ရခိုင်ပြည်နယ် လွှတ်တော်ကိုယ်စားလှယ်အား ကန့်ကွက်လွှာတင်ထားသည့်အမှုတွင် ရွေးကောက်တင်မြှောက် ခံရခြင်း ပျက်ပြယ်ခြင်း မရှိကြောင်း ကော်မရှင်ဆုံးဖြတ်
ရခိုင်ပြည်နယ် သံတွဲမြို့နယ် မဲဆန္ဒနယ် အမှတ်(၁) ပြည်နယ် လွှတ်တော်ကိုယ်စားလှယ် ဦးဝင်းနိုင်အား ကန့်ကွက် လွှာတင်ထားသည့်အမှုတွင် လျှောက်ထားခံရသူ ဦးဝင်းနိုင်သည် ရွေးကောက်တင်မြှောက်ခံရခြင်းသည် ပျက်ပြယ် ခြင်းမရှိကြောင်း ကော်မရှင်က ဆုံးဖြတ်ချက်ချမှတ်ခဲ့ကြောင်း သိရသည်။
ပြည်နယ်လွှတ်တော် ကိုယ်စားလှယ်ဦးဝင်းနိုင် (အမျိုးသားဒီမိုကရေစီအဖွဲ့ချုပ်) အား ဦးမောင်မောင်ဖြူ (ရခိုင် အမျိုးသားပါတီ) က ကန့်ကွက်လွှာတင်ထားခြင်းဖြစ်ပြီး ရွေးကောက်ပွဲခုံအဖွဲ့ (၂) ဥက္ကဋ္ဌ ဦးစိုးရယ် ဦးဆောင်သည့် ခုံအဖွဲ့က စစ်ဆေးခဲ့ပြီး ဇွန် ၁၃ ရက်က အမိန့်ချမှတ်ခဲ့ခြင်းဖြစ်သည်။
ရွေးကောက်ပွဲခုံအဖွဲ့က လျှောက်ထားခံရသူဦးဝင်းနိုင်သည်သာ ခိုင်လုံမဲအများဆုံးဖြင့် ရခိုင်ပြည်နယ် သံတွဲမြို့နယ် မဲဆန္ဒနယ် အမှတ်(၁)၌ ရွေးကောက်တင်မြှောက် ခံရခြင်းသည် ရခိုင်ပြည်နယ် ရွေးကောက်ပွဲကော်မရှင်အဖွဲ့ခွဲ၏ ၂၀၁၅ ခုနှစ် နိုဝင်ဘာ ၁၂ ရက် ရက်စွဲပါ ကြေညာချက်အမှတ် ၄၂/၂၀၁၅ အရ အတည်ဖြစ်ကြောင်း ဆုံးဖြတ်ခဲ့ပြီး လျှောက်ထားသူတောင်းဆိုသည့် သက်သာခွင့်ရထိုက်မှုမရှိကြောင်း၊ ၂၀၁၅ ခုနှစ် နိုဝင်ဘာ ၈ ရက်က ရွေးကောက်တင်မြှောက်ခံရခြင်းသည် ပျက်ပြယ်ခြင်းမရှိကြောင်း ဆုံးဖြတ်ခဲ့ကြောင်း သိရသည်။
ထို့အပြင် ရွေးကောက်ပွဲကော်မရှင်က လျှောက်ထားသူ၏ကန့်ကွက်လျှောက်ထားမှုကို တရားစရိတ်နှင့်တကွ ပယ် သည့်အမိန့်ကိုချမှတ်ခဲ့ပြီး တရားစရိတ်ကျပ် နှစ်သိန်းကို လျှောက်ထားသူက လျှောက်ထားခံရသူသို့ ပေးစေရန် ဆုံးဖြတ်ခဲ့ကြောင်း သိရသည်။
“ကျွန်တော့်ကို အချက်ရှစ်ချက်နဲ့ ကန့်ကွက်ခဲ့တာပါ။ လေးချက်ကတော့ ကော်မရှင်နဲ့ဆိုင်တယ်။ ကျန်တဲ့ အချက် တွေကမရေရာဘူးပေါ့။ ကျွန်တော်လည်း ရှေ့နေ ရှေ့ရပ်တွေငှားစရာမလိုတဲ့အတွက်ကြောင့် ကျွန်တော် ကိုယ်တိုင် ပဲချေပဆောင်ရွက်ခဲ့ပါတယ်။ ဆုံးဖြတ်တာကတော့ ကော်မရှင်က ဆုံးဖြတ်တာလေ။ ကျွန်တော်က နိုင်ထားတဲ့သူ ဆိုတော့ တခြားတော့ပြောစရာမရှိပါဘူး”ဟု သံတွဲမြို့နယ် မဲဆန္ဒနယ် အမှတ်(၁) ပြည်နယ်လွှတ်တော် ကိုယ်စားလှယ် ဦးဝင်းနိုင်က ပြောကြားသည်။
Eleven Media Group
