မြန်မာနှင့် ဘားမား Burma ၁၉၈၉ ခုနှစ်က ကတ္တားခြားခဲ့ပါပြီ မြန်မာစစ်စစ်များနှင့် ယဉ်ကျေးသောနိုင်ငံများကတော့ မြန်မာ ဟုသာ သုံးကြပါသည် (ဆောင်းပါးကောက်နှုတ်ချက်)
၁၉၈၉ ခုနှစ်တွင် နိုင်ငံတော်ငြိမ်ဝပ်ပိပြားမှု တည်ဆောက်ရေးအဖွဲ့အစိုးရ (တပ်မတော်အစိုးရ) က အထူးကြေညာချက် ထုတ်၍လည်းကောင်း၊ နိုင်ငံတော်သတင်းထုတ်ပြန်ရေးအဖွဲ့၏ ပြည်တွင်း ပြည်ပ သတင်းစာရှင်းလင်းပွဲမှတစ်ဆင့် လည်း ကောင်း၊ မြန်မာကို မြန်မာဟုသုံးနှုန်းပါ။ မြန်မာပြည်ထောင်စု Unin Of Myanmar ကို Union Of Burma ဟုမသုံးကြပါရန် မြန်မာသိ၊ ကမ္ဘာသိကြေညာခဲ့သည်။
အဖွဲ့ဝင်နိုင်ငံ (၁၉၃) နိုင်ငံပါဝင်သည့် ကမ္ဘာ့ကုလသမဂ္ဂ အဖွဲ့ချုပ်သို့ တရားဝင်စာပို့မေတ္တာရပ်ခံသည်။ ကုလသမဂ္ဂ ကလည်း အလေးတမူဂရုတစိုက်ပင် Burma ဟုမသုံးကြဘဲ Myanmar ဟုသာသုံးရန်ထုတ်ပြန်ကြေညာသည်။ ကုလသမဂ္ဂ အထွေထွေညီလာခံကြီးတွင် အဖွဲ့ဝင်နိုင်ငံများ၏ နိုင်ငံအမည် အင်္ဂလိပ်အက္ခရာအစဉ်အတိုင်း ထိုင်ကြရသည်။ ယခင်က Burmaဟုသုံး စဉ် A နိုင်ငံရှေ့ဆုံးမှရေးသော နိုင်ငံများကုန်၍ ဘီစာလုံးဖြင့်စသောနိုင်ငံများ ရှေ့တန်း သို့မဟုတ် ဒုတိယ တန်းလောက်တွင် မြန်မာကိုယ်စားလှယ်များထိုင်ခဲ့ရသည်။ ၁၉၈၉ ခုနှစ်မှစ၍ မြန်မာသည် M အက္ခရာစဉ်အတိုင်း အလယ် ပိုင်း နောက်နားခပ်ကျကျနေရာရောက်သွားသည်။ ယဉ်ကျေးသော လူကြီးလူကောင်းနိုင်ငံများက မြန်မာဟုပြောင်းသုံးလာ သည်။
ယခင်ကဆိုင်းယမ်း SIAM နိုင်ငံဟုခေါ် သောယိုးဒယားကို နောက်ပိုင်း Thailand ထိုင်းလင်း၊ ထိုင်းဟု ပြောင်းရာ မြန်မာ အပါအဝင် ကမ္ဘာက ယဉ်ကျေးသူများပီပီ ထိုင်းဟုသုံးသည်။ ရူမေးနီးယား Rumania ကို Romania ရိုမန်းနီးယားဟု ပြောင်းတော့လည်း ရိုမန်းနီးယားဟု သုံးကြသည်။ မြန်မာကို အနောက်က အမေရိကန်မှ အိုဘားမား အပါအဝင်များက၊ စာနယ်ဇင်းများက၊ ဥရောပနိုင်ငံတချို့က Burma ဟု သုံးနှုန်းသွေးခွဲတုန်းဖြစ်သည်။ ဒေါ်အောင်ဆန်းစုကြည်ကလည်း နှုတ်ကျိုးနှုတ်ကျင့်ပါ၍ယောင်မှား၍ Burma ဟု သုံးနှုန်းနေသေးကြောင်း ပြောသံ ကြားရသည်။
၁၉၈၉ ခုနှစ်တွင် ကမ္ဘာသိမြန်မာဟု နာမည်ပြောင်းထားသည်မှ ယခုဆိုလျှင် ၂၇ နှစ်ပင် ရှိနေပြီ။ နှုတ်ကျိုး အကျင့်ပါ ယောင်ယမ်း၍ ဘားမားမလုပ်သင့်ကြပါ။ နယ်ချဲ့များက မြန်မာနိုင်ငံပြိုကွဲမှ ၎င်းတို့ လက်ပြန်ရောက်မည်ဖြစ်၍ ဘားမား ဘားမား လုပ်နေကြပေဦးမည်။ ဘားရက်အိုဘားမားထံ မြန်မာထုံးစံ နာမည်ပြောင်း လက်ဖက်တစ်ထုပ်ပို့၍လည်း ထူးမည် မထင်တော့ပါ။ အိုဘားမားနှင့် လက်ဝေခံများက ဘားမားချင် ဘားမားပါစေ၊ မြန်မာစစ်စစ်များနှင့် ယဉ်ကျေးသောနိုင်ငံ များက မြန်မာဟုသုံးလျှင် ကျေနပ်ပါပြီခင်ဗျား။
၂၀၁၆ ခုနှစ် မေလ (၁၈) ရက်နေ့ထုတ် ပြည်ထောင်စုနေ့စဉ်သတင်းစာပါ တက္ကသိုလ်မြတ်သူ၏ “မြန်မာနှင့် ဘားမား Burma ၁၉၈၉ ခုနှစ်က ကတ္တားခြားခဲ့ပါပြီ မြန်မာစစ်စစ်များနှင့် ယဉ်ကျေးသောနိုင်ငံများကတော့ မြန်မာဟုသာ သုံးကြပါသည်” ဆောင်းပါးမှ ကောက်နှုတ်ဖော်ပြပါသည်။
