ယူကေက ယူကရိန်းကို တာဝေးပစ်ဒရုန်းတွေ ပို့ပေးမယ်လို့ ဆို
ယူကရိန်းကို ရာနဲ့ချီတဲ့ တာဝေးပစ် ဒရုန်းတွေ ပေးပို့မယ်လို့ ယူကေက အတည်ပြု ပြောကြားခဲ့ပြီးနောက်မှာ ယူကရိန်း သမ္မတက ဗြိတိန်ဝန်ကြီးချုပ် ရီရှီဆူးနက်ခ်ကို ကျေးဇူးတင်ကြောင်း ပြောကြားလိုက်ပါတယ်။
ယူကေမှာ ရောက်နေတဲ့ ယူကရိန်းသမ္မတ ဇလန်းစကီးကို မစ္စတာ ဆူးနက်ခ်က သူ့ရဲ့ ကျေးလက်က နေအိမ်ကို ဖိတ်ကြား ဧည့်ခံခဲ့ပါတယ်။
သူ ၀န်ကြီးချုပ်ရာထူးရခဲ့တဲ့ အောက်တိုဘာ နောက်ပိုင်း မစ္စတာဇလန်းစကီးဟာ သူ့အိမ်ကို ဖိတ်ကြားခံရတဲ့ ပထမဆုံး နိုင်ငံခြား ခေါင်းဆောင် ဖြစ်ပါတယ်။
ဗြိတိန်က ယူကရိန်းကို တာဝေးပစ် ခရုစ်ဒုံးကျည်တွေပေးပို့မယ်လို့ ကြေညာပြီး ရက်ပိုင်းအကြာမှာ တိုက်ခိုက်ရေး ဒရုန်းတွေနဲ့ လေကြောင်းရန်ကာကွယ်ရေး ဒုံးကျည်တွေ ထောက်ပံ့ပေးမယ်လို့ ကတိပေးလိုက်တာ ဖြစ်ပါတယ်။
ဒီကြေညာချက်နဲ့ ပတ်သက်လို့ ရုရှား အစိုးရက ပြင်းပြင်းထန်ထန် တုန့်ပြန်ခဲ့ပါတယ်။
ယူကေရဲ့ လုပ်ဆောင်ချက်တွေက ရုရှားတို့ တိုက်ခိုက်တာ ခံနေရတဲ့ ယူကရိန်းကို နောက်ထပ် ပျက်စီး ဆုံးရှုံးမှုတွေ ဖြစ်ဖို့ ဦးတည်သွားစေတယ်လို့ ရုရှားအစိုးရ ပြောခွင့်ရ ဒီမစ်ထရီပက်စကော့က ဆိုပါတယ်။ -Ref;BBC
