ဆူးလေစကွဲ (Sule Square) အထပ်မြင့် အဆောက်အအုံစီမံကိန်းသည် မူလ အဆောက်အအုံဒီဇိုင်းကို ပြင်ဆင် ဆောက်လုပ်မှုကြောင့် ဒဏ်ကြေး ကျပ် နှစ်ဘီလီယံ ကျော်ပေးဆောင် ရမည်ဖြစ်ကြောင်း သတင်းရရှိ သည်။

ဆူးလေရှန်ဂရီလာဟိုတယ် နှင့်ကပ်လျက်တည်ဆောက်သော အဆိုပါစီမံကိန်းသည် ၂၃ ထပ်မြင့်သည့် အဆောက် အအုံဖြစ်ပြီး အစိုးရသစ်လက်ထက်တွင် ပထမဆုံး အရေးယူသည့် ဆောက်လုပ်ရေးလုပ်ငန်းဖြစ်ကာ မူလခွင့်ပြုထား သည့်စီမံကိန်းထက် အထပ်ပိုဆောက်ခဲ့၍ ယခုကဲ့သို့ ပြစ်ဒဏ်ပေးခြင်းဖြစ်ကြောင်း ရန်ကုန်မြို့တော် စည်ပင် သာယာရေးကော်မတီမှ အဆောက်အအုံဌာန ဌာနမှူး ဦးသန်းဌေးက ပြောသည်။

ယခုကဲ့သို့ ဒဏ်ကြေးဆောင်ရန်အတွက် ပြီးခဲ့သည့် ဇူလိုင်လက စစ်ဆေးသတိပေးမှုပြုလုပ်ခဲ့ပြီး ခေါ်ယူညှိနှိုင်းမှု အချို့ ပြုလုပ်ခဲ့ကြောင်းသိရသည်။ ဆူးလေစကွဲသည် အဆောက်အအုံ မူလဒီဇိုင်းကို ကျော်လွန်တည်ဆောက်၍ ဒဏ်ကြေး ပေးဆောင်မှုသည် ရန်ကုန်မြို့တွင် ပထမဆုံးဖြစ်သည်။ နောက်ပိုင်းတွင် အခြားအဆောက်အအုံ များကို ယခုကဲ့သို့ ထပ်မံစစ်ဆေးရန် အစီအစဉ်ရှိကြောင်းဌာနမှူး ဦးသန်းဌေးကပြော သည်။

အဆိုပါစီမံကိန်းကို ၂၀၁၃ ဇန်န၀ါရီတွင် ရန်ကုန်စည်ပင် သာယာရေးကော်မတီက ခွင့်ပြုသော မူလဒီဇိုင်းမှာ မြေအောက် နှစ်ထပ်၊ မြေပေါ်အထပ် ၂၀ နှင့် ခေါင်မိုးပေါ် တွင် Penth House တို့  ပါဝင်ခဲ့သည်။ သို့သော် ယခု နှစ် မတ်လကတင်ပြလာသည့် စီမံကိန်းဒီဇိုင်းတွင် မြေအောက်တစ်ထပ်နှင့် အထပ်ပေါင်း ၂၃ ထပ် ပါဝင်နေ သည်။

သို့သော် အဆောက်အအုံ၏အမြင့်သည် ရန်ကုန်မြို့တော် စည်ပင်သာယာရေးကော်မတီက ခွင့်ပြုထားသည့် အမြင့်ပေ ၃၀၂ ပေခန့်ထက် ပိုမိုဆောက်လုပ်ခြင်းမရှိဟု သတင်းရရှိသည်။ ထို့ပြင် အများပြည်သူအတွက်နေရာနှင့် အများသုံးအိမ်သာများအတွက်နေရာမှာ မူလတင်ခဲ့သော ပုံစံထက် လျော့ကျခဲ့ကြောင်း သတင်းရရှိသည်။ မူလက အများပြည်သူအသုံးပြုနေရာကို စတုရန်းပေ ၅,၀၀၀ အစား စတုရန်းပေ ၁,၃၀၀ သို့ပြင်ဆင်ခဲ့ပြီး၊ အများသုံး အိမ်သာများကို စတုရန်းပေ ၉၀၀ အစား စတုရန်းပေ ၅၀၀ မှ ၆၀၀ သို့ တင်ပြလာခဲ့ခြင်းဖြစ်သည်။

အဆိုပါကိစ္စနှင့် ပတ်သက်ပြီး အဆိုပါဆူးလေစကွဲသို့ ဆက်သွယ်ရာတွင် အဆိုပါကိစ္စအတွက် ဖြေကြားခွင့် မရှိကြောင်း အကြောင်းပြန်ခဲ့သည်။ ယခုနှစ်အတွင်း ပြီးစီးရန် ရည်ရွယ်ထားသည့် ယင်းစီမံကိန်းသည် ရှန်ဂရီလာ လုပ်ငန်းစုကပိုင်ဆိုင်သည့် စီမံကိန်း တစ်ခု ဖြစ်သည်။

ဆူးလေရှန်ဂရီလာဟိုတယ်က ပြုလုပ်ထားသည့် ကားပါကင်သည် အများပြည်သူပိုင်လမ်းပေါ် ရောက်ရှိနေသဖြင့် ဖျက်သိမ်းပေးရန် ရန်ကုန်စည်ပင်သာယာရေး ကော်မတီက မကြာသေးမီက ညွှန်ကြားခဲ့သည်။

# 7 Day Daily