ပရဟိတစိတ်ဓာတ်ကို အခြေခံပြီး စုပေါင်းညီညွတ်မှုဖြင့် အောင်မြင်မှုရရှိအောင် ဆောင်ရွက် သွားကြရန် ပါတီဥက္ကဋ္ဌ ဦးသန်းဌေး ပါတီဝင်များအား မှာကြား
ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီဥက္ကဋ္ဌ ဦးသန်းဌေးနှင့် ဗဟိုအလုပ်အမှုဆောင် များဖြစ်ကြသော ဦးစိုးနိုင်၊ ဦးမြင့်စိုး၊ ဗဟိုအတွင်းရေးမှူး ဦးသန်းထွန်း၊ စစ်ကိုင်းတိုင်း ဒေသကြီး ပါတီဥက္ကဋ္ဌ ဒေါက်တာမြင့်သိန်းတို့သည် စက်တင်ဘာ (၉) ရက်နေ့ နံနက် ၉ နာရီခွဲမှ ၁၁ နာရီ ၄၅ မိနစ်အထိ စစ်ကိုင်းတိုင်း ဒေသကြီးအတွင်းရှိ ခရိုင်သုံးခရိုင်နှင့် မြို့နယ် ၁၁ မြို့နယ်မှ ပါတီဝင် ၄၅ဝ ခန့်နှင့် ရင်းနှီးပွင့်လင်းစွာ တွေ့ဆုံဆွေးနွေးခဲ့ကြသည်။
မြို့နယ်အဆင့် ပါတီအဆင့်ဆင့်မှတင်ပြကြရာတွင် မြို့နယ်အတွင်း ပါတီအဖွဲ့အစည်းများကို စနစ်တကျ ပြင်ဆင်ဖွဲ့စည်း ထားရှိပြီးဖြစ်ကြောင်း၊ စည်းရုံးရေးနယ်မြေများအလိုက် Door to Door ကွင်းဆင်းခြင်းများ ဆောင်ရွက်လျက်ရှိကြောင်း၊ ပါတီဝင်များအတွင်း အရည်အချင်း ပြည့်ဝစေရေးအတွက် သင်တန်းများ ပို့ချမှုများပေးစေလိုကြောင်း၊ နယ်မြေဒေသအလိုက် ပါတီဝင်အင်အားများကို အမာခံဖြစ်စေရေးဆောင်ရွက်နေကြောင်း၊ ၂ဝ၁၇ ခုနှစ်တွင် ကြားဖြတ်ရွေးကောက်ပွဲ အတွက် ဝိုင်းဝန်းပူးပေါင်း ဆောင်ရွက်သွားမည်ဖြစ်ကြောင်း ဆွေးနွေးခဲ့ကြသည်။
ပါတီဥက္ကဋ္ဌဦးသန်းဌေးက ပြန်လည်ဆွေးနွေးရာတွင် ဥက္ကဋ္ဌတစ်ဦးအနေဖြင့် ယခုလို လုပ်ဖော် ကိုင်ဖက်များနှင့် နွေးနွေးထွေးထွေး တွေ့ဆုံခြင်းသည် ရှေ့လုပ်ငန်းစဉ်များကို တိုင်ပင် ဆွေးနွေးလိုခြင်းကြောင့် ဖြစ်ကြောင်း၊ နိုင်ငံရေးဆိုတာ တစ်ယောက်တည်းလုပ်မရကြောင်း၊ လူထုကြားထဲ စိမ့်ဝင်ပြီး လူထုအကျိုးကို ဆောင်ရွက်ရမည် ဖြစ်ကြောင်း၊ ပြည်သူလူထုနှင့် တိုင်းပြည်အကျိုးကိုသယ်ပိုးရာတွင် အင်နှင့်အားနှင့် ဆောင်ရွက်သွားရန် လိုအပ်ကြောင်း၊ စုပေါင်းညီညွတ်မှု ဖြင့်အောင်မြင်မှုများရရှိရန် ကြိုးစားသွားဖို့လိုကြောင်း၊ ယနေ့မိမိတို့ ပါတီသည် အစိုးရဖွဲ့နိုင်သောအနိုင် ရပါတီ မဟုတ်သည့်အတွက် အားငယ်စရာမလိုဘဲ ပြည်သူလူထုအတွက် ပရဟိတစိတ်ဓာတ်ဖြင့် ဆောင်ရွက်သွားရမည်ဖြစ်ကြောင်း၊ နိုင်ငံရေး ပါတီဖြစ်သည့်အတွက် ရွေးကောက်ပွဲမှာ နိုင်ခြင်း၊ ရှုံးခြင်းသည် အချိန်ကာလတစ်ခုပေါ်တွင် သာ မူတည်ကြောင်း၊ အနိုင်၊ အရှုံး ဆိုသည်မှာ အမှန်တရားတစ်ခု မဟုတ်ကြောင်း၊ ပါတီဝင်များ အနေဖြင့် ပါတီနိုင်ငံရေးဆောင် ရွက်ရာတွင် ပရဟိတစိတ်ဓာတ်ကို အလုပ်လုပ် သွားရန်နှင့် ပါတီတွင်း စည်းလုံးညီညွတ်ရေး အတွက်လည်း အရေးတကြီး လုပ်ဆောင်သွားဖို့ လိုအပ်ကြောင်း၊ ပါတီဝင်အင်အား တိုးပွားရေးအတွက် ဆောင်ရွက်ခြင်းထက် ပါတီဝင် အင်အား ကျစ်လျစ်ခိုင်မာရေးကို ဦးစားပေး လုပ်ဆောင်သွားဖို့ လိုအပ်ကြောင်း၊ ပါတီဝင် များအနေဖြင့် မှာကြားလိုသည်မှာ ပရဟိတစိတ်ကိုအခြေခံပြီး စိတ်စေတနာကောင်းများကို အရင်းပြုကာ ပါတီနိုင်ငံရေးနှင့် အမျိုးသားနိုင်ငံရေး ဆက်လက် လုပ်ဆောင်သွားကြဖို့ တိုက်တွန်း မှာကြားလိုကြောင်းတို့ကို အကျယ် တဝံ့ဆွေးနွေးသွားခဲ့သည်။
ယင်းနောက် ပါတီဥက္ကဋ္ဌ ဦးသန်းဌေးနှင့်အဖွဲ့သည် မုံရွာမြို့မှ ရွှေဘိုမြို့သို့ထွက်ခွာကာ ပါတီ တွင်း တွေ့ဆုံဆွေးနွေးပွဲများ ဆက်လက် ကျင်းပသွားမည်ဖြစ်ကြောင်း သိရသည်။
ကျော်သူရ
