စူဇူကီးကားစက်ရုံသစ် မြန်မာပြည်မှာ ဖွင့်မည်
ဂျပန်နိုင်ငံ အခြေစိုက် Suzuki ကားကုမ္ပဏီက မြန်မာနိုင်ငံမှာ နောက်ထပ် ကားစက်ရုံ အသစ်တခု ဖွင့်လှစ်ဖို့ရှိနေကြောင်း မတ်လ ၂၃ ရက်နေ့က ထုတ်ပြန်ကြေညာခဲ့ပါတယ်။ ကုမ္ပဏီအနေနဲ့ ကား ပစ္စည်းတင်ဆင်ဖို့ ဂဟေဆော်ပြီးဆက်တာ၊ အရောင်မှုတ်ဖို့နဲ့ ကားတစီးလုံးအပြီးအစီးတပ်ဆင်နိုင်တဲ့ စက်ရုံအသစ်မျိုး တည်ဆောက်မှာ ဖြစ်တယ်လို့ Suzuki သီလ၀ါ မော်တော်ကားကုမ္ပဏီရဲ့ ထုတ်ပြန်ချက်မှာ ဖေါ်ပြထားပါတယ်။
၂၀၂၁ခုနှစ် စက်တင်ဘာလမှာ စက်ရုံအသစ်ကို အပြီးအစီးတည်ဆောက်ပြီး စတင်လည်ပတ်ဖို့ ကုမ္ပဏီက ရည်မှန်းထားပါတယ်။ စက်ရုံကို သီလ၀ါ အထူးစက်မှုဇုံမှာ တည်ဆောက်မှာဖြစ်ပြီး တနှစ်ကို ၄၀,၀၀၀ units အထိ ထုတ်လုပ်နိုင်စွမ်း ရှိတယ်လို့ ဆိုပါတယ်။
Suzuki ကုမ္ပဏီအနေနဲ့ မြန်မာနိုင်ငံမှာ ၁၉၉၈ခုနှစ်ကတည်း စတင်ရင်းနှီးမြှုပ်နှံခဲ့ပြီး ၁၉၉၉ခုနှစ်မှာ ပြည်တွင်းထုတ် မော်တော်ကားနဲ့ မော်တော်ဆိုက်ကယ် လုပ်ငန်းနဲ့ ဖက်စပ်လုပ်ကိုင်ခဲ့ပါတယ်။ လက်ရှိ မြန်မာနိုင်ငံမှာရှိနေတဲ့ ကားစက်ရုံနှစ်ရုံကနေလည်း Suzuki ကားအမျိုးအစားလေးမျိုးဖြစ်တဲ့ Carry, Ciaz, Ertiga နဲ့ Swift တို့ကို ထုတ်လုပ်နေတယ်လို့ ဆိုပါတယ်။VOA
