တရားမဝင်ချေးငွေလုပ်ငန်းများ လုပ်ကိုင်လျှင်အရေးယူမည်
အွန်လိုင်းအသုံးပြုပြီး လောင်းကစားပြုလုပ်တာ၊ ကံစမ်းမဲဖောက်တာနဲ့ တရားမဝင်ချေးငွေလုပ်ငန်းတွေမှာ ပါဝင် လုပ်ကိုင်တာပြုလုပ်ရင် တည်ဆဲဥပဒေအရ အရေးယူခံရမယ်လို့ မြန်မာနိုင်ငံရဲတပ်ဖွဲ့က မတ် ၂ ရက် ရက်စွဲနဲ့ အသိပေးထုတ်ပြန်ပါတယ်။
နည်းပညာတွေ ဖွံ့ဖြိုးတိုးတက်လာတာနဲ့အမျှ အွန်လိုင်းကတစ်ဆင့် လိမ်လည်မှုကျူးလွန်တာ၊ လောင်းကစားတာ ကိုဗန်းပြပြီး ငွေကြေးလိမ်လည်မှု ကျူးလွန်တာတွေကြောင့် ပြည်သူတွေအနေနဲ့ ငွေကြေးနစ်နာ ဆုံးရှုံးမှုတွေ ဖြစ်ပေါ်နေတယ်လို့ ဆိုပါတယ်။
အဲဒီလို အွန်လိုင်းအသုံးပြုပြီး လောင်းကစားလုပ်ငန်း၊ ကဲစမ်းမဲဖောက်လုပ်ငန်း၊ တရားမဝင် ချေးငွေလုပ်ငန်း လုပ်ကိုင်သူတွေကို မြန်မာနိုင်ငံ ရဲတပ်ဖွဲ့က စုံစမ်းဖော်ထုတ်ခဲ့ရာ တရားမဝင် ချေးငွေလုပ်ငန်း လုပ်ကိုင်သူ ၇၁ ယောက်ကို ဖော်ထုတ် ဖမ်းဆီး အရေးယူထားပြီး ဖြစ်တယ်လို့လည်း ထုတ်ပြန်ချက်အရ သိရပါတယ်။
ပြစ်မှုကျူးလွန်သူတွေအနေနဲ့ နိုင်ငံသား စိစစ်ရေးကတ် တစ်ကတ်ကို တစ်သောင်းကျပ်နဲ့ ငှားရမ်းပြီး အွန်လိုင်း လောင်းကစား လုပ်ငန်းတွေ၊ အွန်လိုင်းလိမ်လည်မှုတွေ တရားမဝင် ချေးငွေလုပ်ငန်းတွေမှာ အသုံးပြုဖို့ ဘဏ်အကောင့်တွေ ဖွင့်လှစ်ပြီး လုပ်ကိုင်ကြောင်း တွေ့ရှိရတဲ့အတွက် နိုင်ငံသား စိစစ်ရေးကတ် ငှားရမ်းသူတွေ အနေနဲ့လည်း ဥပဒေအရ အရေးယူခံရနိုင်တယ်လို့ ထုတ်ပြန်ချက်မှာ ဖော်ပြထားပါတယ်။
အဲဒါကြောင့် အွန်လိုင်းအသုံးပြုပြီး လောင်းကစားတာ၊ ကံစမ်းမဲဖောက်တာ၊ ချေးငွေလုပ်ငန်းတွေမှာ ပါဝင်လုပ် ကိုင်တာတွေဆိုရင် တည်ဆဲဥပဒေအရ အရေးယူခံရမယ့်အပြင် ပြစ်မှုကျူးလွန်ရာကရရှိတဲ့ ငွေကြေးနဲ့ အကျိုး အမြတ်တွေကိုလည်း ငွေကြေးခဝါချမှု တိုက်ဖျက်ရေး ဥပဒေအရ စိစစ်ပြီး အရေးယူခံရမှာဖြစ်တဲ့အတွက် ပါဝင် လုပ်ကိုင်တာ မပြုလုပ်ဖို့ကိုလည်း အသိပေး ထုတ်ပြန်ထားပါတယ်။
