ထွန်းထွန်းမင်းနှင့် လက်ရှိ မြန်မာပြည်ချန်ပီယံ ဒေ့ဗ်တို့ ဒီဇင်ဘာ ၁၆ ရက်တွင် ထိုးသတ်မည်
မြန်မာပြည် ချန်ပီယံဟောင်း လက်ဝှေ့ကျော် ထွန်းထွန်းမင်းနှင့် လက်ရှိ မြန်မာပြည်ချန်ပီယံ ဒေ့ဗ်လက်ဒပ်(ဒေဝ)တို့ ယှဉ်ပြိုင်ထိုးသတ်ကြမည့် မြန်မာပြည် အလွတ်တန်းချန်ပီယံလုပွဲကြီးကို ဒီဇင်ဘာ ၁၆ ရက်တွင် ရန်ကုန်မြို့ သိမ်ဖြူလက်ဝှေ့အားကစားရုံတွင် ကျင်းပပြုလုပ်မည်ဖြစ်ကြောင်း သိရပါတယ်။
အဆိုပါ Air KBZ Grand Final မြန်မာပြည်ချန်ပီယံလုပွဲကြီးကို ဒီဇင်ဘာ ၁၆ ရက် မွန်းလွဲ ၂ နာရီမှာ ရန်ကုန်မြို့ သိမ်ဖြူ လက်ဝှေ့အားကစားရုံမှာ ကျင်းပမှာဖြစ်ပြီး မကျေပွဲပြန်နွှဲကြမည့် ထွန်းထွန်းမင်း နှင့် ဒေ့ဗ် တို့ ထိုးသတ်ကြမှာ ဖြစ်ပါတယ်။
ယခု မြန်မာပြည်ချန်ပီယံလုပွဲ ကြီးတွင်လည်း လက်ရှိချန်ပီယံ ဒေ့ဗ် လက်ဒပ်(ခ) ဒေဝကို ထွန်းထွန်းမင်းဟာ ပထမအကြိမ် ယှဉ်ပြိုင်မှုမှာ သရေကျခဲ့ပြီး ဒုတိယအကြိမ် တွေ့ဆုံမှုမှာ ရှုံးနိမ့်ခဲ့လို့ ယခု တတိယအကြိမ် ပြန်လည် စိန်ခေါ်ထိုးသတ်မှာဖြစ်ပါတယ်။
ထွန်းထွန်းမင်းက ” သူထိုးခဲ့တဲ့ ပွဲတွေ၊ ကျွန်တော်နဲ့ထိုးခဲ့တဲ့ပွဲတွေ အားလုံး ကျွန်တော် ပြန်ကြည့်ထားပါတယ်၊ အဲဒီပွဲတွေရဲ့ အားနည်းချက်၊ အားသာချက်တွေကို ပြန်လည်သုံးသပ်ပြီး ယခု တတိယအကြိမ်တွေ့ဆုံမှုမှာ အကောင်းဆုံး ယှဉ်ပြိုင်ထိုးသတ်သွားမှာပါ”လို့ ဆိုပါတယ်။
ထွန်းထွန်းမင်းသည် အသက် ၂၈ နှစ်၊ ဝိတ်တန်း ၇၈ ကီလို၊ အရပ် ၅ပေ ၉ လက်မ၊ ယှဉ်ပြိုင်ထိုးသတ်ခဲ့တဲ့ပွဲပေါင်း ၆၂ ပွဲမှာ ၄၉ ပွဲနိုင်၊ ၁၁ ပွဲ သရေ၊ နှစ်ပွဲရှုံး ယှဉ်ပြိုင်ထိုးသတ်ထားပါတယ်။
လက်ရှိချန်ပီယံ ဒေ့ဗ်လက်ဒပ်(ဒေဝ)သည် အသက် ၂၇ နှစ်၊ ဝိတ်တန်း ၇၅ ကီလို၊ အရပ် ခြောက်ပေရှိတဲ့ ယခင် မွေထိုင်းလက်ဝှေ့ကျော်တစ်ဦးဖြစ်ကာ ထိုးသတ်ခဲ့တဲ့ မွေထိုင်းပွဲပေါင်း ၅ဝ တွင် နိုင်ပွဲ ၃၇ပွဲ၊ ရှုံးပွဲ ၁၁ ပွဲနဲ့ သရေနှစ်ပွဲ ရလဒ် ပိုင်ဆိုင်ထားပြီး ကနေဒါနိုင်ငံ ၇၅ ကီလိုတန်းမှာ မွေထိုင်းချန်ပီယံ ဖြစ်ခဲ့သူတစ်ဦးပါ။
ယင်းသည် ချန်ပီယံဟောင်း ထွန်းထွန်းမင်းနဲ့ နှစ်ပွဲ ယှဉ်ပြိုင်ထိုးသတ်ခဲ့ရာမှာ သရေတစ်ပွဲနဲ့ ဒုတိယအကြိမ် တွေ့ဆုံမှုမှာ အလဲထိုးနဲ့ နိုင်ခဲ့ပါတယ်။
အဆိုပါ ပွဲတွင် အခြားပွဲစဉ်များအဖြစ် အောက်ချင်းလေးနဲ့ အင်းသား၊ စောဒါဝိတ်နဲ့ မာမွတ်၊ ဗျဂ္ထ နဲ့ ဝီထရာ၊ ထွန်းမင်းလတ်နဲ့ တိုခဲရှီတို့ရဲ့ ပွဲတွေနဲ့ အတူ မြန်မာပြည်ချန်ပီယံလုကြမယ့် ဒေ့ဗ်(ဒေဝ)နဲ့ ထွန်းထွန်းမင်း၊ အမျိုး သမီးချန်ပီယံပွဲမှာ ဗရော်နီကာနဲ့ ထိုင်း နိုင်ငံမှ ဟုန်ထောင်းတို့ ယှဉ်ပြိုင်ထိုးသတ်သွားမည်ဖြစ်ကြောင်းသိရပါတယ်။
ရိုးရာလက်ဝှေ့ ဝါသနာရှင်များအတွက် ရုံဝင်ကြေးအထူးတန်း ငွေကျပ် ၁ဝဝဝဝဝ နှင့် ကျပ် ၅ဝဝဝဝ၊ ရိုးရိုးတန်း ကျပ် ၂ဝဝဝဝ နှင့် ၁ဝဝဝဝ တို့ သတ်မှတ်ထားပြီး Sky Net မှလည်း တိုက်ရိုက်ထုတ်လွှင့် ပြသသွားမည် ဖြစ်ကြောင်း သိရပါတယ်။
Via: Myanmar Platform
