ပြည်ပရောက် မြန်မာနိုင်ငံသားများ၏ လုပ်ခ/လစာများ ပြည်တွင်းသို့ လွှဲပို့ခြင်းအတွက် အမေရိကန်တစ်ဒေါ်လာ အပေါ်တွင် ကျပ် ၃၀ အပိုဆောင်းငွေအဖြစ် ပံ့ပိုးမည်ဟု ဗဟိုဘဏ် ထုတ်ပြန်
ပြည်ပရောက်မြန်မာနိုင်ငံသားများ၏ နိုင်ငံခြားသုံးငွေဖြင့် ရရှိသောလုပ်ခ/လစာများအား လိုင်စင်ရဘဏ်များမှ တစ်ဆင့် လွှဲပို့ခြင်းအတွက် အမေရိကန်တစ်ဒေါ်လာ(ယင်းနှင့်ညီမျှသော နိုင်ငံခြားငွေ)အပေါ်တွင် ကျပ် ၃၀ နိုင်ငံတော်က အပိုဆောင်းငွေအဖြစ် ပံ့ပိုးသွားမည်ဖြစ်ကြောင် မြန်မာနိုင်ငံတော် ဗဟိုဘဏ်က အောက်တိုဘာ ၂၈ ရက် တွင် ထုတ်ပြန်ခဲ့ပါသည်။ နိုင်ငံတော်အတွက် နိုင်ငံခြားငွေများကို တစ်ဖက်တစ်လမ်းက ရှာဖွေပေးလျက်ရှိသည့် ပြည်ပရောက် မြန်မာနိုင်ငံသားများအား နိုင်ငံတော်က ချီးမြှောက်သောအားဖြင့် ပြည်ပရောက် မြန်မာနိုင်ငံသား များ၏ နိုင်ငံခြားသုံးငွေဖြင့်ရရှိသော လုပ်ခ/လစာငွေများကို ပြည်ပမှ ပြည်တွင်းသို့ နိုင်ငံခြားသုံးငွေ ရောင်းဝယ်ဖောက်ကားသည့် လုပ်ငန်းလိုင်စင်ရဘဏ်များမှတစ်ဆင့် လွှဲပို့ခြင်းအတွက် အမေရိကန် တစ်ဒေါ်လာ (ယင်းနှင့်ညီမျှသော နိုင်ငံခြားငွေ) အပေါ်တွင် ကျပ် ၃၀ အား နိုင်ငံတော်က အပိုဆောင်းငွေအဖြစ် ပံ့ပိုးသွားမည်ဖြစ်ကြောင်း ဗဟိုဘဏ်က ထုတ်ပြန်သည်။
ယင်းပံ့ပိုးငွေများကို ငွေထုတ်ယူသည့်နေ့တွင် ချက်ခြင်းထည့်သွင်းပေးသွားမည်ဖြစ်ပြီး ၂၀၂၂ ခုနှစ် နိုဝင်ဘာ ၁ ရက်မှ စ၍ အကျိုးသက်ရောက်မည်ဖြစ်ကြောင်း ဗဟိုဘဏ်က ထုတ်ပြန်သည်။