ရန်ကုန်မြို့သမိုင်းတွင် အရေးပါသည့်အခန်းကဏ္ဍမှ ပါဝင်ခဲ့သည့် အိန္ဒိယသံရုံး အဆောက်အအုံကို အပြာရောင်ကမ္ဗည်းပြားတပ်ဆင်
ရန်ကုန်မြို့ ကျောက်တံတားမြို့နယ် ကုန်သည်လမ်းပေါ်ရှိ အိန္ဒိယသံရုံး အဆောက်အအုံ၌ မေလ (၃၀) ရက်နံနက်ပိုင်းက အပြာရောင်ကမ္ဗည်းပြား တပ်ဆင်ခဲ့သည်ဟု ရန်ကုန်မြို့ပြ အမွေအနှစ် ထိန်းသိမ်း စောင့်ရှောက်ရေးအဖွဲ့ (YHT) က သတင်းထုတ်ပြန်သည်။
ယင်းအဆောက်အအုံသည် ရန်ကုန်မြို့သမိုင်းတွင် အရေးပါသည့်အခန်းကဏ္ဍမှ ပါဝင်ခဲ့သည့်အတွက် အပြာရောင်ကမ္ဗည်းပြား ပထမဆုံးတပ်ဆင်ခံရသည့် အိန္ဒိယအမွေအနှစ် အဆောက်အအုံ တစ်လုံးပင် ဖြစ်သည်ဟု YHT က သတင်းထုတ်ပြန်သည်။
၁၉၁၄ ခုနှစ်တွင် ဆောက်လုပ်ပြီးစီးခဲ့သည့် ထိုအဆောက်အအုံကို မူလက ကာလကတ္တားအခြေစိုက် အာမခံလုပ်ငန်းဖြစ်သည့် အိုရီယန်တယ် အသက်အာမခံ ကုမ္ပဏီ၏ ရုံးခန်းအဖြစ် တည်ဆောက်ခဲ့ခြင်း ဖြစ်ကြောင်း၊ ၁၉၅၇ ခုနှစ်မှစ၍ အဆောက်အအုံကို အိန္ဒိယသံရုံးအဖြစ် ပြောင်းလဲအသုံးပြုခဲ့ပြီး ယဉ်ကျေးမှုဆိုင်ရာ ပွဲလမ်းများ ကျင်းပကာ ရန်ကုန်မြို့တွင် အိန္ဒိယယဉ်ကျေးမှုများ ပြန်လည် မိတ်ဆက် ရာတွင် အရေးပါသည့် အခန်းကဏ္ဍမှ ပါဝင်လျက်ရှိကြောင်း၊ ငါးထပ်အမြင့်ရှိ ဤအဆောက်အအုံသည် မြင့်မားသော အမွေအနှစ် အဆောက်အအုံများအနက်မှ တစ်ခုဖြစ်ပြီး ၁၉၉၀-၂၀၀၀ ခုနှစ်တွင် ပြန်လည်ပြင်ဆင်ခဲ့ကြောင်း၊ အိုရီယန်တယ် အသက်အာမခံကုမ္ပဏီ၏ မူလအမှတ်တံဆိပ်ကို ကုန်သည်လမ်းဘက် မျက်နှာစာတွင် ယနေ့တိုင် တွေ့မြင်နိုင်ကြောင်း ယင်းထုတ်ပြန်ချက်တွင် ဖော်ပြထားသည်။
“ဒီလိုလှပပြီး ရာစုနှစ်တစ်ခုစာ သက်တမ်းရှိနေတဲ့ အဆောက်အအုံဟာ အိုရီယန်တယ် အသက်အာမခံ ကုမ္ပဏီရဲ့ အဆောက်အအုံ ဖြစ်ခဲ့တာကြောင့် အရေးကြီးတယ် ဆိုတာထက် ၁၉၅၀ ပြည့်လွန်နှစ်တွေကတည်းက အိန္ဒိယသံရုံးအဖြစ် အသုံးပြုခဲ့တာကြောင့် ပိုပြီး အရေးကြီးတာဖြစ်ပါတယ်။ အိန္ဒိယ-မြန်မာ နှစ်နိုင်ငံစလုံးနဲ့ သက်ဆိုင်တဲ့ အမွေအနှစ် အဆောက်အအုံများစွာ ရန်ကုန်မြို့လယ်မှာ ရှိပါတယ်။ ဥပမာ ရာဘင်ဒြာနတ်တဂိုး၊ မဟတ္တမဂန္ဒီနဲ့ ပန်တစ်နေရူးတို့ ၂၀ ရာစုဆန်းပိုင်းက အကြိမ်ကြိမ် လာရောက်ခဲ့တဲ့ ခရီးစဉ်တွေနဲ့ ပတ်သက်တဲ့ နေရာတွေပေါ့။ အိန္ဒိယသံရုံးနဲ့ သံအမတ်ကြီးတို့ဟာ ရန်ကုန်မြို့ပြ အမွေအနှစ် ထိန်းသိမ်းစောင့်ရှောက်ရေး အဖွဲ့ကို လေးလေးနက်နက် ထောက်ခံအားပေးခဲ့ကြတာ ဖြစ်တဲ့အတိုင်း နောင်မှာလည်း ဒီလိုခိုင်မာတဲ့ ပူးပေါင်း ဆောင်ရွက်မှုတွေ ဆက်လက် လုပ်ဆောင်သွားနိုင်ဖို့ မျှော်လင့်ပါတယ်” ဟု ရန်ကုန်မြို့ပြ အမွေအနှစ် ထိန်းသိမ်းစောင့်ရှောက်ရေးအဖွဲ့ တည်ထောင်သူနှင့် ဥက္ကဋ္ဌဖြစ်သူ ဒေါက်တာသန့်မြင့်ဦးက ဆိုသည်။
ရန်ကုန်မြို့ပြ အမွေအနှစ် ထိန်းသိမ်းစောင့်ရှောက်ရေးအဖွဲ့၏ အပြာရောင်ကမ္ဗည်းပြားတပ်ဆင်ခြင်းသည် အဖွဲ့၏ လုပ်ငန်းတစ်စိတ်တစ်ပိုင်းအဖြစ် ရန်ကုန်၏ သူမတူ ထူးခြားသော ယဉ်ကျေးမှုနှင့် မြို့ပြအမွေအနှစ်များနှင့် ယင်းတို့ကိုထိန်းသိမ်းစောင့်ရှောက်ခြင်း၏ အရေးပါပုံတို့ကို မီးမောင်းထိုးပြနိုင်ရုံသာမက မြို့သမိုင်းကြောင်းတွင် အရေးပါခဲ့သော အဆောက်အအုံများနှင့် လူပုဂ္ဂိုလ်များအား အထိမ်းအမှတ်ပြုရန် ရည်ရွယ်ခြင်းဖြစ်သည်ဟုလည်း ထုတ်ပြန်ချက်တွင် ဖော်ပြထားသည်။
The Voice Weekly
