မြဝတီ-ကော့ကရိတ် ဒေါန တောင်ကျော်လမ်းတွင် မော်တော်ယာဉ်များ ပုံမှန်အတိုင်း သွားလာနိုင်ပြီဖြစ်
မတ်လ ၂၅ ရက်မှ စတင်ကာ ယာဉ်အသွားအလာ ရပ်ဆိုင်းခဲ့ရသော မြဝတီ-ကော့ကရိတ် ဒေါနတောင်ကျော်လမ်းတွင် မတ်လ ၃၀ ရက် ၌ မော်တော်ယာဉ်များ ပုံမှန်သွားလာနေပြီဖြစ် ကြောင်းသိရသည်။
မြဝတီ ကုန်သွယ်ရေးဇုန်၌ မတ်လ ၂၅ ရက်နေ့က ဖြစ်ပွားခဲ့သော တိုက်ပွဲများ၊ ဒေါနတောင်ကျော်လမ်း နှင့် ကျံဒိုး နယ်မြေအတွင်း ဖြစ်ပွားခဲ့သော တိုက်ပွဲများကြောင့် ထိုင်း-မြန်မာ နယ်စပ် ကုန်သွယ်မှုနှင့် ခရီးသွား မော်တော်ယာဉ်များ သွားလာမှု ရပ်ဆိုင်းခဲ့ရခြင်း ဖြစ်သည်။
မြဝတီ ဒေါနတောင်ကျော်ကုန်သွယ်လမ်း ငါးရက်ကြာ ရပ်ဆိုင်းခဲ့ရာမှ ယနေ့တွင် ခရီးသွားယာဉ်များနှင့် မှန်လုံယာဉ်ကြီးများမှာ ပုံမှန်အတိုင်းသွားလာနေကြပြီဟု သင်္ဃန်းညီနောင် လူမှုကယ်ဆယ်ရေးအဖွဲ့မှ တာဝန်ရှိသူတစ်ဦး က ပြောကြားသည်။
မြဝတီ-မော်လမြိုင်ယာဉ်မောင်းတစ်ဦးကလည်း ယနေ့နံနက်တွင် ကားကြီး ကားလေး အများအပြား သွားလာနေပြီဟုဆိုသည်။
မြဝတီဒေါနတောင်ကျော်လမ်းတွင် ယခင်ကလည်း ဖြစ်ပွားခဲ့သောတိုက်ပွဲများကြောင့် ယာဉ်အသွားအလာ ရပ်ဆိုင်းကာ နယ်စပ်ကုန်သွယ်ရေး ရပ်တန့်ခဲ့ရမှုများ ရှိကြောင်း သိရသည်။
