ငြိမ်းချမ်းရေးသမားဟု ခေါ်နိုင်ပြီဖြစ်ကြောင်း မော်ရင်ညို အသိပေး၊ ရိုဂျိုကို စာချုပ်သစ် ချုပ်ရန် စီစဉ်
မန်ယူနည်းပြ မော်ရင်ညိုသည် ၎င်းအနေနှင့် အင်္ဂလန်နိုင်ငံသို့ နည်းပြဘ၀ ဖြတ်သန်းရန် စတင် ရောက်ရှိ လာခဲ့စဉ်ကကဲ့သို့ မဟုတ်ဘဲ အရာရာကို ငြိမ်းချမ်းစွာ တုံ့ပြန်လာနိုင်ခဲ့ပြီဖြစ်၍ သတင်းမီဒီယာများ အနေနှင့် ၎င်းကို ငြိမ်းချမ်းရေးသမား(The Peaceful One)ဟု ယုံယုံကြည်ကြည် ရေးသားခေါ်ဆိုနိုင်ပြီဖြစ်ကြောင်း ဖွင့်ဟ အသိပေးလိုက်သည်ဟု Daily Star က ဖော်ပြထားသည်။
မော်ရင်ညိုသည် လွန်ခဲ့သည့် ၂၀၀၄ ခုနှစ်က ချယ်လ်ဆီး အသင်းနည်းပြအဖြစ် အင်္ဂလန် ဘောလုံးလောက သို့ စတင် ရောက်ရှိလာခဲ့ကာ ယင်းအချိန်ကမူ ၎င်းမှာ ဆတ်ဆတ်ထိ မခံသောသူကဲ့သို့ ဖြစ်နေခဲ့ကြောင်း မော်ရင်ညိုက ပြန်ပြောင်း အသိပေးသွားခဲ့သည်။
မော်ရင်ညိုသည် မန်ယူအသင်းကို တာဝန်ယူစဉ် အစောပိုင်း ကာလများ၌လည်း အပြုအမူဆိုးအချို့ ရှိခဲ့ သေးကာ လက်ရှိတွင်မူ ၎င်း၏ ခံစားချက်များကို ပိုမိုထိန်းချုပ်၍ လူကြီးလူကောင်း တစ်ဦးကဲ့သို့ တုံ့ပြန်တတ် လာခဲ့ပြီဖြစ်သဖြင့် ငြိမ်းချမ်းရေးသမား (The Peaceful One)ဟု ပြောင်းလဲခေါ်စေလိုခြင်းဖြစ်ကြောင်း မော်ရင်ညိုက ရှင်းပြသွားခဲ့သည်။
မော်ရင်ညိုသည် မန်ယူအသင်းကို တာဝန်ယူခွင့် ရလိုက်ခြင်းက ၎င်း၏စိတ်ပိုင်းဆိုင်ရာ အပါအ၀င် အမူ အကျင့်များကို များစွာ အပြောင်းအလဲ ဖြစ်သွားစေခဲ့ကြောင်း ဖွင့်ဟ အသိပေးထားပြီး အင်္ဂလန် ဘောလုံး လောကတွင် အကြီးကျယ်ဆုံးသော သမိုင်းကြောင်းကို ပိုင်ဆိုင်ထားသည့် မန်ယူအသင်းကို တာဝန်ယူ ရသော နည်းပြဟူသည်မှာ အသင်းကို ဦးဆောင်ရာတွင် သာမကဘဲ ကိုယ်ရည်ကိုယ်သွေး အမူအကျင့်၌ပါ အဘက်ဘက်၌ ပြည့်စုံနေရန် လိုအပ်ကြောင်းကို တစ်နေ့ထက်တစ်နေ့ ပိုမို သဘောပေါက်လာခဲ့ပြီဖြစ်သည် ဟုလည်း မော်ရင်ညိုက ပြောကြားထားသေးသည်။
မော်ရင်ညိုသည် လက်ရှိတွင် အသင်းနောက်ခံ ကစားသမားတစ်ဦးဖြစ်သူ ရိုဂျိုကို စာချုပ်သစ် ချုပ်ဆိုရန် စီစဉ်နေပြီဖြစ်ကာ လာမည့် ၂၀၁၇-၁၈ ဘောလုံးရာသီ မစတင်မီတွင် အသင်းနှင့် ရိုဂျိုအကြား၌ စာချုပ်သစ် အကောင်အထည် ပေါ်လာလိမ့်မည်ဟု မော်ရင်ညိုက မျှော်လင့်လျက်ရှိသည်။
မန်ယူနှင့် ရိုဂျိုအကြားတွင် ချုပ်ဆိုထားသော လက်ရှိ စာချုပ်သည် သက်တမ်း ၂ နှစ် ကျန်ရှိသေးကာ ရိုဂျို ကို တစ်ပတ်လုပ်ခလစာ အကျိုးခံစားခွင့် ပေါင်တစ်သိန်းအထိ တိုးမြှင့်ပေး၍ ၂၀၂၀ ပြည့်နှစ်တိုင် သည်အထိ အသင်း၌ရှိသွားစေနိုင်ရန် စာချုပ်သစ် ချုပ်မည်ဖြစ်ကြောင်း မော်ရင်ညိုက အသိပေးထားပြီဖြစ်သည်။
The Voice
