အာရှအားကစားပြိုင်ပွဲသို့ မြန်မာနိုင်ငံက ကစားနည်း ၄ မျိုး စေလွှတ် ယှဉ်ပြိုင်မည်
အောင်မြင်မှုရနိုင်မယ့် ကစားနည်းတွေကိုသာ ရွေးချယ်ပြီး အကျစ်လျစ်ဆုံး သွားရောက်ယှဉ်ပြိုင်မှာ ဖြစ်တာကြောင့် လာမယ့်သြဂုတ်လမှာ ကျင်းပမယ့် အာရှအားကစားပြိုင်ပွဲကို ကစားနည်း လေးမျိုးတည်းနဲ့ သွားရောက်ယှဉ်ပြိုင်ရတာ ဖြစ်တယ်လို့ နေပြည်တော် အားကစားလေ့ကျင့်ရေးဌာန ညွှန်ကြားရေးမှူး ဦးကျော်ဇင်မိုးက ပြောပါတယ်။
လာမယ့် အာရှအားကစားပြိုင်ပွဲအတွက် ကစားနည်း ၄ မျိုးဖြစ်တဲ့ ပိုက်ကျော်ခြင်း၊ ဝူရှူး၊ သေနတ်ပစ်နဲ့ လှေလှော်အားကစားနည်း လေးမျိုးကို စေလွှတ်ယှဉ်ပြိုင်မှာပဲ ဖြစ်ပါတယ်။
ကစားနည်းသုံးမျိုးဖြစ်တဲ့ ပိုက်ကျော်ခြင်း၊ ဝူရှူးနဲ့ သေနတ်ပစ် အားကစားနည်းတွေဟာ ပြီးခဲ့တဲ့ မလေးရှားဆီးဂိမ်းမှာ ရွှေတံဆိပ် ၇ ဆုထိ ရယူပေးခဲ့တဲ့ ကစားနည်းတွေလည်း ဖြစ်ပါတယ်။
လှေလှော်အားကစားနည်းကတော့ မြန်မာနိုင်ငံရဲ့ အောင်မြင်တဲ့ အားကစားနည်းတခု ဖြစ်လို့ သွားရောက်ယှဉ်ပြိုင်မှာ ဖြစ်ပါတယ်။
တခြားအားကစားနည်းတွေ သွားရောက်ယှဉ်ပြိုင်ဖို့ ရှိရင်တော့ ထပ်မံထည့်သွင်းသွားဖို့ ရှိတယ်လို့ သိရပါတယ်။
လက်ရှိမှာ လှေလှော်အားကစားအဖွဲ့ သေနတ်ပစ်အားကစားအဖွဲ့တို့ဟာ ရန်ကုန်မှာ စခန်းသွင်း လေ့ကျင့်နေပြီးတော့ ဝူရှူးနဲ့ ပိုက်ကျော်ခြင်း အားကစားနည်းတွေကတော့ နေပြည်တော်မှာ စခန်းသွင်းလေ့ကျင့်ဖို့ ရှိနေပါတယ်။
၁၈ ကြိမ်မြောက် အာရှအားကစားပြိုင်ပွဲမှာ လာမယ့် သြဂုတ်လ ၁၈ ရက်နေ့ကနေ စက်တင်ဘာ ၂ ရက်နေ့အထိ အင်ဒိုနီးရှားနိုင်ငံမှာ ကျင်းပမှာ ဖြစ်ပါတယ်။
(DVB)