ကျော်ကိုကိုနှင့် အောင်သူကို ခေါ်ယူနိုင်ရန် ကြိုးပမ်းမည်ဟု ထိုင်းကလပ် ဆာမက်ဆခွန် ထုတ်ပြန်
ထိုင်းလိဂ်-၃ကလပ်အသင်းတစ်သင်းဖြစ်သော ဆာမက်ဆခွန်အသင်းသည် မြန်မာ့လက်ရွေးစင်တိုက်စစ်မှူးများ ဖြစ်သော ကျော်ကိုကိုနှင့်အောင်သူတို့ကို ခေါ်ယူနိုင်ရန်ကြိုးပမ်းမည်ဟု အသင်းဝက်ဘ်ဆိုက်တွင် တရားဝင် ထုတ်ပြန်ခဲ့သည်။
ဆာမက်ဆခွန်အသင်းမှာ အသင်းသက်တမ်းရှစ်နှစ်အတွင်းပထမဆုံးအကြိမ်အဖြစ် လိဂ်-၂သို့ တန်းတက်နိုင်ခဲ့ ပြီးနောက် အသင်းကို ကြီးမားသောပြင်ဆင်မှုများပြုလုပ်နေသည်။
ဆာမက်ဆခွန်အသင်းက ကြီးမားတဲ့အောင်မြင်မှုတွေရယူဖို့ အသင့်ဖြစ်နေပါပြီ။ အသင်းရည်ရွယ်ချက်က ထိုင်းလိဂ်-၁ကို တက်နိုင်ဖို့ပါ။ လာမယ့်ရာသီအတွက် အကောင်းဆုံးပြင်ဆင်မှုတွေ လုပ်နေပါပြီ။ မြန်မာ တိုက်စစ်မှူးတွေဖြစ်တဲ့ ကျော်ကိုကိုနဲ့အောင်သူတို့ကို သူတို့ကလပ်အသင်းတွေဖြစ်တဲ့ ရန်ကုန်နဲ့ ရတနာပုံကနေ ခေါ်နိုင်ဖို့ ကြိုးစားနေပါတယ်။ မြန်မာကလပ်အသင်းတွေနဲ့တွေ့ဆုံပြီး သဘောတူညီမှုအမြန်ဆုံးရဖို့ ကြိုးစား နေပါတယ်။ ဟု ဆာမက်ဆခွန်အသင်းဥက္ကဌ ကီရာဗစ်က ပြောသည်။
ထိုင်းဒေသတွင်းလိဂ်-၃ကလပ် ဆာမက်ဆခွန်အသင်းမှာ မြန်မာ့လူငယ်လက်ရွေးစင်တိုက်စစ်မှူးများဖြစ်သော ရန်ကုန်ယူနိုက်တက် တိုက်စစ်မှူး ကောင်းဆက်နိုင်၊ ရတနာပုံတိုက်စစ်မှူး ရှိုင်းသူရ တို့ကို အငှားစာချုပ်ဖြင့် အသင်းသို့ ခေါ်ယူခဲ့ဖူးသည်။ ထိုင်းလိဂ်တွင် ၂၀၁၈ဘောလုံးရာသီမှစတင်ပြီး အာဆီယံကစားသမားတစ်ဦး ခေါ်ယူရန် စည်းမျဉ်းထွက်ပြီးနောက် မြန်မာတိုက်စစ်မှူးများဖြစ်သော အောင်သူနှင့်ကျော်ကိုကိုတို့ကို ခေါ်ယူရန် ထိုင်းပရီးမီးယားလိဂ်ကလပ်များကလည်း စိတ်ဝင်စားနေကြသည်။
(Mizzima)
