဖြစ်ကြောင်း ALD ခေါင်းဆောင် ဦးမျိုးကျော်က ပြောသည်။

‘‘ကျွန်တော်တို့ကို ပြည် ထောင်စုရွေးကောက်ပွဲကော်မရှင်က ဧပြီ ၂၄ ရက်မှာ ပါတီတည်ထောင်ခွင့်ကို ချပေးလိုက်ပါပြီ။ ဒီရက်ပိုင်းမှာ ခေါင်းဆောင်၊ ဒုခေါင်းဆောင်ကနေပြီးတော့ နေပြည်တော် သွားပြီးတော့ ဆက်လက် လုပ်စရာရှိတာလုပ်ရမှာပေါ့’’ ဟု ဦးမျိုးကျော်က ပြောသည်။

ဆက်လက်၍ ၎င်းက ‘‘ကျွန်တော်တို့ လိုအပ်တဲ့ စာရွက်စာတမ်းပြင်ဆင်ပြီးပြီဆိုရင် ကော်မရှင်မှာ မှတ်ပုံတင် ခြင်းကိစ္စတွေ ဆောင်ရွက်မှာပေါ့’’ ဟု ဆိုသည်။

ALD သည် ၁၉၉၀ ရွေးကောက်ပွဲတွင် ရခိုင်ပြည်နယ်အတွင်း မဲအများဆုံးအနိုင်ရရှိခဲ့သည့် ပါတီဖြစ်သည်။ ALD ပါတီနှင့် ၂၀၁၀ ရွေးကောက်ပွဲတွင် ဒေသတွင်း မဲအများဆုံးအနိုင်ရရှိခဲ့သည့် ရခိုင် တိုင်းရင်းသားများ တိုးတက်ရေးပါတီ (RNDP) တို့ကို ရခိုင်အမျိုးသားပါတီ (ANP) အဖြစ် ပူးပေါင်းခဲ့သော်လည်း ပါတီတွင်း သဘောထားကွဲလွဲမှုများဖြစ်ပေါ်ပြီးနောက် ယခုကဲ့သို့ ပါတီသစ် ထူထောင်ရန် ALD အဖွဲ့ဝင်များက ကြိုးပမ်း ခဲ့ခြင်းဖြစ်သည်။

ALD ပထမခေါင်းဆောင်နှင့် ဒုတိယခေါင်းဆောင်ရွေးချယ်ရန် မတ်လ ၂၇ ရက်တွင် ရခိုင်ပြည်နယ် ပေါက်တောမြို့နယ်၌ အစည်းအဝေးကျင်းပခဲ့ရာ ALD ပထမ ခေါင်းဆောင်အဖြစ် ယခင်က ပါတီ ဒုဥက္ကဋ္ဌ တာဝန်ယူခဲ့သူ ဦးကျော်မြင့်အား ခန့်အပ်ခဲ့သည်။ ဒုတိယခေါင်းဆောင်ကို ရမ်းဗြဲမြို့နယ်မှ ရပ်မိရပ်ဖ ဦးအောင်စိုးအား ခန့်အပ်ခဲ့သည်။

ALD ပါတီရှေ့လုပ်ငန်းစဉ် များချမှတ်ရန်နှင့် ပါတီဖွဲ့စည်းပုံရေးဆွဲရန် ပထမခေါင်းဆောင်၊ ဒုတိယ ခေါင်းဆောင်၊    ဦးမျိုးကျော်၊ ဦးဦးလှမြင့်၊ ဦးသာသာမောင်တို့ ငါးဦးပါဝင်သည့် အဖွဲ့ကို ဖွဲ့စည်း ခဲ့သည်။

ALD ယခင်ဥက္ကဋ္ဌဖြစ်၍ လက်ရှိအမျိုးသားလွှတ်တော် ဒုဥက္ကဋ္ဌတာဝန်ဆောင်ရွက်နေသည့် ဦးအေးသာ အောင်ထံ ပါတီထူထောင်ခြင်း အခြေအနေများနှင့်ပတ်သက်၍ တင်ပြ အကြံဉာဏ်တောင်းခံမှုများရှိသည်ဟု ALD ခေါင်းဆောင်ပိုင်းက ဆိုသော်လည်း ဦးအေးသာအောင် ပါတီတွင် ပါဝင်ရန် အနေအထားကို ရှင်းရှင်း လင်းလင်းမသိရသေးပေ။

# 7 Day