ဂါရတ်ဘေးလ် တစ်ပတ်ယူရို လေးသိန်းကျော်ဖြင့် ရီးရဲလ်နှင့် စာချုပ်သက်တမ်းတိုးရန် သဘောတူ
ရီးရဲလ်မက်ဒရစ်နှင့် ဂါရတ်ဘေးလ်တို့သည် တစ်ပတ်လုပ်ခယူရို ၄၁၇,၀၀၀ ဖြင့် ခြောက်နှစ်သက်တမ်းရှိ စာချုပ်သစ်ကိုသဘောတူလိုက်ကြောင်း ဗြိတိန် သတင်း ဌာနများက တနင်္ဂနွေနေ့တွင် ဖော်ပြသည်။
ပြီးခဲ့သည့် ဘောလုံးရာသီများက ဂါရတ်ဘေးလ်သည် ပရီးမီးယားလိဂ်သို့ ပြန်ရောက်မည်ဆိုသော သတင်းများ ထွက်ပေါ်ခဲ့သော်လည်း ၎င်းသည် ရီးရဲလ်တွင် အခြေကျနေပြီဖြစ်ကာ ရီးရဲလ်က လည်း ၎င်း၏စွမ်းဆောင်ရည်ကြောင့် အလွန်ပျော်ရွှင်နေကြောင်း သိရသည်။
ဂါရတ်ဘေးလ်သည် ယူရို ၂၀၁၆ ပြိုင်ပွဲတွင်လည်း ဝေးလ်စ်လက်ရွေးစင်အသင်းကို အကြို ဗိုလ်လုပွဲသို့ ရောက်အောင် စွမ်းဆောင်ပေးခဲ့သည်။
ရီးရဲလ်အတွက် ဂါရတ်ဘေးလ်သည် အရေးပါသော အခန်းကဏ္ဍမှပါဝင်ကစားနေခြင်းနှင့် ပတ်သက်၍ ဝေးလ်စ်အသင်း နည်းပြ ခရစ်ကိုးမန်းကလည်း ချီးကျူး ပြောကြားသည်။
‘‘ဂါရတ်ဘေးလ်ဟာ အားလုံးနီးပါးလုပ်နိုင်စွမ်းရှိတယ်ဆိုတာ ကျွန်တော်သိပါတယ်။ ဘေးလ်ရဲ့အနာဂတ်နဲ့ ပတ်သက်ပြီး ရီးရဲလ်ကလည်း အရမ်းရင်ခုန်နေတယ်လို့ ကျွန်တော်ထင်ပါတယ်’’ဟု ကိုးမန်းက ပြောကြားသည်။
ဝေးလ်စ်အသင်းသည် ၂၀၁၈ ကမ္ဘာ့ဖလားခြေစစ်ပွဲ ဗွေဆော်ဦးပွဲအဖြစ် တနင်္လာညတွင် မော်ဒိုဗာနှင့် ယှဉ်ပြိုင် ရမည်ဖြစ်ကာ ဘေးလ်နှင့် ဝေးလ်စ်အသင်းသားများက ယူရို ၂၀၁၆ တွင် ပြသခဲ့သည့် ခြေစွမ်းကို ဆက်ထိန်းကာ ၁၉၅၈ နောက်ပိုင်းပထမဆုံး ကမ္ဘာ့ဖလားယှဉ်ပြိုင်ခွင့်အတွက် ကြိုးစားမည်ဖြစ်သည်။
—Ref:AS
