မြန်မာကို ICC စစ်ဆေးရေးတင်ဖို့ အခွင့်အလမ်းနည်းပါး
ရိုဟင်ဂျာအရေးနဲ့ပတ်သက်လို့ မြန်မာကို နိုင်ငံတကာရာဇဝတ်ခုံရုံး ICC က စုံစမ်းစစ်ဆေးနိုင်ဖို့ ဆိုတာဟာ မြန်မာဘက်မှာ အင်အားကြီးနိုင်ငံတွေ ရှိနေတဲ့အတွက် အလားအလာ အတော်နည်း တယ်လို့ ကုလသမဂ္ဂအထူး ကိုယ်စားလှယ် မစ္စယန်ဟီးလီက ပြောလိုက်ပါတယ်။ ဘင်္ဂလားဒေ့ရ်ှနိုင်ငံက ရိုဟင်ဂျာဒုက္ခသည်စခန်းတွေကို မနေ့က သွားရောက်ခဲ့တဲ့ မစ္စယန်ဟီးလီက သတင်းထောက်တွေကို အခုလို ပြောလိုက်တာပါ။
ICC လုပ်ထုံးလုပ်နည်းနဲ့ ပတ်သက်လို့ လက်ရှိဖွဲ့စည်းပုံအရ ကုလသမဂ္ဂ လုံခြုံရေးကောင်စီက လွှဲပြောင်းမှသာ စုံစမ်းစစ်ဆေးနိုင်မယ်လို့ မစ္စယန်ဟီးလီက ပြောပါတယ်။ မြန်မာဘက်က ရပ်တည်နေတဲ့ “အင်အားကြီးနိုင်ငံတွေ” ဆိုတာ ဘယ်နိုင်ငံတွေလဲလို့တော့ သူက အမည်တပ် မပြောပါဘူး။ ဒါပေမယ့် လုံခြုံရေးကောင်စီ အမြဲတမ်းအဖွဲ့ဝင် တွေ ဖြစ်တဲ့ ရုရှားနဲ့ တရုတ်နိုင်ငံ တို့ဟာ မြန်မာဘက်ကနေ တောက်လျှောက် ရပ်တည်ခဲ့တာ ဖြစ်ပါတယ်။
ကျန်နေတဲ့ ရိုဟင်ဂျာတွေအပေါ် အစီအစဉ်ရှိရှိ ကျူးလွန်တဲ့ အကြမ်းဖက်မှုတွေ ဆက်ပြီး ဖြစ်ပွားနေတယ်လို့လည်း မစ္စယန်ဟီးလီက သတင်းထောက်တွေကို ပြောပါတယ်။ ရိုဟင်ဂျာတွေကို လူမျိုးတုန်း သုတ်သင်ရှင်းလင်းတယ် ဆိုတဲ့ နိုင်ငံတကာရဲ့ စွပ်စွဲချက်နဲ့ ပတ်သက်လို့… သူတို့ဟာ အာဆာ အကြမ်းဖက်အဖွဲကို နှိမ်နင်းတာသာ ဖြစ်တယ်ဆိုပြီး မြန်မာအာဏာပိုင်တွေဘက်က တုံ့ပြန်လေ့ရှိတယ်လို့ ပြည်ပသတင်းတွေမှာ ရေးကြပါတယ်။
RFA Burmese
