အလုပ်သမားဝန်ကြီးဌာန လက်အောက်ရှိ အလုပ်သမားညွှန်ကြားမှု ဦးစီးဌာနက ဖေဖေါ်ဝါရီ (၂၄) ရက် ရက်စွဲဖြင့် ထုတ်ပြန်ကြေညာလာခြင်း ဖြစ်သည်။
အဆိုပါ ထုတ်ပြန်ချက်တွင် ပြည်ပသို့ သွားရောက်အလုပ်လုပ်ကိုင်မည့် ကျွမ်းကျင်အလုပ်သမားများ၊ ခွင့်ပြန် အလုပ်သမားများ၊ အမြဲတမ်းနေထိုင်ခွင့်ပါမစ်ဖြင့် နေထိုင်လုပ် ကိုင်သူများမှ ပြည်ပအလုပ်အကိုင် လမ်းညွှန်သင်တန်းနှင့် OWIC ပြုလုပ်ခွင့်များ တင်ပြလာပါက ရုံးဖွင့်ရက် (၂) ရက်မှ (၃)ရက်အတွင်း အမြန်စိစစ် ခွင့်ပြုပေးနေကြောင်း ထည့်သွင်း ဖော်ပြထားသည်။
မန္တလေးတိုင်းဒေသကြီး ငါန်းဇွန်မြို့နယ် တောင်ရွာဘိုကျေးရွာနှင့် ညောင်လေးပင် ကျေးရွာအကြား ငါန်းဇွန်-ငါန်းမြာကားလမ်းရှိ သမန်းတောချောင်းကူးတံတား မီးရှို့ဖျက်ဆီး ခံခဲ့ရကြောင်း မြန်မာနိုင်ငံရဲတပ်ဖွဲ့က သတင်း ထုတ်ပြန်သည်။
နေပြည်တော်မှာကျင်းပမယ့် အခုနှစ်သင်္ကြန်ပွဲတော်မှာ လမ်းလျှောက်သင်္ကြန်ကို ထည့်သွင်းကျင်းပသွားမှာဖြစ် တယ်လို့ ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်းက ပြောပါတယ်။ နေပြည်တော်ရှိ ပြန်ကြားရေးဝန်ကြီးဌာန အစည်းအဝေးခန်းမမှာ ဖေဖော်ဝါရီ ၂၂ ရက် မနက်ပိုင်းကပြုလုပ်တဲ့ ၂၀၂၃ ခုနှစ် မြန်မာ့ ရိုးရာအတာသင်္ကြန်ပွဲတော်ကာလ နေပြည်တော်ရှိ ပြည်သူတွေ ပျော်ရွှင်စွာဆင်နွှဲနိုင်ရေးအတွက် လမ်းလျှောက် သင်္ကြန်ကျင်းပနိုင်ရေး အကြိုညှိနှိုင်းအစည်းအဝေးမှာ ပြောကြားခဲ့တာပါ။
တက္ကသိုလ်ဝင်စာမေးပွဲဖြေဆိုနေစဉ်ကာလအတွင်း ညနေ ၅ နာရီမှည ၁၀ နာရီအထိ စီးပွားရေးနှင့် စက်မှုလက်မှု လုပ်ငန်းများ လျှပ်စစ်ဓာတ်အားအသုံးမပြုရန် ရန်ကုန်လျှပ်စစ်ဓာတ်အားပေးရေးကော်ပိုရေးရှင်း (YESC) က အသိပေးကြေညာထားသည်။
၂၀၂၃ ခုနှစ်တက္ကသိုလ်၀င်စာမေးပွဲကို မတ်လ ၈ ရက်မှ ၁၈ ရက်အထိကျင်းပမည်ဖြစ်ပြီး မတ်လ ၁ ရက်မှ ၂၀ ရက်အထိ စာမေးပွဲဖြေဆိုမည့် ကျောင်းသား၊ ကျောင်းသူများညပိုင်းစာကြည့်နိုင်ရန် ဓာတ်အားထုတ်လုပ်မှု တိုးမြှင့်ရေးကို ဆောင်ရွက်လျက်ရှိကြောင်း အဆိုပါထုတ်ပြန်ချက်တွင်ဖော်ပြထားသည်။
ကျင်းပမည့်ရွေးကောက်ပွဲ၌ မဲစာရင်းမှန်ကန်မှုရှိစေရန် သန်းခေါင်စာရင်းကောက်ယူခြင်းနှင့်ပတ်သက်၍ နစက ဥက္ကဋ္ဌ၊ဗိုလ်ချုပ်မှူးကြီးမင်းအောင်လှိုင်က ဖေဖော်ဝါရီ ၂၃ ရက်မွန်းလွဲပိုင်းကကျင်းပသည့် နစကအစည်းအဝေး (၂/၂၀၂၃)တွင် အမှာစကားပြောကြားရာ၌ထည့်သွင်းပြောကြားခဲ့ခြင်းဖြစ်သည်။
မဲစာရင်းသည် လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာနမှဆောင်ရွက်သည့် မဲပေးပိုင်ခွင့်ရှိသူစာရင်း၊ ရွေးကောက်ပွဲကော်မရှင်မှဆောင်ရွက်သည့် မဲစာရင်းနှင့်အထွေထွေအုပ်ချုပ်ရေးဦးစီးဌာနမှ ဆောင်ရွက်သည့် မဲစာရင်းများ ရှိသည်ဟု ဆိုသည်။
“လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာနကကောက်ယူတဲ့ လူဦးရေသန်းခေါင်စာရင်းက အခြေခံစာရင်း ဖြစ်တာကြောင့် ပိုပြီးတိကျမှန်ကန်ပါတယ်”ဟု နစက ဥက္ကဋ္ဌကပြောသည်။
EPS စနစ်ဖြင့် ကိုရီးယားနိုင်ငံတွင် အလုပ်လုပ်ကိုင်ရန် မြန်မာအလုပ်သမား ၁၂၆ ဦး ဖေဖော်ဝါရီ ၂၁ ရက်က ထပ်မံရောက်ရှိခဲ့ကြောင်း တောင်ကိုရီးယားနိုင်ငံဆိုင်ရာ မြန်မာသံရုံး ဆိုးလ်မြို့က သတင်းထုတ်ပြန်ထားသည်။
မြန်မာအလုပ်သမား ၁၂၆ ဦးအား အစိုးရပြည်ပအလုပ်အကိုင်ရှာဖွေရေးအေဂျင်စီများမှတစ်ဆင့် EPS စနစ်ဖြင့် စေလွှတ်ခဲ့ခြင်းဖြစ်ကြောင်းသိရသည်။
နိုင်ငံကူးလက်မှတ်ပြုလုပ်သည့် ရုံးများအား ၂၀၂၂ ခုနှစ်၊ ဒီဇင်ဘာလမှ စတင်ကာ ယာယီရပ်နားထားခဲ့ရာမှ လာမည့် ဖေဖော်ဝါရီ (၂၄) ရက်တွင် ပြန်လည်၍ လျှောက်ထားနိုင်ပြီဖြစ်ကြောင်း သတင်းများထွက်ပေါ်လျက် ရှိသည်။
မြန်မာနိုင်ငံကူးလက်မှတ် ထုတ်ပေးရေးဌာနမှ ထုတ်ပြန်ဟန်တူသည့် သတင်းထုတ်ပြန်ချက်တစ်စောင် လူမှုကွန်ရက်တွင် ပြန့်နှံ့နေပြီး အဆိုပါ ထုတ်ပြန်ချက်တွင် လာမည့် (၂၄) ရက်၌ နိုင်ငံကူးလက်မှတ်များကို www.passport.gov. mm Website မှ တဆင့် Online Booking စနစ်သစ်ဖြင့် ပြန်လည် လျှောက်ထား နိုင်ပြီ ဖြစ်ကြောင်း သိရသည်။
စက်ရုံ၊ အလုပ်ရုံနှင့် အခြေခံဝန်ထမ်းများအတွက် ဆန်ကိုသက်သာသောစျေးနှုန်းဖြင့် ရောင်းချပေးသွားမည် ဖြစ်ကြောင်း မြန်မာနိုင်ငံဆန်စပါးအသင်းချုပ်ကထုတ်ပြန်ထားသည်။
လတ်တလော ဆန်စျေးမြင့်တက်မှုအခြေအနေကြောင့် အခြေခံအလုပ်သမား၊ ဝန်ထမ်းမိသားစုများ သက်သာစေရန် ရောင်းချပေးခြင်းဖြစ်ပြီး ရောင်းချရာတွင် ဧည့်မထ ၁၀ ရာခိုင်နှုန်းအဆင့် 10 kg(၅ ပြည်ခန့်) တစ်အိတ်ကို ၁၀၀၀၀ ကျပ်ဖြင့်ဝယ်ယူနိုင်ကြောင်း၊ ယင်းအပြင် လှိုင်သာယာ၊ ရွှေပြည်သာ၊ စက်ရုံများသို့ မှာယူသည့် အိတ်ရေအနည်း အများပေါ် မူတည်၍ အရောက်ပို့ခြင်း(သို့မဟုတ်) သတ်မှတ်နေရာတွင် လာရောက်ထုတ်ယူနိုင်ကြောင်း သိရသည်။
မြန်မာအမျိုးသားလေကြောင်းလိုင်းက မန္တလေး-ချင်းမိုင်-မန္တလေး ခရီးစဉ်ကို လာမယ့် မတ်၂ ရက်ကစတင်ပြီး အပတ်စဉ်ကြာသပတေးနေ့တိုင်း တိုက်ရိုက်ပျံသန်း ပြေးဆွဲပေးသွားမှာဖြစ်တယ်လို့ မြန်မာအမျိုးသားလေကြောင်း ကနေ သိရပါတယ်။
နိုင်ဂျီးရီးယားနိုင်ငံသားငါးဦးနှင့် မြန်မာနိုင်ငံသားခြောက်ဦးတို့ကို KBZ ဘဏ်အကောင့်ထဲမှ ငွေကျပ်သိန်းပေါင်း ၁၃၉၀ ခန့် လိမ်လည်ထုတ်ယူမှုဖြင့်ဖမ်းဆီးမိကြောင်း နစက က ထုတ်ပြန်ထားသည်။
ရန်ကုန်တိုင်း၊ သင်္ဃန်းကျွန်းမြို့နယ်တွင်နေထိုင်သည့် အမျိုးသမီးတစ်ဦး၏ KBZ ဘဏ်အကောင့်အတွင်းမှ ငွေကျပ် ၁၀၂၀ သိန်းနှင့် ကမာရွတ်မြို့နယ်တွင်နေထိုင်သူအမျိုးသမီးတစ်ဦး၏ KBZ ဘဏ်အကောင့်အတွင်းမှ ငွေကျပ် ၃၇၀ သိန်းကို အွန်လိုင်းအသုံးပြု၍ လိမ်လည်ခဲ့သည့်အတွက် သင်္ဃန်းကျွန်းမြို့နယ်နှင့် မရမ်းကုန်းမြို့နယ်ရဲစခန်း၌ အမှုဖွင့်တိုင်ကြားခဲ့ခြင်းဖြစ်ကြောင်း အဆိုပါထုတ်ပြန်ချက်အရသိရသည်။
