ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီဥက္ကဋ္ဌ ဦးသန်းဌေး တရုတ်ပြည်သူ့သမ္မတနိုင်ငံ နိုင်ငံရေးသိပ္ပံ တက္ကသိုလ်ပါမောက္ခချုပ် H.E. Mr. Wang Weiguang ခေါင်းဆောင်သောကိုယ်စားလှယ်အဖွဲ့အားတွေ့ဆုံ
နေပြည်တော် ဒီဇင်ဘာ ၂၁
ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီဥက္ကဋ္ဌ ဦးသန်းဌေးသည် တရုတ်ပြည်သူ့သမ္မတနိုင်ငံ နိုင်ငံရေးသိပ္ပံ တက္ကသိုလ်ပါမောက္ခချုပ် H.E. Mr.Wang Weiguang ခေါင်းဆောင်သော ကိုယ်စားလှယ်အဖွဲ့အား ယနေ့ နံနက် ၁၁ နာရီခွဲ၌ နေပြည်တော်ပါတီဌာနချုပ်ဧည့်ခန်းမ (၁) တွင် လက်ခံတွေ့ဆုံခဲ့သည်။
ထိုသို့တွေ့ဆုံရာတွင် နှစ်နိုင်ငံချစ်ကြည်ရေး၊ နှစ်ပါတီဆက်ဆံရေးတိုးမြှင့်ရေးနှင့် တရုတ်ကွန်မြူနစ်ပါတီ (၁၉) ကြိမ်မြောက် ပါတီညီလာခံကျင်းပပြီးစီးမှုအခြေအနေအား ရှင်းလင်းပြောကြားမှုနှင့် ပတ်သက်၍ ရင်းနှီးပွင့်လင်း စွာ ဆွေးနွေးခဲ့သည်။
ဆွေးနွေးပွဲသို့ ပါတီဥက္ကဋ္ဌနှင့်အတူ အထွေထွေအတွင်းရေးမှူး ဦးသက်နိုင်ဝင်း၊ ဗဟိုအတွင်းရေးမှူး ဒေါက်တာ ကျော်ကျော်ဌေး၊ ဗဟိုအလုပ်အမှုဆောင် ဦးဝဏ္ဏမောင်လွင်၊ ဗဟိုအလုပ်အမှုဆောင် ဦးလှသိန်းတို့တက်ရောက် ခဲ့ပြီး တရုတ်ကွန်မြူနစ်ပါတီမှ H.E.Wang Weiguang နှင့်အတူ အဖွဲ့ဝင်ရှစ်ဦး တက်ရောက်ခဲ့သည်။
တွေ့ဆုံပွဲပြီးနောက် ပါတီဥက္ကဋ္ဌ ဦးသန်းဌေးသည် မွန်းတည့် ၁၂ နာရီအချိန်တွင် တရုတ်ကွန်မြူနစ်ပါတီ ကိုယ်စားလှယ်အဖွဲ့အား မြတ်တော်ဝင်ဟိုတယ (နေပြည်တော်)၌ နေ့လယ်စာဖြင့် တည်ခင်းဧည့်ခံခဲ့သည်။
ထို့နောက် မွန်းလွဲ ၂ နာရီအချိန်၌ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ အစည်းအဝေးခန်းမ (၂) တွင် တရုတ်ကွန်မြူနစ်ပါတီ (၁၉) ကြိမ်မြောက် ပါတီညီလာခံ ကျင်းပပြီးစီးမှုအခြေအနေများအား တရုတ်ကွန်မြူနစ် ပါတီ ကိုယ်စားလှယ်အဖွဲ့ခေါင်းဆောင် H.E.Wang Weiguang က ရှင်းလင်းပြောကြားခဲ့ရာ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီမှ ဗဟိုအတွင်းရေးမှူး ဦးပိုက်ထွေး၊ ဗဟိုအတွင်းရေးမှူး ဒေါက်တာ ကျော်ကျော်ဌေး၊ ဗဟိုအတွင်းရေးမှူး ဒေါ်စန်းစန်းနွယ်၊ ဗဟိုအလုပ်အမှုဆောင် ဦးလှသိန်း၊ ဗဟိုကော်မတီဝင် ဒေါက်တာနန္ဒာလှမြင့်၊ ဗဟိုကော်မတီဝင် ဒေါ်နီနီမာနှင့် တာဝန်ခံဌာနမှူးများ တက်ရောက်ခဲ့ပြီး သိလိုသည် များကို အပြန်အလှန်မေးမြန်းဖြေကြား၍ အခမ်းအနားအား မွန်းလွဲ ၃ နာရီခွဲတွင် ရုပ်သိမ်းခဲ့ပါသည်။
