စလင်းမြို့နယ် ပြည်ခိုင်ဖြိုးပါတီ ကော်မတီဝင်များ ကျေးလက်ပါတီဝင်များ ပြည်သူများနှင့် သွားရောက်တွေ့ဆုံ
စလင်း မေ ၁၉
မကွေးတိုင်းဒေသကြီး စလင်းမြို့နယ် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီမှ မြို့နယ်ပါတီအတွင်းရေးမှူး ခေါင်းဆောင်သော မြို့နယ်ပါတီ ကော်မတီဝင်များသည် ကျေးလက်ပါတီဝင်များနှင့် ပြည်သူများကို တွေ့ဆုံရန် ယမန်နေ့ နံနက် ၁ဝ နာရီခွဲက မြို့နယ်ပါတီရုံးမှ ဆိုင်ကယ်များ စီးနင်းကာ ထွက်ခွာခဲ့ကြသည်။
ငါးဇင်းရိုင်း စက်လှေဆိပ်မှတစ်ဆင့် စက်လှေများပေါ်သို့ ဆိုင်ကယ်များပါ တင်ဆောင်ထွက်ခွာပြီး ဧရာဝတီမြစ် အတိုင်း စက်လှေစီးကာ သောင်ဆိပ်တွင် စက်လှေရပ်ပြီး မြစ်လယ်ကျွန်းရှိတောကြီးကျေးရွာ အုပ်စုတောကြီးရွာသို့ မွန်းတည့် ၁၂ နာရီ တွင်ရောက်ရှိသည်။ စက်လှေတစ်တန်နှင့် ဆိုင်ကယ်များကို ဆက်လက်စီးလာရာ ကျွန်းတောကြီးရွာသို့ မွန်းလွဲ ၁၂ နာရီခွဲ တွင် ရောက်ရှိသည်။
ကျွန်းတောကြီးရွာ ရပ်ကျေးပါတီဥက္ကဋ္ဌ ဦးပြုံးချို၊ ရွာခွဲပါတီဥက္ကဋ္ဌ ဦးခင်မောင်စန်းနှင့် ကျေးရွာပါတီဝင်များ စိတ်ပါဝင်စားသည့် ကျေးလက်ပြည်သူအင်အား ၅ဝ ကျော်တို့က ဦးပြုံးချို၏ နေအိမ်အောက်ထပ်နှင့် နွားတင်းကုတ် များတွင် အသင့်နေရာယူ စောင့်နေကြသည်။ ရှေးဦးစွာ စလင်းမြို့နယ် ပြည်ခိုင်ဖြိုးပါတီ အတွင်းရေးမှူး ဦးဇော်နိုင်က ပြည်ခိုင်ဖြိုးပါတီ၏ မူဝါဒများ၊ လက်ရှိဆောင်ရွက်နေမှုများနှင့် ရှေ့လုပ်ငန်းစဉ်များကို ချပြဆွေးနွေး ခဲ့ကြသည်။ ဆက်လက်၍ မြို့နယ်ပါတီ ကော်မတီဝင် ဦးဝင်းခိုင်က ပုဒ်မ ၅၉ (စ) ကို ကာကွယ်ရေး ပုဒ်မ-၂၆၁ ကို ဥပဒေနှင့်အညီ ပြင်ဆင်ရေး ကိစ္စရပ်များကို ဆွေးနွေးခဲ့ကြသည်။
ဆွေးနွေးပွဲသို့ တက်ရောက်လာသော ကျေးလက်ပါတီဝင်များနှင့် ကျေးလက်နေ ပြည်သူများက ပြန်လည်ဆွေးနွေး ရာ မိမိတို့ကျေးရွာသည် ဧရာဝတီမြစ်လယ်ကျွန်းများပေါ်တွင် နေရခြင်းကြောင့် နှစ်စဉ်ဧရာဝတီမြစ်ရေတက်၍ ရေပြန်အကျတွင် မြေနုကျွန်းပြဿနာများ နှစ်စဉ်ဖြစ်ပေါ်ရကြောင်း၊ ဤကိစ္စကို ပြည်ခိုင်ဖြိုးပါတီက သမာသမတ် ကျစွာ ဖြေရှင်းပေးရန် အကူအညီလိုကြောင်း၊ လက်ရှိဘာသာသာသနာ ညှိုးနွမ်းနေသည်ကို မိမိတို့ ကျေးရွာသူ ကျေးရွာသားများ သိရှိရ၍ စိတ်မကောင်းပါကြောင်း၊ ပြည်ခိုင်ဖြိုးပါတီမှ ၂ဝ၂ဝ တွင် အောင်မြင်မှုကို ပြည်သူနှင့် အတူ ရယူ၍ ဘာသာသာသနာကို နေရောင်လရောင်ပမာ ထွန်းလင်းတောက်ပအောင် ဆောင်ရွက်ပေးပါ။ မိမိတို့လည်း အားပေးကူညီ သွားမည်ဖြစ်ကြောင်း ပြန်လည်ဆွေးနွေး ခဲ့ကြသည်။
ယင်းနောက် ပါတီအတွင်းရေးမှူး ဦးဇော်နိုင်က ပြည်သူများဘဝကို အလေးထားစာနာပါကြောင်း၊ ဤကိစ္စများမှာ ပြည်သူအားလုံး နားလည်သိရှိစေလိုသည့်အတွက် မိမိတို့မြို့နယ်ပါတီ ကော်မတီဝင်များ ရာသီဥတုပူပြင်းနေသည့် ကြားက လာရောက်ကြခြင်း ဖြစ်ကြောင်းနှင့် ပြည်သူအများ လိုလားတောင့်တ နေသည်များကို မိမိတို့ပါတီ အနေဖြင့် ဦးလည်မသုန် ဆောင်ရွက်ပေးသွားမည် ဖြစ်ကြောင်းပြောကြားသည်။ ထို့နောက် ဆွေးနွေးပွဲသို့ တက်ရောက်လာသူများနှင့် ရင်းနှီးစွာပြောဆို၍ ဆွေးနွေးပွဲကို အောင်မြင်စွာ ရုပ်သိမ်းလိုက်ကြောင်း သိရသည်။
စစ်ကြည်(စလင်း)
