ပြည်ခိုင်ဖြိုးပါတီလူငယ် ညီလာခံ ၂၀၁၈ ပထမနေ့ကျင်းပ
နေပြည်တော်၊မေ ၂၉
* မျိုးဆက်သစ်လူငယ်များအား လက်ဆင့်ကမ်းတာဝန်ပေးအပ်နိုင်ရန်၊
* လူငယ်များ၏ စွမ်းရည် မြှင့်တင်ရန်နှင့် လူငယ်များဘဝမြင့်မားတိုးတက်စေရန်၊
* နိုင်ငံရေး၊ စီးပွားရေး၊ လူမှုရေး၊ ဖွံ့ဖြိုးရေး အစရှိသည့်ကဏ္ဍများတွင် လူငယ်များ ကျယ်ကျယ်ပြန့်ပြန့် ပါဝင် ဆောင်ရွက်နိုင်ရန်၊
* လူငယ်ကဏ္ဍဖြင့် နိုင်ငံ၏စွမ်းဆောင်ရည်မြင့်တက်စေ၍ အမျိုးသားရေးစိတ်ဓာတ်များ ရင့်သန် ခိုင်မာစေရန်၊
* အရည်အသွေးမြင့်မားသော ပညာရပ်ဆိုင်ရာလူငယ်များ များပြားစွာပေါ်ထွက်လာရန်၊
* လူငယ်များအတွက် အသက်မွေး ဝမ်းကျောင်း ပညာအပါအဝင် ပညာရည်မြင့်တင်ရေးနှင့် အလုပ်အကိုင်ရရှိရေး ကဏ္ဍတိုးမြင့်ရန်၊
* နိင်ငံတော်အကျိုးစီးပွားကြွယ်ဝရေးနှင့် လူ့ဘောင်အသိုင်းအဝိုင်း အကျိုးပြုရေးလုပ်ဆောင်မှုများတွင် လူငယ် များကိုယ်တိုင် ပိုမိုပါဝင်ဆောင်ရွက်နိုင်ရန်နှင့် လူငယ်ဆိုင်ရာ လှုပ်ရှားမှုများအား နိုင်ငံတကာနယ်ပယ်အသီးသီးနှင့် ကျယ်ဝန်းစွာ ပူးပေါင်းဆောင်ရွက်နိုင်ရန်၊ စသည့်ရည်ရွယ်ချက်ကောင်းများဖြင့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီဌာနချုပ် (နေပြည်တော်) ရှိ ပြည်ထောင်စုခန်းမတွင် ယနေ့ မေလ ၂၉ ရက်နေ့ နံနက် ၈ နာရီခွဲအချိန်၌ ပါတီလူငယ်ညီလာခံ (၂၀၁၈) ကို ကျင်းပပြုလုပ်သည်။
ညီလာခံပထမနေ့တွင် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ အထွေထွေအတွင်းရေးမှူး ဦးသက်နိုင်ဝင်းမှ ညီလာခံကိုယ်စားလှယ်များအား ကြိုဆိုနှုတ်ခွန်းဆက်အမှာစကားပြောကြားပြီး ပါတီဗဟိုအလုပ်အမှုဆောင် လူငယ်ရေးရာတာဝန်ခံ ဒေါက်တာအောင်မြတ်ဦးမှ ဗဟိုလူငယ်ညီလာခံ (၂၀၁၈) ကျင်းပရခြင်းနှင့်ပတ်သက်၍ လည်းကောင်း၊ ရှေ့လုပ်ငန်းစဉ်များနှင့်ပတ်သက်၍ လည်းကောင်း ရှင်းလင်းတင်ပြသည်။
ယင်းနောက် နိုင်ငံရေးမျိုးဆက်သစ်၊ လူငယ်စွမ်းအားမြှင့်တင်ရေးနှင့်ဖွံ့ဖြိုးတိုးတက်ရေး၊ လူငယ်နှင့်ပြည်သူ့အကျိုး ပြုလုပ်ငန်းများ၊ ၂၀၂၀ အောင်နိုင်ရေးနှင့်လူငယ်များအခန်းကဏ္ဍစသည့် ကဏ္ဍအသီးသီးအား ပြည်နယ်နှင့်တိုင်း ဒေသကြီး လူငယ်ကိုယ်စားလှယ်များမှ အစုအဖွဲ့ကြီးများခွဲကာ ပြည်နယ်နှင့်တိုင်းဒေသကြီးအသီးသီးမှ လူငယ် ညီလာခံကိုယ်စားလှယ်များမှ ဆွေးနွေးကြသည်။
ယနေ့ ပထမနေ့အဖြစ် ကျင်းပပြုလုပ်လျှက်ရှိသည့် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ လူငယ်ညီလာသို့ ပါတီအထွေထွေအတွင်းရေးမှူး ဦးသက်နိုင်ဝင်း၊ ပါတီဗဟိုအတွင်းရေးမှူးများ၊ ပါတီဗဟိုအလုပ်အမှုဆောင်များ၊ ဗဟိုကော်မတီဝင်များ၊ ပါတီနှင့်တိုင်းဒေသကြီးများမှ လူငယ်ညီလာခံကိုယ်စားလှယ်များ စုံညီစွာတက်ရောက် လျှက်ရှိကြသည်။
ပြည်သူ့ဆက်ဆံရေး
