ဖိအားပေးတာတွေရှိပေမယ့် ဒုက္ခသည်တွေ ပြန်လည်လက်ခံဖို့ အဆင်သင့်ပြင်ဆင်ထား
နိုင်ငံတကာ နဲ့ ကုလသမဂ္ဂအဖွဲ့စည်းတွေက မြန်မာနိုင်ငံကို ရိုဟင်ဂျာတွေ မပြန်ဖို့ ဖိအားတွေ ပေးနေပေမယ့် မြန်မာအစိုးရကတော့ လက်ခံဖို့ အဆင်သင့်ဖြစ်နေပြီလို့ ပြောထားပါတယ်။ မြန်မာအစိုးရအနေနဲ့ မူလက စီစဉ်ထားတဲ့အတိုင်း မနက်ဖြန်မှာ နေရပ်စွန့်ခွာ ထွက်ပြေးတိမ်းရှောင်သွားတဲ့ ရိုဟင်ဂျာ မွတ်စလင်တွေကို လက်ခံဖို့ ပြင်ဆင်ထားတယ်လို့ နိုင်ငံခြားရေးဝန်ကြီးဌာန အမြဲတမ်း အတွင်းဝန် ဦးမြင့်သူက RFA ကို ဒီကနေ့ ပြောပါတယ်။
ဘင်္ဂလားဒေ့ရ်ှနိုင်ငံဘက်ကတော့ UNHCR က ဒုက္ခသည်တွေ နေရပ်ပြန်ဖို့ အတည်ပြုပေးမှ ဒုက္ခသည်တွေကို ပို့ဆောင်ပေးမှာဖြစ်ကြောင်း မနေ့က ပြောဆိုထားပါတယ်။ မနက်ဖြန်မှာတော့ လူဦးရေ အယောက် ၁၅၀ လောက် ပြန်လာကြမယ်လို့ မြန်မာအစိုးရက အတည်ပြုပြောထားပါတယ်။ UNHCR ရဲ့ထုတ်ပြန်ချက်တွေနဲ့ ပတ်သက်ပြီး နိုင်ငံခြားရေးဝန်ကြီးဌာန အမြဲတမ်း အတွင်းဝန် ဦးမြင့်သူ က အခုလိုပြောပါတယ်။
“ဒါက ကျနော်တို့ ဂျနီဗာမှာရှိတဲ့ ရုံးချုပ်က ထုတ်ပြန်ချက် ထုတ်တာဖြစ်ပါတယ်၊ အဲဒါရဲ့အဆုံးမှာ မြန်မာအစိုးရနဲ့ သဘောတူလက်မှတ်ထိုးထားတဲ့ စာချုပ်အတိုင်း ဆက်လက် ကူညီသွားမယ် ဆိုတာလည်း ပါပါတယ်၊ ဒီနေ့လည်း နေပြည်တော်မှာ သူတို့နဲ့ အစည်းအဝေး လုပ်နေပါတယ်၊ တတိယအဆင့် ဆက်လုပ်သွားဖို့ ဒီနေ့ပဲ ညှိနှိုင်းနေပါ တယ်၊ ဒါကတော့ ဂျနီဗာမှာရှိတဲ့ ရုံးချုပ်က သဘောထားထုတ်ပြန်ချက်ပဲ ဖြစ်ပါတယ်” RFA က ဘင်္ဂလားဒေ့ရှ် ဘက်က ဒုက္ခသည်စခန်းတွေကို ဆက်သွယ်ကြည့်ခဲ့ပါတယ်။
ဒုက္ခသည်စခန်းက ရိုဟင်ဂျာ မွတ်စလင်တွေကတော့ သူတို့ လိုက်လံ စုံစမ်းကြည့်သလောက်တော့ မနက်ဖြန်မှာ ပြန်မယ့် ရိုဟင်ဂျာတွေ မရှိကြကြောင်းပြောပါတယ်။ ဘာလူဟာလီ ဒုက္ခသည်စခန်းက ခေါင်းဆောင်တစ်ဦးဖြစ်တဲ့ မိုဟာမတ်ဂျူဟာရ် ဆိုသူကတော့ မြန်မာအစိုးရဘက် လာခေါ်တာက ဘင်္ဂလီတွေကိုခေါ်တာဖြစ်ပြီး သူတို့ ရိုဟင်ဂျာတွေ မဟုတ်တဲ့ သူတို့ အတွက်ပြန်မှာမဟုတ်ကြောင်း အခုလိုပြောပါတယ်။
“အခန်း ၂၀ မှာ ICRC ရဲ့ စခန်းတာဝန်ခံက ကျနော်ဆီ ကိုယ်တိုင်မေးတယ်၊ ခင်ဗျားတို့ မြန်မာနိုင်ငံပြန်မယ့် အခြေအနေက ဘယ်လိုဆန္ဒရှိလည်း အဲ့လိုမေးတယ်၊ ကျနော်က ဒေါက်တာ ဝင်းမြတ်အေး လာခေါ်တာတော့ ဘင်္ဂါလီပဲ လာခေါ်တာ ရိုဟင်ဂျာ လာခေါ်တာမရှိဘူး၊ ကျနော်တို့ နိုင်ငံသားကို ရိုဟင်ဂျာလို့ သတ်မှတ်မှ ပြန်မယ် အဲ့လိုပဲပြောလိုက်တယ်” ကုလသမဂ္ဂ ဒုက္ခသည် များဆိုင်ရာ မဟာမင်းကြီးရုံး UNHCR က တော့ တကယ်လို့ ရိုဟင်ဂျာတွေ ပြန်လာတဲ့အခါ ယာယီစခန်းမှာ အချိန်ကြာကြာ ထားမယ်ဆိုရင်တော့ UNHCR အနေနဲ့ ကူညီမှာ မဟုတ်ကြောင်း ပြောဆိုထားပါတယ်။
ဘင်္ဂလားဒေ့ရ်ှအစိုးရက ဒုက္ခသည်စခန်းတွေမှာ မြန်မာနိုင်ငံကို ပြန်ဖို့အတွက် မိမိတို့ဆန္ဒရှိမှပြန်ကြဖို့နဲ့ ဆန္ဒမရှိပါက ဆက်လက်နေထိုင်နိုင်ကြောင်း လာရောက်ပြောဆိုကြတယ်လို့ ဒုက္ခသည်တွေက ပြောပါတယ် ကုလသမဂ္ဂ လူ့အခွင့်အရေးဆိုင်ရာ အကြီးအကဲ Michelle Bachelet ကလည်း ဒုက္ခသည်တွေကို သူတို့ဆန္ဒမပါဘဲ အတင်းအကျပ် ပြန်ပို့တာဟာ နိုင်ငံတကာဥပဒေကို ချိုးဖောက်ရာရောက်ကြောင်းနဲ့ အသက်အန္တရာယ်နဲ့ လွတ်လပ်ခွင့်တွေကိုလည်း ထိပါးရာရောက်ကြောင်း ပြောဆိုထားပါတယ်။
ဒါ့အပြင် မြန်မာနိုင်ငံမှာ ရိုဟင်ဂျာ မွတ်စလင်တွေအပေါ် အကြမ်းဖက်မှုတွေ ဆက်ပြီးဖြစ်နေတုန်းပဲဆိုတဲ့ သတင်းတွေ ရရှိနေတာကြောင့် ဒုက္ခသည်တွေကို ဘင်္ဂလားဒေ့ရ်ှအနေနဲ့ စပြီးပြန်ပို့ရေး အစီအစဉ်ကို ဆိုင်းငံ့ထားဖို့ က တိုက်တွန်းထားပါသေးတယ်။ ကော့ဆက်စ်ဘဇား တန်ကာလီကန်က ရိုဟင်ဂျာ ဒုက္ခသည်တစ်ဦးဖြစ်တဲ့ ကိုခင်မောင် ဆိုသူကတော့ သူတို့စခန်းသူတွေက မြန်မာအစိုးရကို မယုံကြည်တဲ့အတွက် ဘယ်တော့မှပြန်မှာ မဟုတ်ကြောင်း ပြောပါတယ်။
“ကျနော်တို့ လိုချင်နေတဲ့ တောင်းဆိုချက်တွေ မရမချင်း ဘယ်တော့မှ ပြန်မှာမဟုတ်ဘူး၊ ပြည်တွင်းမှာ ရှိတဲ့သူတွေ ကတော့ လိုချင်စိတ် ဘာမှမရှိဘူး၊ အာမခံချက်ဘာမှ မရှိဘဲနဲ့တော့ ဘယ်သူတွေက ပြန်ချင်ပါ့မလဲ၊ မြန်မာအစိုးရရဲ့ ဆောင်ရွက်ချက်တွေက ပွင့်လင်းမြင်သာမှုမရှိဘူး၊ ဒုက္ခသည်စခန်းမှာ နေရမယ်၊ ၁ လနေရမယ်လို့ ပြောနေတယ်၊ ကျနော်တို့ ယုံကြည်လို့မရဘူးလေ၊ ဒုက္ခသည်စခန်းမှာလည်း လူတွေက အခုထိရှိနေတယ်” လူသားချင်းစာနာမှု အကူအညီပေးရေးနဲ့ နိုင်ငံတကာ အရပ်ဘက် လူမှုအဖွဲ့အစည်းပေါင်း ၄၂ ဖွဲ့ ကလည်း ရိုဟင်ဂျာတွေပြန်ဖို့အတွက် အန္တရာယ်များပြီး စောလွန်းသေးတယ်ဆိုပြီး ပြောဆိုထားပါတယ်။
မြန်မာနိုင်ငံဘက်ကတော့ အဆင်သင့်ဖြစ်နေပြီဖြစ်ပြီး ပြန်လာမလာက ဘင်္ဂလားဒေ့ရ်ှနိုင်ငံအပေါ် မူတည်ကြောင်း မြန်မာအစိုးရကလည်း ပြောဆိုထားဖူးပါတယ်။ မနက်ဖြန် နိုဝင်ဘာ ၁၅ ရက်နေ့မှာ တစ်ရက်ကို အယောက် ၁၅၀ နှုန်းနဲ့ အယောက် ၂၂၅၁ ယောက်က အရင်ဆုံးပြန်လာမယ်လို့ ဘင်္ဂလားဒေ့ရ်ှအစိုးရနဲ့ မြန်မာအစိုးရတို့ သဘောတူညီချက် ရရှိထားတယ်လို့ အစောပိုင်းကသိရပြီး လက်ရှိအခြေနေမှာတော့ ပြန်လာမလာကို စောင့်ကြည့် ရမှာ ဖြစ်ပါတယ်ခင်ဗျာ။ ဒီသတင်းကို RFA သတင်းထောက် ကိုထက်အာကာ ပေးပို့ထားပါတယ်။
RFA Burmese
