ဗြိတိန်ဘုရင်မကြီးကွယ်လွန်သွားခဲ့တာကြောင့် ပရီးမီးယားလိဂ်ဘောလုံး ပွဲစဉ်တွေကို ရွှေ့ဆိုင်းသွားရဖို့ ရှိနေပါတယ်။ ဗြိတိန်ဘုရင်မကြီး အဲလိဇဘက် (၂) ဟာ စက်တင်ဘာ ၈ ရက် ကြာသပတေးနေ့က ကွယ်လွန်သွားခဲ့ပြီး သောကြာနေ့မှာ ကစားမယ့် ချန်ပီယံရှစ်ပွဲစဉ်နဲ့ အောက်တန်းလိဂ်ပွဲတွေကို ပွဲရွှေ့ဆိုင်းခဲ့ပါတယ်။
အာဆင်နယ်နဲ့ မန်ယူတို့ရဲ့ ယူရိုပါလိဂ်ပွဲစဉ်တွေနဲ့ ဝက်စ်ဟမ်းအသင်းရဲ့ ယူရိုကွန်းဖရန့်လိဂ်ပွဲစဉ်တွေကတော့ ဆက်ကစားခဲ့ပေမယ့် ဝမ်းနည်းခြင်းအထိမ်းအမှတ်အဖြစ် တစ်မိနစ်ငြိမ် သက်ပေးခဲ့ကြပါတယ်။
မြန်မာ့လက်ရွေးစင်ဘောလုံးအသင်းအနေနဲ့ အခုလထဲမှာ ဟောင်ကောင်လက်ရွေးစင်အသင်းနဲ့ ခြေစမ်းပွဲနှစ်ပွဲ ကစားသွားမှာဖြစ်တယ်လို့ မြန်မာနိုင်ငံဘောလုံးအဖွဲ့ချုပ်(MFF)ဆီကနေ သိရပါတယ်။ မြန်မာအသင်းကို ဟောင်ကောင်အသင်းက ခြေစမ်းပွဲကစားဖို့ ဖိတ်ကြားခဲ့တာဖြစ်ပြီး စက်တင်ဘာ ၂၁ရက်နဲ့ ၂၄ရက်တို့မှာ ယှဉ်ပြိုင်ကစားမှာဖြစ်တယ်လို့ သိရပါတယ်။ မြန်မာအသင်းအနေနဲ့ ဟောင်ကောင်အသင်းနဲ့ ပြီးခဲ့မေလက လေ့ကျင့်ရေးပွဲစဉ်အဖြစ် နောက်ဆုံးကစားခဲ့ပြီး ဂိုးမရှိသရေကျထားပါတယ်။ ဂျာမန်လူမျိုးနည်းပြ အန်တိုနီဟေး တာဝန်ယူနေတဲ့ မြန်မာ့လက်ရွေးစင်ဘောလုံးအသင်းဟာ လာမယ့်ဒီဇင်ဘာလမှာ ကျင်းပမယ့်၂၀၂၂ခုနှစ် အာဆီယံချန်ပီယံရှစ်ပြိုင်ပွဲ အုပ်စု(B)မှာကျရောက်နေပါတယ်။
ချန်ပီယံလိဂ် အဖွင့်ပွဲမှာ ချယ်လ်ဆီး က ဒိုင်နမိုဇာဂရက်ကို ရှုံးနိမ့်ခဲ့ပြီးတဲ့နောက်မှာ နည်းပြတူချယ်ကို ချယ်လ်ဆီးက ထုတ်ပယ်လိုက်ပါတယ်။ အသက် ၄၈ နှစ်အရွယ် ဒေါ့မွန်နဲ့ ပီအက်စ်ဂျီနည်းပြဟောင်း တူချယ်လ် က ချယ်လ်ဆီး ကို လပေါင်း ၂၀ ကိုင်တွယ်ပြီးနောက် ထုတ်ပယ်ခံရတာ ဖြစ်ပါတယ်။ ပိုင်ရှင်သစ် တော့ဒ်ဘိုလီ က နည်းပြသစ်တစ်ဦး မခန့်အပ်ခင်မှာ တူချယ်ရဲ့ နည်းပြ အဖွဲ့ကို အသင်းအား ကိုင်တွယ်ခိုင်းထားပါတယ်။ ချယ်ဆီးလ်အသင်းက နည်းပြသစ်တစ်ဉီး ခန့်အပ်ဖို့ အချိန်တန်ပြီဖြစ်ကြောင်း ထုတ်ပြန်ပြောကြားခဲ့ပါတယ်။ နည်းပြ တူချယ် က ချယ်လ်ဆီး ကို ချန်ပီယံလိဂ်ဖလား၊ စူပါဖလား နဲ့ ကလပ်ကမ္ဘာ့ဖလား ရရှိအောင်စွမ်းဆောင်ပေးခဲ့ပြီး အသင်းရဲ့ သမိုင်းမှာ တွင်ကျန်မှာဖြစ်ကြောင်း အသင်းရဲ့ ထုတ်ပြန်ချက်က ဆက်လက်ဖော်ပြထားပါတယ်။ -Ref:BBC
ဂရိကလပ် အိုလံပီယာကို့စ်ဟာ နောက်ခံလူသစ် မာဆယ်လိုကို အသင်းပရိသတ်တွေနဲ့ မိတ်ဆက်ပွဲ ကျင်းပခဲ့ပါတယ်။ အသက် ၃၄ နှစ်အရွယ် မာဆယ်လိုဟာ ရီးရဲလ်အသင်းနဲ့အတူ ၁၅ နှစ်ကြာ ကစားခဲ့သလို ချန်ပီယံဆုဖလား ၂၅ လုံး အထိ ရယူနိုင်ခဲ့တာပါ။ အဲဒီနောက် စပိန်ကလပ်ကနေ ထွက်ခွာခဲ့တဲ့ မာဆယ်လိုကို အိုလံပီယာကို့စ်အသင်းက အလွတ်ခေါ်ယူနိုင်ခဲ့ပြီး ၁ နှစ်စာချုပ်ချုပ်ဆိုခဲ့သလို ၁ နှစ် ထပ်တိုးခွင့်ပါ ထည့်သွင်းခဲ့တာ ဖြစ်ပါတယ်။
မန်ယူအသင်းပိုင်ရှင် ဂလေဇာမိသားစုသည် ပရိသတ်များ၏ ဆန့်ကျင်ဆန္ဒပြမှုများနှင့် အကြိမ်ကြိမ်ရင်ဆိုင်ခဲ့ရပြီး နောက် အသင်းအား ရောင်းထုတ်ရန် ပြင်ဆင်လာပြီး ပေါင် (၃.၇၅)ဘီလီယံဟု စျေးနှုန်းသတ်မှတ်လိုက်ကြောင်း သိရသည်။
ဂလေဇာမိသားစုသည် မန်ယူအသင်းကို ပေါင်(၅)ဘီလီယံဝန်းကျင် ရရှိမှသာ ပြန်လည်ရောင်းထုတ်ဖွယ်ရှိသည်ဟု ထင်ကြေးပေးမှုများ ထွက်ပေါ်ခဲ့သော်လည်း ယခုအခါ ပေါင် (၃.၇၅)ဘီလီယံရရှိခဲ့ပါက ရောင်းထုတ်ရန် စီစဉ်နေပြီဖြစ်ကြောင်း ဗြိတိန်မီဒီယာများစွာက ဖော်ပြခဲ့ကြသည်။
အမေရိကန်နိုင်ငံ၊ နယူးယောက်မြို့မှာကျင်းပနေတဲ့ ယူအက်စ်အိုးပင်းတင်းနစ်ပြိုင်ပွဲမှာ ဩစတြေးလျ တင်းနစ်သမား နစ်ကီရီရော့စ် က လက်ရှိ ယူအက်စ်အိုးပင်း ချန်ပီယံနဲ့ ကမ္ဘာ့နံပါတ်တစ် ရုရှားကစားသမား မက်ဗီဒက်ကို အနိုင်ယူပြီး ကွာတားဖိုင်နယ်ကို တက်လှမ်းခဲ့ပါတယ်။
ပွဲငယ်လေးပွဲနဲ့ အနိုင်ရခဲ့တဲ့ပွဲမှာ နစ်ကီရီရော့စ် ၂၇ နှစ်က သူ့ရဲ့တင်းနစ်စွမ်းရည်တွေနဲ့ အူကြောင်ကြောင် နိုင်တာတွေအားလုံးကိုပြသခဲ့ပြီး ၇-၆(၁၃-၁၁)၊၃-၆၊ ၆-၃ ၊ ၆-၂ နဲ့ အနိုင်ရရှိခဲ့ပါတယ်။
မန်စီးတီးတိုက်စစ်မှူးဟာလန်းဟာ ပရီးမီးယားလိဂ်ပွဲစဉ် ၅ ပွဲအပြီးမှာ ဂိုးအများဆုံးသွင်းနိုင်သူအဖြစ် စံချိန်တင်သစ် နိုင်ခဲ့ပါတယ်။ ဟာလန်းဟာ ဒီကနေ့ မနက် အစောပိုင်းက ကန်သွားတဲ့ နော်တင်ဟမ်ဖောရက်နဲ့ပွဲစဉ်မှာ ဟတ်ထရစ်သုံးဂိုး သွင်းယူခဲ့ပါတယ်။ ပြီးခဲ့တဲ့တစ်ပတ်က ခရစ္စတယ်ပဲလေ့နဲ့ပွဲမှာလည်း ဟတ်ထရစ်သုံးဂိုး သွင်းခဲ့တဲ့ဟာလန်းဟာ ပရီးမီးယားလိဂ်အဖွင့် ၅ ပွဲမှာတင် ၉ ဂိုးအထိသွင်းယူနိုင်ခဲ့တာပါ။ ဒီပမာဏဟာ မိုက်ကွင်းနဲ့ အဂွဲရိုးတို့စံချိန်တင်ထားတဲ့ ၈ ဂိုးစံချိန်ကို ချိုးဖျက်ပြီး ဟာလန်းက စံချိန်တင်သစ်နိုင်ခဲ့သလို ပရီးမီးယားလိဂ် ၂ ပွဲ ဆက်တိုက် ဟတ်ထရစ်သုံးဂိုးသွင်းယူနိုင်တဲ့ ၇ ဦးမြောက်ကစားသမားအဖြစ်လည်း မှတ်တမ်းတင်ခဲ့ပါတယ်။
