ပူတင်သည် အိုဘားမားထက် ပိုမိုထူးချွန်သည့် ခေါင်းဆောင်တစ်ဦးဟု ထရမ့်ချီးကျူး

ဗလာဒီမာပူတင်သည် ဘာရတ်အိုဘားမားထက် ပိုမိုထက်မြက် ထူးချွန်သည့် နိုင်ငံ့ခေါင်းဆောင် တစ်ဦးဖြစ်ကြောင်း ဒေါ်နယ်လ်ထရမ့်က ပြောကြားလိုက်သည်။

၎င်းက မကြာမီ ရာထူးသက်တမ်း ကုန်ဆုံးတော့မည့် အိုဘားမားကို ဝေဖန်ထိုးနှက်ပြီး အမေရိကန်၏ အဓိကပြိုင်ဘက်ကြီး ရုရှားကို ဦးဆောင်နေသည့် ပူတင်ကို ချီးကျူးခဲ့ခြင်း ဖြစ်သည်။ အိုဘားမားသည် ဒီမိုကရက် ကိုယ်စားပြု သမ္မတလောင်း ဟီလာရီ ကလင်တန်ကို အားပေး ထောက်ခံထားပြီး ရီပတ်ဘလစ်ကန်ဘက်မှ သမ္မတလောင်း ထရမ့်သည် သမ္မတ ရာထူးနှင့် ထိုက်တန်သူ မဟုတ်ဟု ပွင့်ပွင့်လင်းလင်း ပြောဆိုထားခဲ့ဖူးသည်။

ရုရှားက ကမ္ဘာ့နိုင်ငံရေး တည်ငြိမ်မှု ပျက်ပြားအောင် ပြုလုပ်နေကြောင်း အမေရိကန် ပင်တဂွန် စစ်ဌာနချုပ်က စွပ်စွဲခဲ့သည့် စက်တင်ဘာ ၇ ရက်တွင်ပင် ထရမ့်က “တကယ်တော့ ပူတင်ဟာ လက်ရှိ ကျွန်တော်တို့ သမ္မတထက် ပိုပြီး ခေါင်းဆောင်မှုစွမ်းရည် ပြည့်ဝသူပါ”ဟု မှတ်ချက်ပေးခဲ့ခြင်း ဖြစ်သည်။

ယခင်က ပူတင်ကလည်း နိုင်ငံရေး လောကထဲ ဝင်လာသည့် မီဒီယာ လုပ်ငန်းရှင် ဘီလီယံနာ သူဌေးကြီး ထရမ့်ကို ချီးကျူးစကား ပြောဆိုခဲ့ဖူးသည်။ ယင်းနှင့်ပတ်သက်၍ ထရမ့်က “ပူတင်က ပြည်သူ့ထောက်ခံမှု ၈၂ ရာခိုင်နှုန်းလောက် ရထားတဲ့သူ။ သူက ကျွန်တော့်ကို ထက်မြက်တယ်လို့ ပြောတာဟာ ဂုဏ်ယူစရာလို့ ယူဆသင့်တယ် မဟုတ်လား”ဟု တုံ့ပြန်ခဲ့ဖူးသည်။

ထရမ့်သည် မဲဆွယ်စည်းရုံးမှု ကာလများကတည်းက အငြင်းပွားဖွယ် မှတ်ချက်စကားများကြောင့် လူသိများခဲ့ပြီး အိုဘားမားကိုလည်း ဗြောင်ကျကျ ဆန့်ကျင်ခဲ့သူဖြစ်သည်။ ၎င်းက အရှေ့အလယ်ပိုင်းတွင် အိုင်အက်စ် စစ်သွေးကြွများ အင်အားကြီးမားလာခြင်း အိုဘားမား၏ နိုင်ငံခြားရေး မူဝါဒ အားနည်းချက်ကြောင့်ဖြစ်ပြီး အိုဘားမားကိုယ်တိုင် အိုင်အက်စ်ကို မွေးထုတ်ပေးခဲ့သည်ဟု ဆိုနိုင်ကြောင်းလည်း စွပ်စွဲခဲ့ဖူးသည်။

# 7 Day Daily