ချင်းတိုင်းရင်းသားများ၏ အမျိုးသား အဆင့် နိုင်ငံရေးဆွေးနွေးပွဲကို လာမည့် ဇန်နဝါရီတွင် ပြုလုပ်နိုင်ရန် စီစဉ်
ချင်းတိုင်းရင်းသားများ၏ အမျိုးသားအဆင့် နိုင်ငံရေးဆွေးနွေးပွဲကို ၂၀၁၇ ဇန်နဝါရီတွင် ချင်းပြည်နယ် ဟားခါးမြို့၌ ပြုလုပ်နိုင်ရန် ဆောင်ရွက်နေကြောင်း ချင်းတိုင်းရင်းသား လက်နက်ကိုင်အဖွဲ့ ချင်းနိုင်ငံရေးပါတီ ကိုယ်စား လှယ်များက ပြောကြားသည်။
ချင်းပြည်နယ် အစိုးရ၊ ချင်း တိုင်းရင်းသားလက်နက်ကိုင်အဖွဲ့နှင့် ချင်းပြည်နယ် ရွေးကောက်ပွဲအနိုင်ရပါတီများမှ ကိုယ်စားလှယ်များပါဝင်သော ချင်းပြည်နယ် အမျိုးသားအဆင့် နိုင်ငံရေးဆွေးနွေးမှု ကြီးကြပ်ရေးကော်မတီကို ဒီဇင်ဘာအတွင်း ဖွဲ့စည်းမည်ဖြစ်ကြောင်း ချင်းအမျိုးသားတပ်ဦး (CNF) ဒုတိယဥက္ကဋ္ဌ (၂) ဒေါက်တာဆလိုင်း လျန်မှုန်းဆာခေါင်း ကပြောသည်။
ထို့အပြင် အမျိုးသားအဆင့် နိုင်ငံရေးဆွေးနွေးပွဲ ပူးတွဲကျင်းပရေးကော်မတီကို ချင်းပြည်နယ် အစိုးရ၊ ချင်းလက်နက်ကိုင် CNF၊ ချင်းပြည်နယ်ရှိ နိုင်ငံရေးပါတီများ၊ ချင်းလူမှုအဖွဲ့ အစည်းများဖြင့် ဖွဲ့စည်းမည်ဖြစ်ကြောင်း ၎င်း က ဆိုသည်။
ဒေါက်တာဆလိုင်းလျန်မှုန်းဆာခေါင်းက ‘‘ဇန်နဝါရီ ဒုတိယပတ်လောက်မှာ ဟားခါးမှာ အမျိုးသားအဆင့် နိုင်ငံရေး ဆွေးနွေးပွဲ ဖွင့်ပွဲသဘောမျိုး ကျွန်တော်တို့လုပ်ပြီးတော့ ချင်းပြည်နယ် မြို့နယ်အားလုံးနဲ့ ချင်းပြည်နယ် ပြင်ပက ရှိတဲ့ ချင်းလူမျိုးအားလုံးနဲ့ ဟားခါးကနေ စတင်တဲ့ပွဲကြီး ကျင်းပချင်တယ်။ ပြီးရင်အဲဒီမှာ ဆွေးနွေးပွဲတွေလုပ်ပြီး ဖေဖော်ဝါရီကို သွားမယ်’’ ဟု ပြောသည်။
ချင်းဒီမိုကရေစီအဖွဲ့ချုပ် ဥက္ကဋ္ဌ ဦးငိုင်ဆာခ့်ကလည်း ‘‘ကျွန်တော်တို့ ချင်းတိုင်းရင်းသားတွေအနေနဲ့ကျတော့ တခြားပြည်နယ်တွေလို အရမ်းကိုကွဲပြားတဲ့ လူမျိုးဆိုတာမရှိဘူး ချင်းပြည်မှာ။ မရှိတဲ့အတွက်ကြောင့် တစု တပေါင်းတည်း လူမျိုးရော၊ ဒေသရော၊ အကြောင်းအရာရော ပူးတွဲပြီးတော့ ကောင်းမလားဆိုတာကို ပြင်ဆင် ပြီးတော့ ညှိနှိုင်းနေတာရှိပါတယ်’’ဟု ပြောသည်။
၂၀၁၃ နိုဝင်ဘာက ချင်းပြည်နယ် ဟားခါး၌ ကျင်းပသည့် ချင်းအမျိုးသားညီလာခံမှရရှိသော နိုင်ငံရေး၊ စီးပွားရေး ဆိုင်ရာများ အပါအဝင် ချင်းတိုင်းရင်းသားများ၏ ဘုံသဘောတူညီချက်များကို လာမည့် ချင်းအမျိုးသားအဆင့် နိုင်ငံရေးဆွေးနွေးပွဲတွင် ပြန်လည် သုံးသပ်ဆွေးနွေးကာ ၂၀၁၇ ဖေဖော်ဝါရီ၌ ကျင်းပမည့် ပြည်ထောင်စု ငြိမ်းချမ်းရေးညီလာခံ ၂၁ ရာစု ပင်လုံအစည်းအဝေးသို့ တင်ပြမည်ဖြစ်ကြောင်း သိရသည်။
ချင်းပြည်နယ်ရှိ မြို့နယ်များနှင့် ချင်းတိုင်းရင်းသားများနေထိုင်သည့် အခြားမြို့နယ်များမှ ကိုယ်စားလှယ်များ၊ ချင်း လက်နက်ကိုင်အဖွဲ့၊ ချင်းလူမှုအဖွဲ့အစည်းများ၊ နိုင်ငံရေးပါတီများ စသည်တို့မှ ကိုယ်စားလှယ် စုစုပေါင်း တစ်ထောင် ကျော် တက်ရောက်သည့် ချင်းအမျိုးသားညီလာခံ၏ ဘုံသဘောတူညီချက်တွင် အခြေခံဥပဒေပြင်ဆင်ရေး ဆိုင်ရာများ၊ ဖက်ဒရယ်ပြည်ထောင်စုတည်ဆောက်ရေးမူများ၊ ဘာသာရေးကို အခြေမခံသည့် နိုင်ငံတော် တည်ဆောက်ရေးဆိုင်ရာများ ပါဝင်ကြောင်း သိရသည်။ # 7 Day Daily
