ကျန်းမာရေးဆိုင်ရာများကို တစ်နေရာတည်းတွင် ကြည့်ရှုနိုင်မည့်ဝက်ဘ်ဆိုက် စတင်
ကျန်းမာရေးဆိုင်ရာများကို တစ်နေရာတည်းတွင် ကြည့်ရှုနိုင်မည့် Dr Myanmar Website ကို စတင်လွှင့် တင်လိုက်ကြောင်းသိရသည်။ ဝက်ဘ်ဆိုက်လိပ်စာ မှာ www.drmyanmar.com ဖြစ်ပြီး အဆိုပါဝက်ဘ်ဆိုက် တွင် အထူးကုဆရာဝန်ကြီးများထိုင်သည့် ဆေးရုံ၊ ဆေးခန်းများနှင့် လိပ်စာများ၊ ဖုန်းနံပါတ်များ၊ အရေးပေါ် ဆက်သွယ်နိုင်မည့် ဖုန်းနံပါတ်များကို Directory Program အဖြစ် ရှာဖွေနိုင်မည်ဖြစ်ကြောင်း သိရသည်။ “ဆေးရုံ၊ ဆေးခန်းတွေမှာရနိုင်တဲ့ ဝန်ဆောင်မှုတွေ ကို ဖော်ပြပေးထားပါတယ်။ ကျန်းမာရေးနဲ့ပတ်သက်ပြီး သိလိုတာတွေကို ဝက်ဘ်ဆိုက်ကနေ တစ်ဆင့် ဖြေကြားပေးသွားမယ့် Dr Myanmar ဆေးခန်းကဏ္ဍကို လည်း မကြာခင်မှာ ဆောင်ရွက်သွားမှာဖြစ်ပါတယ်” ဟု ဝက်ဘ်ဆိုက်နှင့် ပတ်သက်၍ တာဝန်ရှိသူတစ်ဦးက ပြောသည်။ ကျန်းမာရေးဆိုင်ရာ သတင်းနှင့်ဆောင်းပါးများကို လည်း နေ့စဉ်ဖော်ပြပေးသွားမည်ဟု ဆိုသည်။ အထူးကု ဆရာဝန်ကြီးများ (ရန်ကုန်) ဟူသောကဏ္ဍတွင် မိမိပြသလိုသော ရောဂါအလိုက် ရန်ကုန်မြို့တွင် ကုသပေးနေသော ဆရာဝန်ကြီးများ၏ ဆေးခန်းချိန်များနှင့် ဆေးခန်းနေရာများကို ရှာဖွေနိုင်မည်ဖြစ်ကြောင်း၊ ဆေးရုံ၊ ဆေးခန်းနှင့် ဓာတ်ခွဲခန်းများကဏ္ဍတွင် မြို့နယ်အတွင်း ရှိ ဆေးရုံ၊ ဆေးခန်း များ၏ လိပ်စာနှင့် ဖုန်းနံပါတ်များအား ရှာဖွေနိုင်မည်ဖြစ်ကြောင်း၊ ပြည်ပနိုင်ငံရှိ ဆေးရုံများနှင့် ချိတ်ဆက်ထားသော ပြည်တွင်းစင်တာများကိုလည်း လမ်းညွှန်ပေးထားကြောင်း ဆိုသည်။ အရေးပေါ်ဆက်သွယ်ရမည့် ဖုန်းနံပါတ် များစာရင်းတွင် လူနာတင်ယာဉ် ခေါ်ဆိုနိုင်သောနေရာများ၊ ၂၄ နာရီ ကုသမှုပေးနေသော ဆေးရုံ၊ ဆေးခန်း များ၊ အောက်စီဂျင် ငှားရမ်းနိုင်သော နေရာများနှင့် သွေးလှူရှင် အဖွဲ့အစည်းတို့၏ လိပ်စာနှင့် ဖုန်းနံပါတ် များပါရှိကြောင်း သိရသည်။ ဆေးရုံ၊ ဆေးခန်းများ၏ ဝန်ဆောင်မှုများကဏ္ဍတွင် သက်ဆိုင်ရာ ဆေးရုံ၊ ဆေးခန်းနှင့် အလှအပဆိုင်ရာ ဆေးခန်းများ၏ ဝန်ဆောင်မှုများအား ဖော်ပြပေးထားကြောင်း သိရသည်။ မိမိတို့၏ ကိုယ်အလေးချိန်နှင့် အရပ်အမြင့်အား ရိုက်ထည့်ကာ BMI ကို အလွယ်တကူ တွက်ချက်နိုင်မည် ဖြစ်ပြီး ကိုယ်ဝန်ဆောင်မိခင်များ၏ မိမိတို့ရောက်ရှိနေသည့် ကိုယ်ဝန်ပတ်အလိုက် ဆောင်ရန်၊ ရှောင်ရန်များ အားသက်ဆိုင်ရာ စာများ၊ပုံများ၊ သန္ဓေသား၏ အခြေအနေများကို ဗီဒီယိုဖိုင်များနှင့်တကွ ရှင်းလင်း ပေးထားကြောင်း သိရသည်။
