ကြားဖြတ်ရွေးကောက်ပွဲ၌ ရှမ်းပါတီသုံးခုပူးပေါင်းမည့်အစီအစဉ်ပျက်
ရှမ်းပြည်နယ်(အရှေ့ပိုင်း) ကျိုင်းတုံမြို့နယ်၌ ၂၀၁၇ခုနှစ် ကြားဖြတ်ရွေးကောက်ပွဲတွင် ရှမ်းပါတီသုံးခုဖြစ်သည့် ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD)၊ ရှမ်းတိုင်းရင်းသားများ ဒီမိုကရက်တစ်ပါတီ (SNDP)နှင့် ရှမ်းပြည်နယ်အရှေ့ပိုင်း ဖွံ့ဖြိုးတိုးတက်ရေး ဒီမိုကရက်တစ်ပါတီ (ESSDDP) တို့ပူးပေါင်း၍ ဝင်ရောက်ယှဉ်ပြိုင်မည့် အစီအစဉ် ပျက်သွားကြောင်း ယင်းပါတီများနှင့် ဒေသခံများထံမှ သိရသည်။
ယခင်က ပါတီတစ်ခုတည်းဖြစ်သော်လည်း ကွဲပြားသွားသည့် ရှမ်းပါတီနှစ်ခုဖြစ်သော ကျားခေါင်းနှင့် ကျားဖြူပါတီ တို့သည် ပြန်လည်ပေါင်းစည်းရန်ညှိနှိုင်းနေသော်လည်း လက်ရှိအချိန်အထိ အောင်မြင်ခြင်းမရှိကြောင်း ကျိုင်းတုံမြို့ ဒေသခံ နိုင်ငံရေးလေ့လာသူတစ်ဦးဖြစ်သည့် ဦးစိုင်းအောင်ကျော်ဝင်းက ပြောကြားသည်။
“ကျွန်တော်တို့အနေနဲ့က ပါတီထိပ်ပိုင်းအထိ ပေါင်းစည်းဖို့မဟုတ်ဘဲ ကြားဖြတ်ရွေးကောက်ပွဲမှာ ကိုယ့်မြို့နယ်က လစ်လပ်တဲ့တစ်နေရာရရှိဖို့ ပူးပေါင်းကြဖို့ ရည်ရွယ်တာပါ။ ဒီပါတီသုံးခုက ကိုယ်စားလှယ်သုံးဦးကို ဒေသခံတွေထံ ချပြမယ်။ ဒေသခံတွေ စိတ်ကြိုက်ရွေးချယ်တဲ့ တစ်ဦးကိုပဲ စုပေါင်းမဲထည့်ကြဖို့ ရည်ရွယ်တာပါ” ဟု ကျိုင်းတုံမြို့နယ် SNDP ဥက္ကဋ္ဌ ဒေါက်တာစိုင်းရွက်ဟောင်က ဆိုသည်။
၂၀၁၅ ခုနှစ်က ကျင်းပခဲ့သည့်အထွေထွေရွေးကောက်ပွဲတွင် ကျိုင်းတုံမြို့နယ်၌ ရှမ်းပါတီသုံးခု အပါအဝင် တစ်သီး ပုဂ္ဂလနှင့် နိုင်ငံရေးပါတီ ၁၁ ပါတီတို့ ဝင်ရောက်ယှဉ်ပြိုင်ရာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက နေရာအားလုံး အနိုင်ရရှိခဲ့သည်။
# The Voice
