ရန်ကုန် (အရှေ့ပိုင်း) ခရိုင် ပြည်ခိုင်ဖြိုးပါတီ လုပ်ငန်းညှိနှိုင်းအစည်းအဝေးကျင်းပ
ရန်ကုန်၊ မေ ၁၇
ရန်ကုန်တိုင်းဒေသကြီး ရန်ကုန် (အရှေ့ပိုင်း) ခရိုင် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီသည် တိုင်းဒေသကြီး ခရိုင်တာဝန်ရှိသူများ ခရိုင်စည်းရုံးရေး နယ်မြေအတွင်းရှိ မြို့နယ် ၁၄ မြို့နယ်မှ မြို့နယ်ပါတီကော်မတီများဖြင့် ပါတီလုပ်ငန်းညှိနှိုင်းအစည်းအဝေးကို ယမန်နေ့နံနက် ၉ နာရီက ခရိုင်ပါတီကော်မတီရုံးအစည်းအဝေး ခန်းမဆောင်၌ ကျင်းပခဲ့ကြောင်း သိရသည်။
အစည်းအဝေးတွင် ဗဟိုကော်မတီဝင် တိုင်းဒေသကြီးပါတီအတွင်းရေးမှူး ဦးသာဝင်းက အဖွင့်အမှာစကား ပြောကြားကာ တိုင်းဒေသကြီးပါတီကော်မတီဝင်များမှ ရေးရာအလိုက် ဆွေးနွေးမှာကြားကြပြီး၊ ခရိုင်ပါတီဥက္ကဋ္ဌ ဦးစိန်မြင့်က မိမိတို့နယ်မြေအလိုက် ပြည်သူနှင့်ကွင်းဆင်း ထိတွေ့ရေး၊ စည်းရုံးရေးလုပ်ငန်းများ အရှိန်မြှင့် ဆောင်ရွက်ရေး၊ ပြည်သူ့အတွက် လူမှုရေးလုပ်ငန်းများ ပိုမိုဆောင်ရွက်ပေးရေးအတွက် အကျယ်တဝင့်မှာကြား ဆွေးနွေးသည်။
ထို့နောက် တက်ရောက်လာသော မြို့နယ်အသီးသီးမှ ပါတီတာဝန်ရှိသူများက မိမိတို့မြို့နယ်အလိုက် ပါတီ စည်းရုံးရေးလုပ်ငန်းများ၊ ကွင်းဆင်းဆောင်ရွက်ချက်များ၊ လူမှုရေးလုပ်ငန်းများတွင် ကိုယ်တိုင်လုပ်ကိုင်နေမှု၊ မိတ်ဖက်အဖွဲ့အစည်းများဖြင့် ချိတ်ဆက်ပံ့ပိုးဆောင်ရွက်ပေးနေမှုများကို ပြန်လည် တင်ပြဆွေးနွေးပါသည်။ ထို့နောက် မြို့နယ်များ၏ တင်ပြဆွေးနွေးမှုများအပေါ် တိုင်းဒေသကြီး ခရိုင်ပါတီ တာဝန်ရှိသူများက ပြန်လည် ဖြည့်စွက်ရှင်းလင်းဆွေးနွေးပြီး လုပ်ငန်းညှိနှိုင်းအစည်းအဝေးအား နံနက် ၁၁ နာရီခွဲတွင် ရုပ်သိမ်းခဲ့သည်။
လုပ်ငန်းညှိနှိုင်းအစည်းအဝေးသို့ ဗဟိုကော်မတီဝင် ရန်ကုန်တိုင်းဒေသကြီး ပြည်ထောင်စုကြံ့ခိုင်ရေးနှင့်ဖွံ့ဖြိုးရေး ပါတီအတွင်းရေးမှူး ဦးသာဝင်း၊ တိုင်းပါတီကော်မတီဝင်များဖြစ်ကြသည့် ဦးတင်အောင်၊ ဒေါ်စန်းစန်းဝင်း၊ ဒေါက်တာကျော်စိုးနှင့် ဒေါ်အေးအေးမြင့်၊ ရန်ကုန် (အရှေ့ပိုင်း) ခရိုင်၊ ခရိုင်ပါတီဥက္ကဋ္ဌ ဦးစိန်မြင့်၊ အတွင်းရေးမှူး ဒေါ်ဇာခြည်လင်း၊ ဘဏ္ဍာရေးမှူး ဦးဝဏ္ဏမျိုး၊ အမျိုးသမီးရေးရာနှင့် သတင်းမီဒီယာတာဝန်ခံ ဒေါ်လဲ့လဲ့အေးနှင့် ခရိုင်ပါတီကော်မတီဝင်များ၊ မြို့နယ်ပါတီဥက္ကဋ္ဌများနှင့် အတွင်းရေးမှူးများ၊ မြို့နယ်ကော်မတီဝင်များ စုစုပေါင်း အင်အား ၇ဝ တက်ရောက်ကြသည်။
စိုးမိုး(ဒဂုံ-အရှေ့)
