တောင်တရုတ်ပင်လယ်အရေးဆွေးနွေးရန် တရုတ်သို့ အထူးသံတမန် စေလွှတ်မည်ဟု ဖိလစ်ပိုင်သမ္မတ ပြော
တောင်တရုတ်ပင်လယ်အရေး နိုင်ငံတကာခုံရုံး၏ ဆုံးဖြတ်ချက်ကြောင့် တင်းမာရန်လိုနေသော တရုတ်နှင့် စေ့စပ် ဆွေးနွေးရန်အတွက် သမ္မတဟောင်း ဖီဒယ်လ် ရာမို့စ် အား အထူးသံတမန်အဖြစ် စေလွှတ်ရန် စီစဉ်နေသည်ဟု ဖိလစ်ပိုင် သမ္မတ ရိုဒရီဂို ဒူတာတေးက ပြောကြားသည်။
တောင်တရုတ်ပင်လယ်နယ်မြေအများစုကို ပိုင်ဆိုင်သည်ဟု တရုတ်အစိုးရ၏ ပြောကြားချက်မှာ အထောက်အထား မရှိ၍ တရုတ်တို့ မပိုင်ဆိုင်ကြောင်း နိုင်ငံတကာ ခုံရုံးက ဆုံးဖြတ်ချက်ချမှတ်ခဲ့ခြင်းဖြစ်သည်။
လက်ရှိအချိန်အခါတွင် ပေကျင်းအစိုးရနှင့်ဆွေးနွေးရန် ယခင်ခေါင်းဆောင်ဟောင်း ရာမို့စ်အား တရုတ်သို့ သွားရောက် စေ့စပ်ဆွေးနွေးရန် အကူအညီ တောင်းခံ ထားသည်ဟု ဖိလစ်ပိုင်သမ္မတဒူတာတေးက ပြောသည်။ သို့သော် မည်သည့် အချိန်တွင် စေလွှတ်သွားမည်ကိုမူ ပြောဆိုခဲ့ခြင်းမရှိပေ။
“ စစ်ပွဲလား၊ ဒါကို မရွေးချယ်ကောင်းပါဘူး၊ တစ်ခြားဘက်က ပြောင်းစဉ်းစားကြရမယ်လေ၊ ငြိမ်းချမ်းရေး ဆွေးနွေးပွဲတွေ လုပ်ရမှာပေါ့၊ ဒီကိစ္စနဲ့ပတ်သက်လို့ ကျွန်တော် တတ်သိသူ တော်တော်များများနဲ့ ဆွေးနွေးခဲ့ပါတယ်၊ သမ္မတဟောင်း ရာမို့စ်အပါအ၀င်ပေါ့၊ ဒါကြောင့် သူ့ကို သွားပြီး တရုတ်နဲ့ဆွေးနွေးပေးပါလို့ ကျွန်တော် တလေးတစား အကူအညီတောင်းထားပါတယ်” ဟု ဖိလစ်ပိုင် သမ္မတ ဒူတာတေးက ပြောသည်။
၁၉၉၂ ခုနှစ်မှ ၁၉၉၈ ခုနှစ်ထိ ဖိလစ်ပိုင်သမ္မတအဖြစ် ထမ်းဆောင်ခဲ့သော ရာမို့စ်သည် တရုတ်နှင့် နီးကပ်သော ဆက်ဆံရေးများကို ဖော်ဆောင်ထားနိုင်ခဲ့သူ ဖြစ်သည်။ သို့သော် ယခုအချိန်တွင် အသက် ၈၈ နှစ် ရှိနေပြီဖြစ်သော ရာမို့စ်က ၎င်း၏ အသက်အရွယ်နှင့် အခြားကျန်းမာရေးအခြေအနေတို့ကြောင့် သမ္မတ၏ တောင်းဆိုချက်ကို လက်သင့်ခံသင့် မခံသင့် စဉ်းစားနေသည်ဟု ပြောသွားသည်။
-Ref; CNA
