ကုလသမဂ္ဂ၏ လူ့အခွင့်အရေး စုံစမ်းရေးအရာရှိ မိမိတို့နိုင်ငံသို့ လာစရာမလိုကြောင်း ဖိလစ်ပိုင်သမ္မတ ဘွင်းဘွင်းရှင်းရှင်း ထုတ်ပြော
ဖိလစ်ပိုင်၏ မူးယစ်တိုက်ဖျက်ရေးလုပ်ငန်းစဉ်များအတွင်း သတ်ဖြတ်နေမှုများကို စုံစမ်းစစ်ဆေးနိုင်ရန်အတွက် ယင်းနိုင်ငံသို့ သွားရောက်နိုင်မည်ဟု မျှော်လင့် ထားသော်လည်း သမ္မတ ဒူတာတေးကမူ မိမိလာမည်ကို မကြိုက်သည့်အကြောင်း တဲ့တိုးအိုးပေါက် အကြောင်းပြန်ထားခဲ့သည်ဟု ကုလလူ့အခွင့်အရေး စုံစမ်းရေး အရာရှိက ပြောသည်။
နိုင်ငံတွင် အစိုးရသစ်၏ မူးယစ်နှိမ်နင်းရေးလုပ်ငန်းစဉ်အတွင်း သံသယရှိ တရားခံ ၁,၅၀၀ ကျော်ကို သုတ်သင် ရှင်းလင်းထားပြီးဖြစ်ကြောင်း ဖိလစ်ပိုင်ရဲချုပ်က ပြောကြားချက်အရ သိရသည်။
ဖိလစ်ပိုင်အစိုးရ၏ ယခုလုပ်ရပ်မှာ နိုင်ငံတကာဥပဒေများအရ ပြစ်မှုမြောက်ကြောင်း ကုလသမဂ္ဂကဘက်က စွပ်စွဲ ထားခဲ့သည်။ သို့သော် ယင်းစွဲချက်များ မမှန်ကန်ကြောင်းနှင့် မယုံလျင် နိုင်ငံသို့ ကိုယ်တိုင်လာရောက်စုံစမ်းနိုင် ကြောင်း ဖိလစ်ပိုင်ဥပဒေကောင်စီအကြီးအကဲ ဆယ်လ်ဗာဒို ပါနယ်လိုက အစောပိုင်းက မိမိထံသို့ အကြောင်းကြား ခဲ့ကြောင်း ကုလအရာရှိက ပြောသည်။
“ ဥပဒေကောင်စီအကြီးအကဲက ကျွန်မကိုလာဖို့ ဖိတ်ပါတယ်၊ ဒီလိုဆိုရင်တော့ သူတို့နိုင်ငံကိုသွားပြီး အစိုးရနဲ့ အခြား သက်ဆိုင်ရာတွေနဲ့ စေ့စပ်ညှိနှိုင်းပြီး ပြီးခဲ့တဲ့ကာလပိုင်းက မူးယစ်မှုနဲ့ လူတွေသေဆုံးခဲ့တဲ့ဖြစ်စဉ်တွေကို စုံစမ်းနိုင်မယ် လို့ ယူဆခဲ့တာပါ” ဟု ကုလအရာရှိ အေဂျင်စ် ကာလာမက်ဒ်က ပြောသည်။
သို့သော် ဥပဒေကောင်စီအကြီးအကဲ၏ ပြောကြားချက်များနှင့်ပတ်သက်၍ ကုလအရာရှိဘက်မှ တလွဲသဘောပေါက် ခဲ့ခြင်းသာဖြစ်ကြောင်း နှင့် မိမိတို့အစိုးရအနေဖြင့် မည်သူ့ကိုမှ ဖိတ်ကြားထားခြင်းမရှိကြောင်း သမ္မတဒူတာတေး၏ ပြောခွင့်ရပုဂ္ဂိုလ် အာနက်စ်တို အေဘယ်လာက သြဂုတ် ၂၀ ရက်တွင် အတည်ပြုသွားသည်။
“ ဖိလစ်ပိုင်အစိုးရအနေနဲ့ ဘယ်သူ့ကိုမှ နိုင်ငံကို လာပါလို့ တရားဝင်ဖိတ်ထားခြင်းမရှိပါဘူး၊ နောက်ပြီး ကုလကိုလည်း ကျွန်တော်တို့ရဲ့ နိုင်ငံကိစ္စတွေကို လာကြည့်ပါလို့ ပြောထားတာမျိုး မရှိပါဘူး” ဟု ၎င်းက ထုတ်ပြန်ပြောကြား သွားသည်။
# Mizzima
