ရခိုင်ပြည်နယ်ဆိုင်ရာ အကြံပေးကော်မရှင် ဖျက်သိမ်းပေးရန် ရခိုင်အမျိုးသားပါတီ သဘောထားထုတ်ပြန်
နိုင်ငံတော်အတိုင်ပင်ခံရုံးဝန်ကြီးဌာန၏ ၂၄-၈-၂၀၁၆ ရက်စွဲဖြင့် ထုတ်ပြန်သော ရခိုင်ပြည်နယ်ဆိုင်ရာ အကြံပေးကော်မရှင် တစ်ရပ်ဖွဲ့စည်းခြင်းနှင့် ပတ်သက်၍ ရခိုင်အမျိုးသားပါတီမှ သဘောထားကြေညာချက်တစ်ရပ်ကို သြဂုတ် (၂၅) ရက်စွဲဖြင့် ထုတ်ပြန်ကြေညာခဲ့ကြောင်း သိရသည်။ ထိုကြေညာချက်တွင် –
၁။ ရခိုင်ပြည်နယ်ရှိ နိုင်ငံသားများ၏ လုံခြုံရေးနှင့် အခွင့်အရေးများအား အာမခံချက်အပြည့်အ၀ပေးနိုင်ရန် အခြေအနေ မရှိသည့်အတွက် ရခိုင်ပြည်နယ်ဆိုင်ရာ အကြံပေးကော်မရှင်တွင် ရခိုင်တို့၏ နောက်ခံသမိုင်းနှင့် ဖြစ်တည်နေမှုကို နားလည်နိုင်စွမ်းမရှိနိုင်သည့် နိုင်ငံတကာမှ ပုဂ္ဂိုလ် (၃) ဦး ပါဝင်နေခြင်းအား ကျွန်ုပ်တို့ပါတီမှ လုံးဝကန့်ကွက်သည်။
၂။ “ကော်မရှင်အနေဖြင့် ပြည်ပန်ုင်ငံများတွင် ဒုက္ခသည်အဖြစ် ခံယူသူများ၏ ပင်ရင်းနိုင်ငံနှင့် နောက်ခံသမိုင်း ကြောင်း များအပါအ၀င် နိုင်ငံတကာဆက်နွယ်မှုအချို့ကိုလည်း သုံးသပ်သွားမည်” ဟုဆိုခြင်းမှာ ရခိုင်တိုင်းရင်းသားများ၏ အခန်းကဏ္ဍကို လုံးဝမျက်ကွယ်ပြုကာ အလွန်အမင်း ဘက်လိုက်ဆောင်ရွက်ရာရောက်မည်ဖြစ်သည့်အတွက် ဤကော်မရှင်၏ လုပ်ငန်းစဉ်များကို ကျွန်ုပ်တို့ပါတီမှ စိုးရိမ်ပြီး လုံးဝအယုံအကြည်မရှိကြောင်း ဖော်ပြအပ်ပါသည်။
၃။ ရခိုင်ပြည်နယ်အတွင်း ဖြစ်ပေါ်နေသောပြဿနာမှာ ဘင်္ဂလီလူမျိုးများ တရားမ၀င် ၀င်ရောက်နေထိုင်မှုများကို အခြေခံ၍ လူမျိုးအမည်သစ်တစ်ခုဖြင့် နိုင်ငံသား/တိုင်းရင်းသားဖြစ်လိုသော ရခိုင်နယ်မြေဒေသကို အပိုင်စီးလိုသော ပြဿနာဖြစ်ပွားလာရခြင်းကို အစိုးရအဆက်ဆက်က ဥပဒေနှင့်အညီ မဖြေရှင်းခဲ့ခြင်းကြောင့် ရှုပ်ထွေးနေသော ပြည်တွင်းရေး ပြဿနာရပ်သာဖြစ်ပေသည်။ ယခင်အစိုးရအနေဖြင့် ရခိုင်ပြည်နယ်အရေးနှင့်ပတ်သက်၍ စုံစမ်း စစ်ဆေးရေးကော်မရှင် ဖွဲ့စည်းဆောင်ရွက်စေခဲ့ပြီး အစီရင်ခံစာ ထုတ်ပြန်ထားပြီးဖြစ်ရာ (၂၄-၈-၂၀၁၆) နေ့စွဲပါ ကော်မရှင်အသစ်တစ်ရပ်ကို ထက်မံဖွဲ့စည်းရန် မလိုအပ်တော့ဘဲ ထုတ်ပြန်ပြီးအစီရင်ခံစာကို အခြေခံ၍ သုံးသပ် အဖြေရှာ ဖြေရှင်းကြရန်သာလိုအပ်ကြောင်း ရခိုင်အမျိုးသားပါတီမှ အလေးအနက်တိုက်တွန်းပါသည်။
၎။ ပြည်ထောင်စုသမ္မတမြန်မာနိုင်ငံတော်၏ ပြည်တွင်းရေးကိစ္စကို နိုင်ငံတကာကိစ္စရပ်အဖြစ် ပုံဖော်လိုက်ရာ ရောက်စေ သော (၂၄-၈-၂၀၁၆) နေ့စွဲပါ ကုလသမဂ္ဂအတွင်းရေးမှူးဟောင်း ကိုဖီအာနန် ဥက္ကဋ္ဌအဖြစ် ဖွဲ့စည်းပေးထားသည့် ရခိုင်ပြည်နယ်ဆိုင်ရာ အကြံပေးကော်မရှင်အားဖျက်သိမ်းပေးပါရန် ရခိုင်အမျိုးသားပါတီမှ အလေးအနက်တောင်းဆို အပ်ပါသည်ဟု ပါရှိသည်။
