ဗင်နီဇွဲလားနိုင်ငံသို့ လေကြောင်းခရီးစဉ်များ ဆိုင်းငံ့
ဓာတ်ပုံ- အေအက်ဖ်ပီ
ဂျာမနီလေကြောင်းလိုင်း Lufthansa က ဗင်နီဇွဲလား စီးပွားရေးအကျပ်အတည်းများကြောင့် ဇွန်လ ၁၈ ရက်ကစ၍ ဗင်နီဇွဲလားနိုင်ငံသို့ လေကြောင်းခရီးစဉ်များကို ယာယီဆိုင်းငံ့သွားမည်ဟု မေလ ၂၈ ရက်တွင် ကြေညာသည်။
ဗင်နီဇွဲလားနိုင်ငံ၌ ငွေကြေးထိန်းချုပ်မှုများကြောင့် လေကြောင်းလိုင်းများအနေဖြင့် ၎င်းတို့ရရှိသော ပြည်တွင်း ငွေများကို ဒေါ်လာသို့ပြောင်းရန်နှင့် ပြည်ပပြန်ပို့ရန် မဖြစ်နိုင်ကြောင်း Lufthansa ကုမ္ပဏီက ပြောသည်။
ဗင်နီဇွဲလားနိုင်ငံ၏ ၀င်ငွေရင်းမြစ်ဖြစ်သော ရေနံလုပ်ငန်း၏ ရေနံဈေးများ သိသိသာသာ ကျဆင်းနေမှုကြောင့် စီးပွားရေးထိခိုက်နေသည်။ ဗင်နီဇွဲလားနိုင်ငံ၌ ငွေကြေးဖောင်းပွမှုနှင့် အခြေခံကုန်ပစ္စည်းများ အလွန်အမင်း ပြတ်လပ်မှု များလည်း ဖြစ်နေသည်။
ဗင်နီဇွဲလားနိုင်ငံ ကာရာကတ်စ်မြို့နှင့် ဂျာမနီနိုင်ငံ ဖရန့်ဖတ်မြို့ကြား Lufthansa လေကြောင်းခရီးစဉ်များကို ဇွန်လ ၁၈ ရက်မှစ၍ ယာယီဆိုင်းငံ့သွားမည်ဟု ကုမ္ပဏီက ကြေညာသည်။
ဗင်နီဇွဲလားသို့ နိုင်ငံတကာ လေကြောင်းခရီးစဉ်များမှာ ၂၀၁၅ နှင့် ၂၀၁၆ ပထမသုံးလပတ်တို့ တွင် ကျဆင်းခဲ့သည်ဟု Lufthansa ကုမ္ပဏီက ပြောသည်။ မကြာမီ လေကြောင်းခရီးစဉ်များ ပြန်လည်ပြေးဆွဲရန် မျှော်လင့်သည်ဟုလည်း ယင်းကုမ္ပဏီက ပြောသည်။
ဗင်နီဇွဲလားနိုင်ငံ၌ တင်းကျပ်သော ငွေကြေးထိန်းချုပ်မှုများကို သမ္မတဟောင်း ဟူဂိုချားဗက်ဇ်လက်ထက် ၂၀၀၃ ခုနှစ် တွင် ပထမဆုံးအကြိမ် စတင်ခဲ့သည်။
ပြီးခဲ့သည့် ၂ နှစ်က ကန့်သတ်မှုများ ထပ်တိုးထားရှိ၍ လေကြောင်းလိုင်းများသည် ဗင်နီဇွဲလားနိုင်ငံ၌ ၎င်းတို့၏ လုပ်ငန်းများကို လျှော့ချခဲ့ရသည်။ ဗင်နီဇွဲလားနိုင်ငံ၌ လေကြောင်းလိုင်းအချို့သည် လေယာဉ်စီးခကို ဒေါ်လာဖြင့် ပေးချေခိုင်းနေသည်။
ဗင်နီဇွဲလားအစိုးရက ဆေးဝါးများနှင့် စက်ပစ္စည်းများကဲ့သို့ မရှိမဖြစ်လိုအပ်သည့် ပစ္စည်းများအတွက် ငွေပေးချေရန် နိုင်ငံခြား ငွေများကို အသုံးပြုနေရသည်ဟု ပြော၍ ၎င်းတို့၏ မူဝါဒများကို ခုခံပြောဆိုထားသည်။
—Ref: BBC
