တောင်တရုတ် ပင်လယ်အရေး AIPA ညီလာခံတွင် မဆုံးဖြတ်နိုင်ခဲ့
တင်သွင်းသည့် ပင်လယ်ရေကြောင်း လုံခြုံရေးပူးပေါင်းမြှင့်တင်ရန်နှင့် ရေသယံဇာတများ ကာကွယ်ရေး မြင့်တင် ရန်ဆိုသည့် စာတမ်းအောက်တွင် တောင်တရုတ် ပင်လယ်အရေးကိစ္စကို ထည့်သွင်းဆွေးနွေးခဲ့သော်လည်း ဆုံးဖြတ်ချက် တစုံတရာ ချမှတ်နိုင်ခဲ့ခြင်း မရှိကြောင်း သိရသည်။
“အာဆီယံမှာ ထိုင်းက တင်သွင်းတဲ့ ပင်လယ်ရေကြောင်းလုံခြုံရေး ပူးပေါင်းမြှင့်တင်ရန်ဆိုတဲ့ ကိစ္စမှာတော့ ထည့်သွင်းဆွေးနွေးတာမျိုး ရှိပါတယ်။ ဆွေးနွေးတဲ့ အထဲမှာတော့ ပါတယ်။ ဆုံးဖြတ်တဲ့အထဲမှာတော့ ထည့်သွင်းဖို့ မလိုဘူးလို့ ယူဆတဲ့အတွက် ဆုံးဖြတ်တဲ့အထဲမှာ မပါပါဘူး” ဟု ပြည်သူ့လွှတ်တော် နိုင်ငံတကာ ဆက်ဆံရေး ကော်မတီ ဥက္ကဋ္ဌ ဦးဇော်သိန်းက ပြောသည်။
AIPA တွင် နိုင်ငံရေးဆွေးနွေးမှုခေါင်းဆောင်အဖြစ်တာဝန်ယူထားသူ ဝါးခယ်မမြို့နယ် ပြည်သူ့လွှတ်တော် ကိုယ်စားလှယ်ဦးဇော်သိန်းက တောင်တရုတ်ပင်လယ် ကိစ္စကို ကျယ်ကျယ်ပြန့်ပြန့်ဆွေးနွေးခဲ့ခြင်းမရှိကြောင်း၊ မြန်မာက ပြည်တွင်း ပြည်ပစိန်ခေါ်မှုများကို ငြိမ်းချမ်းရေးနှင့်တည်ငြိမ်ရေးအတွက် ငြိမ်းချမ်းစွာ ဖြေရှင်းရေးဆိုသည့် စာတမ်းတစောင်တင်သွင်းခဲ့ကြောင်း စက်တင်ဘာလ ၂ ရက်နေ့က AIPA ညီလာခံအပြီး သတင်းစာရှင်းလင်းပွဲတွင် မီဒီယာများသို့ ပြောသည်။
တရုတ်နှင့် အာဆီယံ နိုင်ငံတချို့အကြား ပိုင်ဆိုင်မှု အငြင်းပွားနေသည့် တောင်တရုတ်ပင်လယ် အရေးကိစ္စကို သက်ဆိုင်သည့် အာဆီယံနိုင်ငံများက အရေးတယူလုပ် ဆွေးနွေးချင်သော်လည်း တရုတ်နိုင်ငံနှင့် မိတ်မပျက်ချင်သော မြန်မာအပါအ၀င် နိုင်ငံတချို့က အကျယ်တ၀င့် ဆွေးနွေးရန် သဘောမတူသည့်အခါ ယခုအရေးနှင့် ပတ်သက်၍ ဆုံးဖြတ်ချက် ချနိုင်မည်ဟု မထင်ကြောင်း နိုင်ငံရေး လေ့လာသုံးသပ်သူ ဦးရဲထွန်းက ဧရာဝတီသို့ ပြောသည်။
အာဆီယံ၏ သဘောသဘာဝအရ ကြေညာချက်တခု ထုတ်ပြန်မည်ဆိုပါက အဖွဲ့ဝင်အားလုံး၏ သဘောတူညီချက် ဖြင့်သာ ထုတ်ပြန်၍ရသဖြင့် တရုတ်ကိစ္စကို သီးသန့်ကြေညာချက်ထုတ်ပြန်ခြင်းမျိုး အာဆီယံက မလုပ်နိုင်ကြောင်း၊ ထို့ကြောင့် AIPA သည် အတွေ့အကြုံဖလှယ်ခြင်း၊ ဒေသတွင်း ဖြစ်ပေါ်နေသည့် Issues များအပေါ်တွင် အသိအမြင် ဖလှယ်ခြင်းမျိုးသာ လုပ်နိုင်မည်ဖြစ်ကြောင်း သူက သုံးသပ်သည်။
AIPA ကို ဦးဆောင်ကျင်းပသူများကမူ မြန်မာနိုင်ငံသည် ယခုညီလာခံကို အောင်မြင်စွာ ကျင်းပနိုင်ခဲ့ကြောင်း၊ ညီလာခံတွင် စည်းရုံးရေး၊ လူမှုရေး၊ စီးပွားရေး၊ နိုင်ငံရေး၊ အမျိုးသမီးရေးရာနှင့် ကြေညာချက် ထုတ်ပြန်ရေး အတွက် ပူးပေါင်းဆွေးနွေးခြင်းတို့ကို အောင်မြင်စွာ ဆောင်ရွက်နိုင်ခဲ့သဖြင့် ဒေသတွင်း အာဆီယံနိုင်ငံများက ချီးကျူးခဲ့သည်ဟု AIPA ၏ စည်းရုံးကော်မတီခေါင်းဆောင် အမျိုးသားလွှတ်တော်ကိုယ်စားလှယ် ဒေါက်တာ သန်းဝင်း က ပြောသည်။
Cyber Security နှင့် ပတ်သက်၍ အာဆီယံနိုင်ငံအချင်းချင်း ပိုမိုပူးပေါင်းဆောင်ရွက်ရေးကိစ္စကို ဗီယက်နမ်နိုင်ငံက တင်ပြရာ အားလုံးက ညီညီညွတ်ညွတ်ဖြင့် ဆုံးဖြတ်အတည်ပြုနိုင်ခဲ့ခြင်း၊ ထိုင်းနိုင်ငံက တင်သွင်းသည့် ပင်လယ် ရေကြောင်းလုံခြုံရေး ပူးပေါင်းမြင့်တင်ရန်နှင့် ရေသယံဇာတများ ကာကွယ်ရေး မြင့်တင်ရန်ဆိုသည့် အဆိုကိုလည်း အားလုံး ၀ိုင်းဝန်းဆွေးနွေးပြီး ဆုံးဖြတ်နိုင်ခဲ့ခြင်းတို့သည် အိမ်ရှင်မြန်မာနိုင်ငံနှင့် အာဆီယံ၏ အောင်မြင်မှုဖြစ်သည် ဟု မြန်မာ ကိုယ်စားလှယ်များက ပြောသည်။
အမျိုးသမီးကဏ္ဍတွင်လည်း အာဆီယံဒေသတွင်း အမျိုးသမီးများကို လူမှုကာကွယ်စောင့်ရှောက်မှုလုပ်ငန်းများ ပိုပေးရန် နှင့် ရွှေ့ပြောင်းလုပ်သားများအတွက်လည်း လုပ်သားများကိုသာမက မိသားစုဝင်များကိုပါ ကာကွယ်စောင့်ရှောက်နိုင်ရန်၊ အာဆီယံနိုင်ငံအတွင်း တူညီသောလုပ်အားအတွက် တူညီသောလုပ်ခလစာရရှိရန် ဆောင်ရွက်မည်ဟု သဘောတူ ညီခဲ့ကြသည်။
အာဆီယံ ဒေသတွင် ပျံ့နှံ့နေသည့် ဇီကာ ဗိုင်းရပ်စ် တိုက်ဖျက်ရေးအတွက် ဒေသတွင်း နိုင်ငံအားလုံးတွင် Public Health Alert Center ထူထောင်ရေး၊ သတင်း အချက်အလက် ဖလှယ်ရေး၊ ပူးပေါင်းဆောင်ရွက်ရေး တို့အတွက် သဘောတူညီခဲ့ကြကြောင်းလည်း သိရသည်။ # ဧရာဝတီ
