ထိပ်သီးဆွေးနွေးပွဲက အချက်သုံးချက် အကျိုးဖြစ်စေနိုင်ဟု ပအိုဝ်းအဖွဲ့များ ထုတ်ပြန်
မြန်မာနိုင်ငံသမိုင်းတွင် မပေါ်ပေါက်ဖူးသေးသည့် နိုင်ငံ့ခေါင်းဆောင်များ ထိပ်သီးဆွေးနွေးပွဲသည် ငြိမ်းချမ်းရေး လုပ်ငန်းစဉ်အပေါ် စိတ်ပျက်အားငယ်နေသော ပြည်သူလူထု တစ်ရပ်လုံးနှင့် ပြည်ပအင်အားစုများ၏ ငြိမ်းချမ်းရေး အပေါ် မျှော်လင့်ချက် ပိုမိုမြင့်မားလာ စေနိုင်သောကြောင့် ထိပ်သီးဆွေးနွေးပွဲ အောင်မြင်ပါစေဟု ပအိုဝ်း လက်နက်ကိုင်နှင့် နိုင်ငံရေးပါတီများ၊ လူမှုအဖွဲ့အစည်း များကစုပေါင်း၍ သဘောထားထုတ်ပြန်ကြေညာသည်။
ပအိုဝ်းအမျိုးသားအဖွဲ့ချုပ် (PNO)၊ ပအိုဝ်းအမျိုးသား လွတ်မြောက်ရေး အဖွဲ့ချုပ် (PNLO)အပါအ၀င် ပအိုဝ်းစာပေ ယဉ်ကျေးမှု အဖွဲ့နှင့် အရပ်ဘက်အဖွဲ့အစည်းများစုပေါင်း၍ အောက်တိုဘာ ၁၅ ရက်တွင် ကျရောက်မည့် NCA လက်မှတ်ရေးထိုးခြင်း (၃)နှစ်ပြည့် အခမ်းအနားနှင့် ထိပ်သီးခေါင်းဆောင်များ တွေ့ဆုံပွဲကျင်းပခြင်းကို ကြိုဆို ထောက်ခံကြောင်း သဘောထား ကြေညာ ချက်ကို အောက်တိုဘာ ၇ ရက် တွင် ထုတ်ပြန်သည်။
လက်ရှိ မြန်မာနိုင်ငံအပေါ် နိုင်ငံတကာမှလည်းကောင်း၊ ဒေသတွင်းမှလည်းကောင်း ၀င် ရောက်စွက်ဖက်မှုများ၊ ဖိအားများ ပြင်းထန်နေသည့်အချိန်တွင် အစိုးရ၊ လွှတ်တော်၊ တပ်မတော် ထိပ်သီးခေါင်းဆောင် ၁၀ ဦးနှင့် တိုင်းရင်းသား လက်နက်ကိုင်ထိပ်သီးခေါင်းဆောင် ၁၀ ဦး တွေ့ဆုံ ဆွေးနွေးပွဲ ကျင်းပခြင်းဖြင့် အနည်းဆုံး အချက်သုံးချက် အကျိုး ဖြစ်စေမည်ဟု ဆိုသည်။
ပြည်တွင်းအင်အားစုများအားလုံး ညီညွတ်စွာဖြင့် ငြိမ်းချမ်းရေးအပါအ၀င် နိုင်ငံ့ရေးရာများကို ဦးစားပေးညှိနှိုင်း ဆောင်ရွက် နေကြောင်း ပေါ်လွင်စေသည့်အ ပြင် စိတ်ဝမ်းကွဲပြားနေသည်ဟူ သော စွပ်စွဲချက်ကို ချေပနိုင်ခြင်း၊ ငြိမ်းချမ်းရေး လုပ်ငန်းစဉ်အပေါ် မျှော်လင့်ချက် ပိုမိုမြင့်မားလာစေနိုင်ခြင်း၊ ငြိမ်းချမ်းရေးလုပ်ငန်းစဉ်တွင် ထဲထဲ ၀င်ဝင် မပါလာနိုင်သေးသော တိုင်းရင်းသား လက်နက်ကိုင်အဖွဲ့များအနေဖြင့် ဖြစ်ပေါ်တိုးတက်မှုကို အကဲဖြတ်၍ ဆုံးဖြတ်ချက်များ မြန်ဆန်စွာ ချမှတ်လာနိုင်မည်ဟု မျှော်မှန်းနိုင်ခြင်းတို့ ဖြစ်သည်ဟု ဖော်ပြထား သည်။
နိုင်ငံတော်၏ အတိုင်ပင်ခံ ပုဂ္ဂိုလ် ဦးဆောင်သော ဒီမိုကရေစီအစိုးရ၊ တပ်မတော်ကာကွယ်ရေးဦးစီးချုပ် ဦးဆောင် သော တပ်မတော်နှင့် တိုင်းရင်းသားလက်နက်ကိုင်အင်အားစုများအကြား ပထမဆုံးအကြိမ် ထိပ်သီးနိုင်ငံရေး စားပွဲဝိုင်း တွေ့ဆုံဆွေးနွေးပွဲဟု ဆိုနိုင်ကြောင်း ထုတ်ပြန်ချက်၌ ဖော်ပြထားသည်။
