ကြားဖြတ်ရွေးကောက်ပွဲအောင်နိုင်ရေး အကောင်အထည်ဖော်ရေး ကော်မတီဝင်များ တွေ့ဆုံ
“လာမယ့်ရွေးကောက်ပွဲအတွက် ပါတီဌာနချုပ်က ညွှန်ကြားထားတာတွေလည်းရှိပါတယ်။ ဒါပေမယ့် ကျနော်တို့အနေနဲ့ကတော့ ကျနော်တို့ နေရာဒေသနဲ့ ကိုက်ညီမယ့်၊ အထူးသဖြင့် အမ်းမြို့နယ်ဒေသနဲ့ ကိုက်ညီမယ့် လုပ်ဆောင်ချက်တွေကို ရွေးချယ်ပြီးတော့ လုပ်ဆောင်သွားရမှာပါ” ဟု ဧပြီ ၁ ရက်နေ့၌ ပြုလုပ်ကျင်းပမည့် အမ်းမြို့နယ် ပြည်သူ့လွှတ်တော် မဲဆန္ဒနယ် အောင်နိုင်ရေး အတွက် မိမိတို့ပါတီမှ မဲဆွယ်စည်းရုံးရမည့် အခြေအနေကို ရခိုင်ပြည်နယ်ပါတီဥက္ကဋ္ဌ ဒေါက်တာစန်းရွှေ က ပြည်နယ်ပါတီရုံး တွင် ဖေဖော်ဝါရီ (၂) ရက်က အောင်နိုင်ရေးကော်မတီဝင်များနှင့် တွေ့ဆုံစဉ် ပြောကြားခဲ့သည်။
ယင်းနောက် အမ်းမြို့နယ်တာဝန်ခံ၊ ပြည်နယ်ကော်မတီဝင် ဦးခင်သောင်း (၂၀၁၇ ကြားဖြတ် ရွေးကောက်ပွဲအောင်နိုင်ရေးလုပ်ငန်းကော်မတီဥက္ကဋ္ဌ) မှ အမ်းမြို့နယ်ပါတီအနေဖြင့် အောင်နိုင်ရေး လုပ်ကိုင်ဆောင်ရွက်ထားရှိမှုများ၊ ရှေ့ဆက်လုပ်ကိုင်ဆောင်ရွက်သွားမည့်လုပ်ငန်းစဉ်များ၊ လွှတ်တော် ကိုယ်စားလှယ်လောင်း ဦးသောင်းငြိမ်းမှ အမ်းမြို့နယ်တွင် အားနည်းချက်၊ အားသာချက် များအား အကျယ်တ၀င့်ရှင်းလင်းတင်ပြခဲ့ကြောင်း သိရသည်။
ဆက်လက်၍ အောင်နိုင်ရေးကော်မတီဝင်များမှ ၂၀၁၅ ခုနှစ် ရွေးကောက်ပွဲကို သင်ခန်းစာယူကာ လုပ်သင့်လုပ်ထိုက်သည့် လုပ်ငန်းစဉ်များအား အကြံပြုတင်ပြဆွေးနွေးခဲ့ကြပြီး ဒေါက်တာ စန်းရွှေနှင့် ဦးသန်းဝေတို့မှ လိုအပ်ချက်များအား ဖြည့်စွက်တင်ပြဆွေးနွေးခဲ့ကြကြောင်း သိရသည်။
