ပြီးခဲ့သည့် ၂၀၂၁-၂၂ ရာသီ လာလီဂါအကောင်းဆုံးကစားသမားဆု၊ ပီချီချီဆုနှင့် ပရိသတ်ရွေးချယ်သည့် အကောင်းဆုံးဆုများကို ရီးယဲလ်တိုက်စစ်မှူး ဘန်ဇီမာရရှိ
ရီးယဲလ်မက်ဒရစ်ဝါရင့်တိုက်စစ်မှူး ဘန်ဇီမာသည် စက်တင်ဘာ (၂၈) ရက်က ကျင်းပသည့် Marca Awards Gala ဆုပေးပွဲတွင် ၂၀၂၁-၂၂ ရာသီ လာလီဂါအကောင်းဆုံးကစားသမားဆုဖြစ်သည့် ဒီစတီဖာနိုဆု၊ ဂိုးသွင်းဘုရင်ဆု ဖြစ်သည့် ပီချီချီဆုနှင့် ပရိသတ်များရွေးချယ်သည့် အကောင်းဆုံးဆုတို့ကို ရရှိခဲ့ကြောင်း သိရသည်။
အသက် (၃၄) နှစ်အရွယ် ပြင်သစ်ဝါရင့်တိုက်စစ်မှူး ဘန်ဇီမာသည် ပြီးခဲ့သည့် ၂၀၂၁-၂၂ ရာသီ ရီးယဲလ်အသင်း လာလီဂါချန်ပီယံဆုနှင့် ချန်ပီယံလိဂ်ဖလားရယူရာတွင် အဓိကခြေစွမ်းပြခဲ့သူဖြစ်ပြီး အသင်းအတွက် ပြိုင်ပွဲစုံ (၄၆) ပွဲတွင် (၄၄) ဂိုး သွင်းယူခဲ့သည်။ ထို့ကြောင့် ၎င်းသည် UEFA အကောင်းဆုံး ကစားသမားဆုကို ရရှိထားသလို၊ Ballon d’Or ဆု ရရှိရန်လည်း ရေပန်းအစားဆုံးဖြစ်နေသည်။
ယခုအခါ ဘန်ဇီမာအနေဖြင့် Marca သတင်းစာမှချီးမြှင့်သည့် ဒီစတီဖာနိုဆုနှင့် ပြီးခဲ့သည့်ရာသီက လာလီဂါတွင် သွင်းဂိုး (၂၇) ဂိုးဖြင့် ဂိုးသွင်းဘုရင် ဖြစ်ခဲ့သည့်အတွက် ပီချီချီဆုများကို ရရှိခဲ့သလို၊ ပရိသတ်များရွေးချယ်သည့် Hyundai MVP ဆုကိုပါ ရရှိခဲ့သည်။
ဘန်ဇီမာက “ကျွန်တော့်အတွက် အရမ်းအရေးပါတဲ့ဆုတွေ ဖြစ်ပါတယ်။ ဒီဆုတွေ ရရှိခဲ့တဲ့အတွက် အသင်းဖော်တွေကို ကျေးဇူးတင်ပါတယ်” ဟု ပြောကြားခဲ့သည်။
Elevensport
