ကျူးဘားခေါင်းဆောင်ဟောင်း ဖီဒယ်ကက်စထရို ကွယ်လွန်
ကျူးဘား ကွန်မြူနစ်ခေါင်းဆောင်ဟောင်း ဖီဒယ်လ် ကက်စ်ထရိုသည် အသက် ၉၀ အရွယ်တွင် ကွယ်လွန်သွားကြောင်း သိရှိရသည်။
ကျူးဘားအစိုးရ ရုပ်မြင်သံကြား ဌာနက ကက်စ်ထရို ကွယ်လွန်သည့် သတင်းကို နိုဝင်ဘာ ၂၅ ရက်တွင် ထုတ်ပြန်သွားသော်လည်း အသေးစိတ် အချက်အလက်များကို မကြေညာခဲ့ချေ။ ကက်စ်ထရိုသည် ကျွန်းနိုင်ငံလေး၏ ကွန်မြူနစ်စနစ်ကို စတင်ထူထောင်ခဲ့သည့် သမ္မတဟောင်း တစ်ဦးလည်း ဖြစ်သည်။
၎င်းသည် ကျူးဘားကို ရာစုနှစ် တစ်ဝက်နီးပါးမျှ တစ်ပါတီ စနစ်ဖြင့် အုပ်ချုပ်ခဲ့ပြီး ၂၀၀၈ ခုနှစ်တွင် ညီဖြစ်သူ ရာအူးလ် ကက်စ်ထရိုထံ အာဏာလွှဲပေးခဲ့သည်။ ကက်စ်ထရိုကို လိုလားကြည်ညိုသူများက ၎င်းသည် ကျူးဘားပြည်သူများထံ စစ်မှန်သည့် အာဏာကို ပြန်လည် ရယူပေးခဲ့သူဟု ချီးကျူးကြသည်။ ၎င်းကို အတိုက်အခံ ပြုသူများကမူ ကက်စ်ထရိုသည် ရက်စက်ကြမ်းကြုတ်သူ၊ ဖိနှိပ်လိုသူ တစ်ဦးအဖြစ် ပုံဖော်ကြသည်။
ကျန်းမာရေးကြောင့် လူမြင်ကွင်းရှေ့ သိပ်မထွက်တော့သည့် ကက်စ်ထရိုသည် ဧပြီလအတွင်းက ကျင်းပသည့် ကွန်မြူနစ်ပါတီ ညီလာခံ၌ နောက်ဆုံးမိန့်ခွန်းကို ပြောကြားခဲ့သည်။ ၎င်းက ခေတ်ကာလ ကြာညောင်းလာပြီ ဖြစ်သော်လည်း ကျူးဘား၏ ကွန်မြူနစ်ဝါဒ သဘောတရားများသည် ကျူးဘား ပြည်သူများအတွက် သင့်တော် မှန်ကန်နေဆဲဟု ယုံကြည်ကြောင်း ဆိုသည်။
“ကျုပ်အသက် ၉၀ ပြည့်တော့မယ်။ ဒီလောက်ထိ နေရလိမ့်မယ်လို့ ထင်မထားဘူးဆိုပြီး တစ်ခါတလေတော့လည်း တွေးမိသား။ သိပ်မကြာခင် တခြားသူတွေ သွားတဲ့လမ်းကို ကျုပ်လည်း သွားရမှာပဲလေ။ အလှည့်ကတော့ ကြုံလာမှာပဲ မဟုတ်လား”ဟုလည်း အဆိုပါ မိန့်ခွန်းတွင် ၎င်းက ထည့်သွင်း ပြောကြားခဲ့သည်။
ကက်စ်ထရိုသည် ကမ္ဘာကျော် တော်လှန်ရေးခေါင်းဆောင် ချီဂွေဗားရားနှင့် ရင်းနှီးသူဖြစ်ပြီး ကျူးဘားအစိုးရကို ပုန်ကန် ဖြုတ်ချခဲ့သူ ဖြစ်သည်။ ၎င်းသည် ၁၉၆၂ ခုနှစ်၊ ကျူးဘားဒုံးကျည် ပဋိပက္ခကဲ့သို့ ကိစ္စများတွင် ဗဟိုချက်ကျကျ ပါဝင်ခဲ့သည့်နောက် နိုင်ငံတကာက အာရုံစိုက်ရသည့် ကျူးဘားနိုင်ငံရေး သင်္ကေတ တစ်ဦးအဖြစ်လည်း ရပ်တည်ခဲ့သည်။
Ref: AFP
