အစိုးရသစ် လက်ထက်တွင် စက်မှုဝန်ကြီးဌာန လက်အောက်ရှိ နိုင်ငံပိုင်စက်ရုံ ၄၇ ရုံကို ပြည်တွင်းပြည်ပ ပုဂ္ဂလိက ရင်းနှီးမြှုပ်နှံမှုများ ဖိတ်ခေါ်၍ နှစ်တိုနှစ်ရှည် ငှားရမ်းလုပ်ကိုင် ခွင့်ပြုမည်
အစိုးရသစ် လက်ထက်တွင် စက်မှုဝန်ကြီးဌာန လက်အောက်ရှိ နိုင်ငံပိုင်စက်ရုံ ၄၇ ရုံကို ပြည်တွင်းပြည်ပ ပုဂ္ဂလိက ရင်းနှီးမြှုပ်နှံမှုများ ဖိတ်ခေါ်၍ နှစ်တိုနှစ်ရှည် ငှားရမ်း လုပ်ကိုင်ခွင့်ပြုမည်ဖြစ်ကြောင်း စက်မှုဝန်ကြီးဌာနမှ သိရသည်။
“နိုင်ငံပိုင် စက်ရုံတွေရဲ့ တည်နေရာ၊ လုပ်သားအင်အားစတဲ့ အချက်အလက်တွေကို စက်မှုဝန်ကြီးဌာန ၀က်ဘ်ဆိုက်မှာ အကုန်ဖော်ပြထားပါတယ်။ အဲဒီစက်ရုံတွေထဲက ဘယ်စက်ရုံကို ပုဂ္ဂလိက အနေနဲ့ ငှားရမ်းချင်တာ၊ အကျိုးတူ ပူးပေါင်း ဆောင်ရွက်ချင်တာတွေ လုပ်ချင်ပါသလဲ။ ပူးပေါင်း ဆောင်ရွက်ချင်တယ်ဆိုရင် စက်မှု ၀န်ကြီးဌာနက သက်ဆိုင်ရာဌာနတွေမှာ လာရောက် ဆွေးနွေးလို့ ရပါတယ်။ ကျွန်တော်တို့ လိုအပ်ချက်နဲ့ သူတို့ဘက်က တောင်းဆိုချက် အကုန်ကိုက်ညီတယ် ဆိုရင် လုပ်ကိုင်လို့ ရပါတယ်” ဟု စက်မှုဝန်ကြီးဌာနမှ လက်ထောက်အတွင်းဝန် ဦးမျိုးဇာနည်ဝင်းက ပြောကြားသည်။
စက်မှုဝန်ကြီးဌာန ကြီးကြပ်မှုအောက်ရှိ စက်မှုလုပ်ငန်းများနှင့် စက်ရုံများအား ခေတ်နှင့်လျော်ညီပြီး လုပ်ငန်း သဘာဝနှင့် ကိုက်ညီမည့် အမည်သို့ ပြောင်းလဲခြင်း၊ လုပ်ငန်းချင်း တူညီသည့် စက်ရုံငယ်များ စုစည်း၍ စက်ရုံကြီးများ၏ ဖွဲ့စည်းပုံ အတွင်းသို့ ထည့်သွင်းဖွဲ့စည်းခြင်း၊ ပုဂ္ဂလိကသို့ လွှဲပြောင်းခြင်း၊ မိမိတို့၏ စက်ရုံများကို ပူးပေါင်းထုတ်လုပ်ရန် စိတ်ပါဝင်စားသည့် ပုဂ္ဂလိက လုပ်ငန်းရှင်များနှင့် ဖက်စပ်လုပ်ငန်းများ တည်ထောင် ဆောင်ရွက်ခြင်းကို နှစ်တိုနှစ်ရှည် ပုဂ္ဂလိကသို့ ငှားရမ်းခြင်းတို့ကို ပြုလုပ်လျက် ရှိကြောင်း သိရသည်။
ယင်းကဲ့သို့ နိုင်ငံပိုင် စက်ရုံများကို ပြည်တွင်းပြည်ပ လုပ်ငန်းရှင်များသို့ ငှားရမ်းလုပ်ကိုင် ခွင့်ပြုခြင်းကို ယခင်အစိုးရလက်ထက် ကတည်းက စတင် ခွင့်ပြုခဲ့ခြင်းဖြစ်ကြောင်း၊ ငှားရမ်းလုပ်ကိုင် ခွင့်ပြုပြီးသည့် စက်ရုံ ၅၆ ရုံ အထိ ရှိနေပြီဖြစ်ကြောင်းနှင့် ကိုရီးယားနှင့် တရုတ်စသည့် နိုင်ငံများမှ ၀င်ရောက် လုပ်ကိုင်နေခြင်း ဖြစ်ကြောင်း သိရသည်။
“နိုင်ငံပိုင် စက်ရုံ ၄၇ ရုံပဲ ကျန်တော့တယ်။ ငှားရမ်းဖက်စပ် လုပ်ပြီးတဲ့ စက်ရုံက ၅၆ ရုံပါ။ ပေါင်း ၁၀၃ ရုံ ရှိပါတယ်” ဟု ဦးမျိုးဇာနည်ဝင်းက ဆက်လက် ပြောကြားသည်။
ယင်းကဲ့သို့ ပြည်တွင်းပြည်ပ လုပ်ငန်းရှင်များအား လုပ်ကိုင်ခွင့်ပြုရာ၌ နှစ်တိုနှစ်ရှည် ငှားရမ်းခြင်းနှင့် ပတ်သက်၍ “လုပ်ကိုင်ခွင့်က BOT စနစ်နဲ့ပေးတာ ရှားပါတယ်။ အခု အဓိက လုပ်တာကတော့ Leasing ပေါ့ ငှားရမ်းခြင်း။ သို့မဟုတ် Product Sharing ပေါ့။ ထုတ်ကုန်တွေကို ရှယ်ယာရွေးခြင်းနဲ့ ခွဲဝေခြင်း၊ နောက်တစ်ခုကတော့ Profit Sharing ပါ။ ထွက်လာတဲ့ အကျိုးအမြတ်ကိုမှ ဥပမာ-ပိုင်ဆိုင်မှု ထည့်ဝင်တာတွေကို ထည့်တွက်ပြီး သူက ၅၀ ရာခိုင်နှုန်းဖြစ်မယ်။ ကိုယ်က ၅၀ ရာခိုင်နှုန်း ဖြစ်မယ်။ သို့မဟုတ် ၄၀-၆၀ ပေါ့။ စသဖြင့် PPP စနစ်နဲ့ ဆောင်ရွက်နေပါတယ်။ အစိုးရ၊ ပုဂ္ဂလိက ပူးပေါင်းဆောင်ရွက်မှု အသွင်သဏ္ဌာန်နဲ့ ဆောင်ရွက်နေပါတယ်” ဟု ၎င်းက ပြောကြားသည်။
ငှားရမ်းလုပ်ကိုင် ခွင့်ပြုသည့် နှစ်ကာလ အကန့်အသတ်မှာ နှစ်ရှည် လုပ်ကိုင်လိုပါက MIC မှတစ်ဆင့် တင်ပြ လုပ်ကိုင်ရခြင်းဖြစ်ပြီး အများအားဖြင့် အစိုးရအဖွဲ့၏ စီးပွားရေးရာ ကော်မတီသို့ တင်ပြကာ လုပ်ကိုင် ခွင့်ပြုနေခြင်းဖြစ်ကြောင်း သိရသည်။
Eleven Media Group
